Ուկրաինայի զինված ուժերի գլխավոր շտաբն այսօր առավոտյան իր զեկույցում անուղղակիորեն հաստատել է, որ ռուսական զորքերն առնվազն մոտ են Բախմուտն օպերատիվ շրջափակման մեջ վերցնելուն, այսինքն՝ Դոնեցկի շրջանի այդ քաղաք տանող հիմնական ուղիները կտրելուն։
Առավոտյան հաղորդագրությունում բնակավայրերի թվում, որտեղ ուկրաինացի զինվորականները վերջին 24 ժամում փորձում էին հետ մղել հարձակումները, հայտնվել է Ստուպոչկի գյուղը։ Այս գյուղը գտնվում է Բախմուտը Կոնստանտինովկա քաղաքին կապող ճանապարհի վրա, որը մատակարարման կարևոր հանգույց էր Բախմուտի կայազորի համար։ Ըստ հաղորդագրության՝ մարտեր են ընթանում հենց Բախմուտում։
Վարշավան կգտնի գերմանական Leopard 2 տանկերը Կիև տեղափոխելու միջոց նույնիսկ առանց Գերմանիայի թույլտվության։ Այս մասին հայտարարել է Լեհաստանի վարչապետ Մատեուշ Մորավիեցկին։
Նա նշել է, որ եթե Գերմանիան չհամաձայնի այդ տանկերի մատակարարմանը, Լեհաստանը պետությունների ավելի փոքր կոալիցիա կստեղծի, որը պատրաստ կլինի Ուկրաինայի հետ կիսել ոչ միայն Leopard 2-ը, այլև այլ զրահամեքենաներ։
Համաձայն միջազգային կանոնների՝ ոչ մի պետություն չի կարող զենք փոխանցել մյուսին առանց արտադրող երկրի համաձայնության։
Ֆինլանդիան պատժամիջոցների շրջանակում սառեցրել է 187 մլն եվրոյի ռուսական ակտիվները, հայտնում է Yle-ն։
Ինչպես նշել է երկրի արտաքին գործերի նախարարության պատժամիջոցների բաժնի ղեկավար Պիա Սաարիվաարան, խոսքը անշարժ գույքի, բաժնետոմսերի, մեքենաների, զբոսանավերի, ինքնաթիռների և այլ արժեքավոր գույքի մասին է։
2022 թվականի սեպտեմբերին հաղորդվեց, որ Ֆինլանդիայի իշխանությունները 189 միլիոն եվրոյի ընդհանուր գումարով բռնագրավել են Ռուսաստանի քաղաքացիների ունեցվածքը։ Արգելքներ են դրվել Եվրամիության (ԵՄ) պատժամիջոցների ցանկում ընդգրկված անձանց և կազմակերպությունների գույքի վրա։ Ընդհանուր առմամբ կայացվել է գույքի վրա ժամանակավոր կամ մշտական արգելանք դնելու շուրջ 200 որոշում։
Պաշտոնական Մոսկվան պնդում է, որ ռուսական զորքերն անցած 24 ժամերին հաջողության են հասել ռազմաճակատի մի շարք հատվածներում՝ մասնավորաբար Զապորոժիեի ուղղությամբ։
«Հարձակողական գործողությունների արդյունքում Արևելյան ռազմական օկրուգի ստորաբաժանումները կարողացել են ավելի շահավետ դիրքեր և բնագծեր զբաղեցնել Զապորոժիեի ուղղությամբ», - այսօր հայտարարել է Ռուսաստանի Պաշտպանության նախարարության պաշտոնական ներկայացուցիչ Իգոր Կոնաշենկովը։
Նրա պնդմամբ՝ հարձակման ընթացքում ուկրաինական զորքերը շուրջ 30 զոհ են տվել։
«Դոնեցկի ուղղությամբ ռուսական ուժերին հաջողվել է գրավել Դվուրեչյե բնակավայրը», - հայտարարել է Կոնաշենկովը՝ նշելով, որ այս ուղղությամբ իրականացված հարձակողական գործողություններին մասնակցել են Ռուսաստանի Զինված ուժերի Հարավային օկրուգի զորամասերը։
