Այս գիշեր Ուկրաինայի շատ շրջաններում կրկին օդային տագնապ է հայտարարվել։
Զապորոժիեի վրա ռուսական ավիահարվածի հետևանքով ավերվել է հինգ հարկանի բնակելի շենք, փլուզման հետևանքով երկու մարդ է մահացել, հայտնել են տեղի իշխանությունները։
Ուկրաինայի հակաօդային պաշտպանության համակարգն ավելի արդյունավետ է դարձել՝ հակաօդային պաշտպանության ուժերը խոցում են ռուսական զորքերի կողմից արձակված հրթիռների մեծ մասը, հայտարարել է Ուկրաինայի Զինված ուժերի ներկայացուցիչը։
«Ներկայումս խոցված հրթիռների տոկոսը շատ է փոխվել և կազմում է 80 տոկոս, իսկ որոշ դեպքերում նույնիսկ ավելին, մեր հակաօդային պաշտպանության մասնագետները դարձել են ավելի պրոֆեսիոնալ և կոմպետենտ», - ասել է նա։
Ուկրաինացիները Բախմուտում կատաղի դիմադրություն են ցույց տալիս, այսօր հայտարարել է «Վագներ» մասնավոր ռազմական ընկերության հիմնադիր, Ռուսաստանի նախագահի հետ սերտ կապեր ունեցող գործարար Եվգենի Պրիգոժինը։
«Ուկրաինայի զինված ուժերը հավելյալ ռեզերվներ են ներգրավում Բախմուտում՝ փորձելով ամեն գնով թույլ չտալ քաղաքի անկումը։ Ուկրաինական բանակի տասնյակ հազարավոր մարտիկներ կատաղի դիմադրություն են ցուցաբերում։ Մարտերի արյունահեղությունն օրեցօր աճում է», - նշել է Պրիգոժինը։
Մոսկվան պնդում է, որ կանխել է Ղրիմի ուղղությամբ ուկրաինական ԱԹՍ-ների ծավալուն հարձակումը։ Այս մասին այսօր հայտարարել է Ռուսաստանի պաշտպանության նախարարության պաշտոնական ներկայացուցիչ Իգոր Կոնաշենկովը։
«Կիևի վարչակազմի կողմից Ղրիմի թերակղզում գտնվող օբյեկտների դեմ զանգվածային օդային հարձակման փորձը կանխվել է։ Ղրիմի ուղղությամբ արձակված հարվածային անօդաչուներից վեցը խոցվել են ՀՕՊ ուժերի կողմից, ևս չորսը շարքից դուրս են բերվել ռադիոէլեկտրոնային պայքարի միջոցների կիրառմամբ», - ասել է Կոնաշենկովը։
Կրեմլի խոսնակ Դմիտրի Պեսկովը հայտարարել է, թե ուկրաինական կողմի հետ բանակցությունների հնարավորություն չկա, քանի որ Կիևն ի պաշտոնե հայտարարել է Ռուսաստանի ներկայիս ղեկավարության հետ բանակցություններն արգելելու մասին:
Բացի այդ, ըստ Պեսկովի, «կան իրողություններ, Ռուսաստանն ունի չորս նոր տարածքային միավոր, դա չի կարելի անտեսել: Կա Ռուսաստանի Սահմանադրություն, որը չի կարող անտեսվել ոչ մեկի կողմից, և որից ռուսական կողմը երբեք չի հրաժարվի: Կան նաև հատուկ ռազմական օպերացիայի նպատակները, որոնց իրականացումը շարունակվում է»,- ասել է Պեսկովը:
Կրեմլի խոսնակը նաև նշել է, որ այսպես կոչված՝ հավաքական Արևմուտքը պետք է Ռուսաստանի հանդեպ մոտեցումը փոխի, հաշվի առնի անվտանգության հարցում Ռուսաստանի մտահոգությունները:
