Փետրվարի 23-ից 26-ը մոլորակի տարբեր երկրներում տեղի են ունենում Ուկրաինայի հետ համերաշխության ակցիաներ, որոնց նշանաբանն է «Լույսը կհաղթի խավարին»՝ #LightWillWinOverDarkness:
Այդ համաշխարհային ակցիաների ընթացքում նախատեսված են ցույցեր, պիկետներ, երթեր, համերգներ, ինստալյացիաներ և պերֆորմանսներ, ցուցահանդեսներ և այլ միջոցառումներ:
Ակտիվիստները դատապարտում են Ուկրաինայի վրա 2014 թվականից սկսված Կրեմլի հարձակումը:
Ակցիաների կազմակերպիչներն են աշխարհի տարբեր երկրներում գործող ուկրաինական սփյուռքի կենտրոնները, համակարգողի դերում է Communities Army of Ukraine՝ «Ուկրաինայի համայնքների բանակը» կազմակերպությունը:
Եվրոպական միության արտաքին հարաբերությունների և անվտանգության հարցերով բարձր ներկայացուցիչ Ժոզեպ Բորելը El Periodico իսպանական օրաթերթին տված հարցազրույցում ասել է, թե միությունը չի ցանկանում Ռուսաստանի քայքայում:
«Մենք չենք սատարում Ուկրաինային Ռուսաստանում քաղաքական փոփոխությունների հասնելու համար և, անկեղծ ասած, Ռուսաստանի քայքայում չենք ուզում», - ասել է Բորելը:
Լեհաստանի վարչապետ Մատեուշ Մորավեցկին այսօր ժամանել է Կիև, որտեղ կմասնակցի Ուկրաինայի խորհրդարանի՝ Գերագույն ռադայի նիստին, հայտնել է «Իրավունք և արդարություն» իշխող կուսակցության գլխավոր քարտուղար Կշիշտոֆ Սոբոլևսկին:
Նրա խոսքով՝ վարչապետը Գերագույն ռադայի հատուկ նիստում (այն նվիրվելու է պատերազմի առաջին տարելիցին) Ուկրաինայի ժողովրդին կհավաստիացնի լիակատար աջակցության մասին:
Բացի այդ, նա Ուկրաինայի ղեկավարներին կներկայացնի Լեհաստան Միացյալ Նահանգների նախագահ Ջո Բայդենի կատարած վերջին այցի արդյունքները:
Մեծ Բրիտանիան ընդլայնել է ռուսաստանցիների նկատմամբ պատժամիջոցների ցանկը՝ դրանում ընդգրկելով Պուտինի շրջապատի ներկայացուցիչների և 34 խոշոր մենեջերների, որոնք կապված են «Ռոստեխ» և «Ալմազ-Անթեյ» պետական ընկերությունների հետ: Պատժամիջոցների տակ են հայտնվել նաև «Ռոսատոմ»-ի և «Գազպրոմ»-ի ղեկավարները: Ընդհանուր առմամբ նոր պատժամիջոցներ են սահմանվել 92 անձի նկատմամբ։
Մասնավորապես, պատժամիջոցների տակ է հայտնվել Ալինա Կաբաևայի մայրը, ով, ըստ լրատվամիջոցների, միլիոնավոր ռուբլիների անշարժ գույք ունի, Տուլայի նահանգապետ Ալեքսեյ Դյումինը, փոխվարչապետ Ալեքսանդր Նովակը և թվային զարգացման նախարար Մաքսուտ Շադաևը:
Մեծ Բրիտանիան նաև արգելք է սահմանում այն բոլոր բաղադրիչների արտահանման վրա, որոնք Ռուսաստանը մինչ օրս օգտագործել է մարտի դաշտում։ Սա ներառում է ավիացիոն մասեր, ռադիոսարքավորումներ և էլեկտրոնային բաղադրիչներ, որոնք կարող են օգտագործվել ռուսական ռազմարդյունաբերական համալիրի կողմից, այդ թվում՝ անօդաչու թռչող սարքերի արտադրության համար։
Չինաստանն այսօր հրապարակել է ուկրաինական ճգնաժամի քաղաքական կարգավորման վերաբերյալ դիրքորոշումը։ Փաստաթղթի տեքստը տեղադրված է Չինաստանի ԱԳՆ կայքում, այն ներառում է 12 կետ։