Նախօրեին Գերմանիայում գտնվող ամերիկյան «Ռամշտայն» ռազմակայանում կայացած ՆԱՏՕ-ի հավաքի մասնակիցները այդպես էլ չեն կարողացել ընդհանուր հայտարարի գալ Կիևին ծանր սպառազինության՝ մասնավորաբար ամերիկյան և գերմանական արտադրության տանկերի մատակարարման շուրջ։ Կողմերը պայմանավորվել են շարունակել քննարկումները։
Ավելի վաղ պաշտոնական Կիևը դիմել էր Վաշինգտոնին և Բեռլինի՝ խնդրելով հարյուրավոր տանկեր տրամադրել, ինչն ըստ ուկրաինական իշխանությունների, հնարավորություն կտար հաջողությամբ դիմակայել ռուսական կողմին և որոշիչ հակահարձակման անցնել։ Միացյալ Նահանգների Պաշտպանության նախարար Լոյդ Օսթինը, սակայն, «Ռամշտայնում» հայտարարել է, որ Ուկրաինային «Աբրամս» մակնիշի տանկեր տրամադրելու վերաբերյալ որևէ նորություն հայտնել չի կարող։
Գերմանիայի նորանշանակ Պաշտպանության նախարար Բորիս Պիստորիուսը ևս նշել է, որ Ուկրաինային «Լեոպարդ» մակնիշի տանկերի մատակարարման մասին որոշումը Բեռինում դեռ չի կայացվել։
Միացյալ Նահանգները հաջորդ շաբաթ լրացուցիչ պատժամիջոցներ կկիրառի «Վագներ» ռուսական մասնավոր ռազմական ընկերության դեմ, որն օգնում էր Ռուսաստանի զինված ուժերին ուկրաինական պատերազմում, հունվարի 20-ին հայտնել է ամերիկացի բարձրաստիճան պաշտոնյան:
Պաշտոնյան, անանուն մնալու պայմանով, ասել է, որ Ֆինանսների նախարարությունը կնշանակի «Վագներ»-ին որպես նշանակալի անդրազգային հանցավոր կազմակերպություն և կսահմանի լրացուցիչ պատժամիջոցներ։
«Այս գործողությունները ճանաչում են անդրմայրցամաքային վտանգը, որը ներկայացնում է «Վագները», ներառյալ լուրջ հանցավոր գործունեության իր շարունակական օրինակը», - նշել է նա:
Այս քայլը կսառեցնի «Վագներ»-ին պատկանող ԱՄՆ-ի ցանկացած ակտիվ և կարգելի ամերիկացիներին գործարքներ կնքել խմբի հետ:
Ռուսաստանի և Բելառուսի օդային ստորաբաժանումները Բելառուսում համատեղ զորավարժություններ են անցկացնում:
Դրանք տեղի են ունենում մայրաքաղաք Մինսկից 150 կիլոմետր արևմուտք գտնվող Բարանովիչի բնակավայրի շրջանում:
Փորձագետների կարծիքով, Մոսկվան կարող է փորձել ճնշում բանեցնել Մինսկի վրա և համոզել միանալ Ուկրաինայում ընթացող պատերազմին:
Կրեմլը պնդում է, որ նման մտադրություն չունի: Նույնը մի քանի առիթներով հայտարարել է նաև Բելառուսի ղեկավար Ալեքսանդր Լուկաշենկոն:
Բելառուսի պաշտպանության նախարարությունը հայտարարել է, թե հունվարի 16-ին մեկնարկած երկշաբաթյա զորավարժությունները «բացառապես պաշտպանական բնույթ են կրում»
Նախագահ Վլադիմիր Զելենսկին տեսակապով դիմել է Ռամշտայնում Ուկրաինային զենք տրամադրելու հարցով գումաժրված համաժողովի մասնակիցներին:
«Պատրաստ եմ հարյուր անգամ շնորհակալություն հայտնել ձեզ, բայց հարյուր «շնորհակալությունը» հարյուր հրասայլ չէ, մենք ռուսական ագրեսիայի դեմ պետք է կռվենք ոչ թե խոսքով, այլ զենքով»,- ասել է Զելենսկին, նշելով, որ մեծ ակնկալիքներ ունի ունի այդ ժողովից:
Նրա խոսքով, սպառազենի ցանկացած միավոր օգնում է փրկել Ուկրաինայի ժողովրդին ահաբեկչությունից:
«Ռուսների հիմնական զենքը հիմա՝ ժամանակն է: Մենք պետք է այնպես գործենք, ինչպես հայրը կամ մայրը՝ զավակին փրկելիս, ինչպես որդին կամ դուստրը՝ ծնողին փրկելիս: Այս պատերազմում կորոշվի, թե ինչ աշխարհում ենք ապրելում»,- ասել է Զելենսկին:
Նրա խոսքով, մարդիկ ուզում են ապրել, սիրել, երազել և հույսեր փայփայել: Այս պատերազմոում վճռվում է ոչ միայն Ուկրաինայի, այլև Եվրոպայի ճակատագիրը:
«Մարդիկ ուզում են հավատալ, որ չարիքը և ատելությունը կպարտվեն: Կրեմլը պետք է պարտվի»,- ասել է Զելենսկին:
Միացյալ Նահանգների կենտրոնական հետախուզական վարչության տնօրեն Ուիլյամ Բըրնսն անցած շաբաթավերջին գաղտնի այցով մեկնել է Կիև, որտեղ հանդիպել է Ուկրաինայի նախագահ Վլադիմիր Զելենսկու և ուկրաինական հետախուզության ղեկավարության հետ:
The Washington Post պարբերականի փոխանցմամբ, Բըրնսը Զելենսկուն տեղեկացրել է Ուկրաինայի վերաբերյալ Ռուսաստանի հնարավոր ռազմական ծրագրերի մասին:
Ամերիկյան հետախուզությունը և արևմտյան փորձագետները չեն բացառում, որ առաջիկա շաբաթներին կամ ամիսներին Մոսկվան կձեռնարկի լայնածավալ հարձակում, փորձելով օգտվել ուկրաինական բանակի ռազմամթերքի պաշարների աստիճանական սպառման հանգամանքից:
Զելենսկին, ըստ The Washington Post-ի, հետաքրքրվել է Բըրնսից, թե արդյո՞ք ԱՄՆ-ի և արևմտյան մյուս երկրների կողմից Ուկրաինային սատարելու քաղաքականությունը կարող է փոխվել այն բանից հետո, երբ Կոնգրեսի Ներկայացուցիչների տանը մեծամասնությունը դեմոկրատականներից փոխանցվել է հանրապետականներին, և արդյոք դեր կխաղա այն, որ ըստ վերջին հարցումների, ամերիկացի ընտրողների շրջանում նվազել է Ուկրաինային սատարողների թիվը:
Ինչպես խոստացվել էր այս շաբաթվա սկզբին, երեկ Պենտագոնը հայտարարեց Ուկրաինային 2,5 միլիարդ դոլար արժողությամբ ռազմական օգնության փաթեթի տրամադրման մասին, ներառյալ Stryker զրահափոխադրիչները և Bradley մարտական մեքենաները:
Փաթեթը ներառում է նաև պահեստամասեր՝ HIMARS հրթիռային համակարգերի, այլ զինամթերքի և հակաօդային պաշտպանության համակարգերի համար։
Փաթեթը մեծությամբ երկրորդն է ԱՄՆ-ի կողմից մինչ օրս տրամադրված օգնության:
Ամենամեծը 3 միլիարդ դոլարից ավելի փաթեթն էր, որի մասին հայտարարվել էր հունվարի սկզբին։