«2021-ին Ռուսաստանը երկու ծրագրային պայմանագրերի օրինագծեր է փոխանցել Արևմուտքին {ՌԴ ու ԱՄՆ-ի և ՌԴ ու ՆԱՏՕ-ի միջև անվտանգության երաշխիքների մասին}, դրանք պետք է կարգավորեին փոխհարաբերություններն անվտանգության հարցում, դրանց շուրջ կարող էին ծավալվել, թերևս, դժվար, լարված, բարդ բանակցություններ, բայց, ի վերջո, դրանք կլինեին բանակցություններ, սակայն Արևմուտքը մերժել է քննարկումը»,- հայտարարել է Պեսկովը «Իզվեստիա» պարբերականին փետրվարի 28-ին տված հարցազրույցում:
Ուկրաինայի գլխավոր շտաբի զեկուցագրի համաձայն, Դոնբասի շրջանում ռուսական ուժերի գերնպատակն է դարձել Բախմուտի (ռուսերեն՝ Արտյոմովսկի) գրավումը:
Ստորաբաժանումների գերիշխող մեծամասնությանը հրահանգվել է կենտրոնանալ այդ խնդրի վրա: Անցած 24 ժամում ուկրաինացիները հետ են մղել ռուսների ավելի քան վեց տասնյակ գրոհներ:
Նախագահ Վլադիմիր Զելենսկին երեկ կեսգիշերային ավանդական տեսաուղերձում խոստովանել է, որ վիճակն այնտեղ ծայրահեղ դժվար է:
«Ես մշտական կապի մեջ եմ հրամանատարների հետ, առանձնահատուկ ուշադրություն է հատկացվում արևելքին, հատկապես Դոնեցկի շրջանին, Բախմուտի հատվածում իրավիճակը հետզհետե ավելի բարդ է դառնում, թշնամին ոչնչացնում է այն ամենն, ինչը կարելի էր օգտագործել որպես պաշտպանական կառույց: Բախմուտը պաշտպանող մեր զինվորներն իսկական հերոսներ են»,- ասել է Ուկրաինայի նախագահը:
Ռուսները փորձում են ցանկացած գնով վերցնել Բախմուտը: Կիևի համոզմամբ, այնտեղ և ռազմաճակատի մյուս հատվածներում ռուսական ուժերի հարձակումները զսպելու համար անհրաժեշտ են արդիական մարտական օդանավեր: Զելենսկին կրկնել է Արևմուտքին հասցեագրված կոչը:
Ռուսաստանի նախագահ Վլադիմիր Պուտինը երեկ մասնակցել է Անվտանգության դաշնային ծառայության կոլեգիայի նիստին և հանձնարարել ակտիվացնել հակահետախուզական գործունեությունը՝ Ուկրաինայի և Արևմուտքի կողմից Ռուսաստանի դեմ աճող լրտեսական և դիվերսիոն գործողություններին դիմակայելու համար։
«Անհրաժեշտ է ուժեղացնել հակահետախուզական ուղղությունը։ Արևմտյան հատուկ ծառայությունները միշտ ակտիվորեն աշխատել են Ռուսաստանում, իսկ հիմա նրանք մեր դեմ են նետել հավելյալ կադրային, տեխնիկական և այլ ռեսուրսներ։ Մենք պետք է արձագանքենք համապատասխան կերպով», - ասել է Պուտինը։
Փետրվարի 28-ին ավելի քան երկու ժամով փակվել էր Սանկտ Պետերբուրգի օդային տարածքը։ «Պուլկովո» օդանավակայանը դադարեցրել էր թռիչքներն ու վայրէջքները։
Իրավիճակի մասին տեղեկացվել է Ռուսաստանի նախագահ Վլադիմիր Պուտինը։ Նրա մամուլի խոսնակ Դմիտրի Պեսկովը լրագրողներին ասել է, որ Պուտինը այդ հարցում տիրապետում է ողջ տեղեկատվությանը։ Մանրամասների համար նա խորհուրդ է տվել հետևել ավիացիոն իշխանությունների և զինվորականների հաղորդագրություններին։
Կեսօրն անց սահմանափակումները հանվել են։ «Պետերբուրգի երկինքը բաց է, ժամանակավոր բոլոր սահմանափակումները հանվել են», - հաղորդել է Սմոլնիի Տելեգրամ ալիքը։
Տեղական ժամանակով 13։00-ի սահմաններում ՌԴ պաշտպանության նախարարությունը հաղորդեց, որ Ռուսաստանի արևմուտքում հակաօդային պաշտպանության հերթապահ զորքերը վարժանքներ են անցկացրել, կիրառվել են նաև կործանիչներ։ Ըստ հաղորդագրության՝ կատարվել են օդային տարածքի պայմանական սահմանախախտին հայտնաբերելու և ինքնությունը պարզելու խնդիրներ։
Ռուսական մի շարք Տելեգրամ ալիքներ գրում են, որ Պետերբուրգի օդային տարածքը փակվել էր անհայտ թռչող ապարատ հայտնվելու պատճառով, որն արտաքինից նման էր մեծ ԱԹՍ-ի։
Սանկտ Պետերբուրգի երկինքը փակվելու միջադեպից բացի, հաղորդվում է, որ անցած գիշերվա ընթացքում անօդաչու թռչող սարքեր են ընկել Ռուսաստանի տարածքում՝ Բելգորոդի, Բրյանսկի և Կրասնոդարի մարզերում։ Մի շարք շրջանների բնակիչներին ռադիոյի և հեռուստատեսության միջոցով զգուշացրել են թաքնվել ապաստարաններում՝ պաշտպանվելու համար հրթիռային հարձակումներից։ Վերջին լուրի կապակցությամբ Ռուսաստանի արտակարգ իրավիճակների նախարարությունն ասել է, որ այդ տեղեկատվությունը կեղծ է և չի համապատասխանում իրականությանը։ Ըստ ԱԻՆ-ի՝ այդ ռադիոկայաններն ու հեռուստաընկերությունները ենթարկվել էին հաքերային հարձակման, նրանց սերվերները կոտրվել են։
Մեկ տարվա ընթացքում ԵՄ-ն զգալիորեն կրճատել է իր կախվածությունը Ռուսաստանի էներգետիկ աղբյուրներից, «Ինտերֆաքսի» փոխանցմամբ, հայտարարել է Էներգետիկայի հարցով եվրահանձնակատար Կադրի Սիմսոնը։
«Թվերը խոսուն են․ Ռուսաստանն այլևս չի հանդիսանում գազի համար առաջին մատակարարը Եվրոպա, այդ տեղը զբաղեցրել են Միացյալ Նահանգներն ու Նորվեգիան։ 12 ամսվա ընթացքում Ռուսաստանի խողովակաշարերով գազի մատակարարումը 155 միլիարդ խորանարդ մետրից իջել է 62 միլիարդ խորանարդ մետրի: Ներմուծումն, ընդհակառակը, 2022 թվականին, 2021 թվականի համեմատ, աճել է՝ 80 միլիարդ խորանարդ մետրից հասնելով մինչև 135 միլիարդ խորանարդ մետրի», - լրագրողներին ասել է հանձնակատարը Ստոկհոլմում, որտեղ երեկվանից ընթանում է Եվրամիության հեռահաղորդակցության, տրանսպորտի և էներգիայի հարցերով ոչ ֆորմալ հանդիպումը։
ԱՄՆ ֆինանսների նախարար Ջանեթ Յելլենը երեկ այցելել է Կիև:
Նախարարի այցի մասին նախօրոք չի հայտարարվել:
Յելլենը հանդիպել է Ուկրաինայի նախագահի և վարչապետի հետ: Նախագահ Վլադիմիր Զելենսկին շեշտել է հանդիպման կարևորությունն ու նշել, որ Միացյալ Նահանգներն աջակցում է Ուկրաինային պատերազմի առաջին օրերից:
Յելլենը հայտարարել է Կիևին հատկացվող 10 միլիարդանոց փաթեթի առաջին՝ 1 միլիարդ դոլարի տրանշի փոխանցման մասին:
Ռուսաստանի պաշտպանության նախարարությունը հաստատում է Ուկրաինային հասցված օդային նոր հարվածների մասին տեղեկությունները։
Ռուսաստանի պաշտպանության նախարարության պաշտոնական ներկայացուցիչ Իգոր Կոնաշենկովի խոսքով՝ ռուսական զորքերը «Կիևի մարզի Բրովարի քաղաքի մերձակայքում խոցել են Ուկրաինայի Զինված ուժերի կազմում գործող ռադիոէլեկտրոնային պայքարի կենտրոններից մեկը։ Խմելնիցկու մարզում հարված է հասցվել հատուկ գործողությունների «Զապադ» օպերատիվ կենտրոնի տարածքին»։