Պաշտոնական Պեկինը հրապարակած հայտարարությունում կոչ է անում դադարեցնել ռազմական գործողությունները Ուկրաինայում և սկսել բանակցային գործընթացը։
«Բոլոր կողմերը պետք է պահպանեն ռացիոնալությունը և զսպվածությունը, կրակի վրա յուղ չլցնեն, չսրեն հակամարտությունները, խուսափեն ուկրաինական ճգնաժամի հետագա սրումից կամ նույնիսկ իրավիճակի՝ վերահսկողությունից դուրս գալուց», - ասված է փաստաթղթում։
Չինաստանը երկխոսությունն ու բանակցություններն անվանում է «ուկրաինական ճգնաժամի լուծման միակ ճանապարհը» և կոչ անում բոլոր կողմերին աջակցել Մոսկվային և Կիևին «միմյանց ընդառաջ շարժվելու» և ուղիղ երկխոսությունը հնարավորինս շուտ վերսկսելու հարցում։
Ընդգծվում է, որ համաշխարհային հանրությունը պետք է պայմաններ և հարթակ ստեղծի բանակցությունների վերսկսման համար։
«Երկխոսությունն ու բանակցությունները ուկրաինական ճգնաժամի լուծման միակ հնարավոր ճանապարհն են», - ընդգծում է Չինաստանի արտաքին քաղաքական գերատեսչությունը:
Միացյալ Նահանգների նախագահ Ջո Բայդենն այսօր առցանց հանդիպում կանցկացնի Մեծ յոթնյակի առաջնորդների և Ուկրաինայի նախագահ Վլադիմիր Զելենսկու հետ, հաղորդում է Սպիտակ տունը:
Հանդիպումը տեղի է ունենում Ուկրաինա ռուսական ներխուժման մեկնարկից ուղիղ մեկ տարի անց, արևմտյան առաջնորդները ծրագրում են վաղը հայտարարել նոր պատժամիջոցների մասին նրանց դեմ, ովքեր օգնում են ռուսական ռազմական մեքենային, ասված է հաղորդագրությունում:
«Մեծ յոթնյակը դարձել է Ռուսաստանին մեր ուժեղ և միասնական պատասխանի հենակետը», - հինգշաբթի օրը հայտարարել է Սպիտակ տան պաշտոնական ներկայացուցիչ Կարին Ժան-Պիերը: Նրա խոսքով՝ այսօր առաջնորդները կքննարկեն Ուկրաինային աջակցության շարունակականությունը և Ռուսաստանի վրա ճնշումների ավելացումը:
Պատժամիջոցները կվերաբերեն ինչպես ֆիզիկական, այնպես էլ իրավաբանական անձանց, որոնք կապված են ռուսական բանկերի, տեխնոլոգիական և պաշտպանական ոլորտների գործունեության հետ։
ԱՄՆ-ը նաև կհայտարարի Ուկրաինային օգնության նոր փաթեթի մասին, որը կներառի տնտեսական, անվտանգության և էներգետիկ ոլորտներում աջակցություն, հավելել է Սպիտակ տան խոսնակը։
Ավստրալիայի կառավարությունն այսօր հայտարարել է, որ անօդաչու թռչող սարքերի նոր խմբաքանակ կուղարկի Ուկրաինա, և հայտնել է նոր ֆինանսական պատժամիջոցների մասին՝ 90 ֆիզիկական և 40 իրավաբանական անձանց նկատմամբ:
ՄԱԿ-ի Գլխավոր ասամբլեան արտահերթ նիստում բանաձև ընդունեց՝ Ռուսաստանին կոչ անելով դադարեցնել ռազմական գործողությունները Ուկրաինայում և դուրս հանել իր զորքերը։
141 երկիր կողմ է քվեարկել, 32-ը` ձեռնապահ, այդ թվում` Հայաստանը։ Ձեռնպահների թվում են Չինաստանը, Հնդկաստանը, ԱՊՀ անդամ Կենտրոնական Ասիայի երկրները։ Ընդամենը 6 երկիր է կանգնել Ռուսաստանի կողքին՝ նրա հետ դեմ քվեարկելով բանաձևին` Բելառուսը, Հյուսիսային Կորեան, Սիրիան, Մալին, Էրիթրեան ու Նիկարագուան։
Մի քանի երկրներ, այդ թվում՝ Ադրբեջանը, բացակայել են՝ քվեարկությանը չեն մասնակցել։
Մինչ քվեարկությունը ՄԱԿ-ում Միացյալ Նահանգների մշտական ներկայացուցիչ Լինդա Թոմաս-Գրինֆիլդն ասել է, որ այս քվեարկությունը կմնա պատմության մեջ։ «Հակամարտության մեկամյա տարելիցին մենք կտեսնենք, թե աշխարհի ժողովուրդները որտեղ են կանգնած Ուկրաինայի խաղաղության հարցում», - նշել է ՄԱԿ-ում ԱՄՆ-ի դեսպանը։
Ծավալված քննարկումներում ՄԱԿ-ում Ռուսաստանի մշտական ներկայացուցիչ Վասիլի Նեբենզյան ասել է, թե արևմտյան ճամբարի համար շատ ավելի դժվար է դարձել մոբիլիզացնել ՄԱԿ-ի անդամ պետություններին՝ աջակցելու Ռուսաստանի դեմ իրենց «խաչակրաց արշավանքին»: Նա պնդել է, որ քվեարկության դրվող բանաձևը հակառուսական է և վնասակար։
Ուկրաինայի արտգործնախարար Դմիտրի Կուլեբան ՄԱԿ-ի ամբիոնից ասել է, որ նորագույն պատմության մեջ երբեք այսքան հստակ չի եղել բարու և չարի սահմանը. - «Մի երկիր պարզապես ցանկանում է հեռանալ, մյուսն ուզում է սպանել ու ոչնչացնել»։
ՄԱԿ-ի գլխավոր քարտուղար Անտոնիու Գուտերեշն ասել է, որ Ռուսաստանի Ուկրաինա ներխուժելու տարելիցը մռայլ հանգրվան է Ուկրաինայի ժողվորդի և միջազգային հանրության համար: Նրա խոսքով՝ ռուս - ուկրաինական պատերազմը նաև հրահրում է տարածաշրջանային անկայունություն, գլոբալ լարվածություն և տարաձայնություններ, ուշադրությունն ու ռեսուրսները շեղում մյուս ճգնաժամերից ու հրատապ գլոբալ խնդիրներից։
«Մինչդեռ մենք լսել ենք միջուկային զենք օգտագործելու անուղղակի սպառնալիքներ։ Միջուկային զենքի այսպես կոչված տակտիկական կիրառումը բացարձակապես անընդունելի է։ Ժամանակն է նահանջել եզրագծից», - ասել է ՄԱԿ-ի գլխավոր քարտուղարը։
«Ղրիմի կամուրջն ամբողջովին բաց է ավտոմոբիլային երթևեկության համար», - այսօր հայտարարել է Ռուսաստանի փոխվարչապետ Մարատ Խուսնուլլինը։
Ռուսաստանը Ղրիմին կապող կամուրջը պայթեցվել է անցած աշնանը` հոկտեմբերի 8-ին, զոհվել էր 5 մարդ։
ՌԴ նախագահ Վլադիմիր Պուտինը տեղի ունեցածն անվանել է ահաբեկչություն՝ պնդելով, որ պայթյունը կազմակերպել են Ուկրաինայի հատուկ ծառայությունները։
Կիևը բազմիցս հայտարարել է, որ կամուրջը համարում է օրինական ռազմական թիրախ, սակայն չի ստանձնել կատարվածի պատասխանատվությունը։
Ռուսաստանում պայթյուն նախապատրաստելու մեղադրանքով 8 մարդ է ձերբակալվել, այդ թվում՝ Հայաստանի քաղաքացի 37-ամյա Արթուր Տերչանյանը, ում հետաքննությունը կասկածում է կամուրջը պայթեցնելուց առաջ պայթուցիկներ տեղափոխելու մեջ։ Եվս երկու հայ՝ Գեորգի Ազատյանը և նրա կրտսեր եղբայրը՝ Արտյոմ Ազատյանը մեղադրվում են պայթուցիկ նյութեր պահելու մեջ։
Ռուսաստանի պաշտպանության նախարարության օդանավ է կործանվել Բելգորոդի շրջանում, այսօր իր Telegram ալիքում հայտնել է շրջանի նահանգապետ Վյաչեսլավ Գլադկովը։
«Վալույսկի քաղաքային շրջանում Պաշտպանության նախարարության ինքնաթիռ է կործանվել, այժմ տեղում աշխատում են քննչական խումբը և Արտակարգ իրավիճակների նախարարության աշխատակիցները»,- գրել է նա։
Գլադկովի փոխանցմամբ՝ միջադեպի պատճառները պարզվում են: ՏԱՍՍ-ին ուժային կառույցից հայտնել են, որ Սու-24-ի օդաչուն կատապուլտի է դիմել: