Հռոմի պապ Ֆրանցիսկոսն ասել է, որ պատրաստ է Կիև գնալ միայն այն պայմանով, որ իրեն կընդունեն Մոսկվայում։ Նա ընդգծել է, որ դրանում անհնարին ոչինչ չի տեսնում։ Նրա խոսքով՝ ամեն ինչ կախված է ՌԴ նախագահ Վլադիմիր Պուտինից։
Ֆրանցիսկոս պապը նշել է, որ Ուկրաինայում ռազմական գործողության սկզբից գրեթե չի խոսել Պուտինի հետ։ Պոնտիֆիկոսը խոստովանել է, որ չի զղջում դրա համար և փորձում է դիվանագիտական կապեր հաստատել Ռուսաստանի և Ուկրաինայի միջև։
Միաժամանակ նա խոստովանել է, որ չի հավատում Վատիկանում Պուտինի և Ուկրաինայի նախագահ Զելենսկու երկկողմ հանդիպման անցկացմանը։
Ուկրաինայի ցամաքային զորքերի և Ռուսաստանի դեմ կռվող ուկրաինական ստորաբաժանումների արևելյան խմբավորման հրամանատար, գեներալ-գնդապետ Ալեքսանդր Սիրսկին այսօր ժամանել է Բախմուտ, հաղորդում է Ուկրաինայի ռազմական գերատեսչությունը։
Հաղորդագրության համաձայն, Սիրսկին ծանոթացել է քաղաքի պաշտպանության նպատակով իրականացվող քայլերին՝ ընդգծելով, որ Բախմուտում ուկրաինական զորքերն «արժանի հարվածներ են հասնցում թշնամուն՝ շարունակելով պաշտպանել քաղաքը»։
«Բախմուտի պաշտպանության մեջ լուրջ ուժեր են ներգրավված, ինչը թույլ չի տալիս հակառակորդին կյանքի կոչել իր մտահաղացումները», - հայտարարել է Սիրսկին՝ ընգծելով, որ Բախմուտում ծավալված մարտերի գլխավոր նպատակը ժամանակ շահելն է։
«Դա մեզ թույլ կտա ուժեր կուտակել գարնանային հակահարձակման համար, որի մեկնարկը սարերի հետևում չէ», -նշել է ուկրաինացի գեներալը։
«ԵՄ դիմելու է երրորդ երկրներին՝ խնդրելով ուժեղացնել բարձր տեխնոլոգիական ապրանքների արտահանման հանդեպ իրականացվող վերահսկողությունը, քանի որ մտավախություն ունի, որ դրանք կարող են օգտագործվել Ռուսաստանի կողմից՝ ռազմական նպատակներով», - այսօր գրել է Bloomberg գործակալությունը՝ վկայակոչելով ԵՄ ղեկավարությանը մոտ կանգնած իր աղբյուրներին։
Bloomberg-ի զրուցակիցը նշել է, որ այս խնդրանքը նախևառաջ վերաբերելու է այն պետություններին, որոնցում, վերջին մեկ տարում ԵՄ-ից ներկրվող ապրանքների կտրուկ աճ է նկատվել։
Խոսքն, ըստ գործակալության, նախևառաջ Թուրքիայի, Արաբական Միացյալ էմիրությունների, Ղազախստանի և Կենտրոնական Ասիայի մի շարք երկրների մասին է։
Ռուսաստանը պահանջել է մարտի 14-ին գումարել ՄԱԿ-ի Անվտանության խորհրդի նիստ:
ՄԱԿ-ում Ռուսաստանի առաջին փոխդեսպան Դմիտրի Պոլյանսկին ասել է, որ «հարկ է քննարկել ուկրաինական հակամարտության կարգավորումը խոչընդոտող ռուսատյացության խնդիրը»:
«Այսօր մարտի 14-ին նիստ գումարելու հայտ ենք ներկայացրել, ռուսատյացությունը թույլ չի տալիս գտնել ուկրաինական ճգնաժամի երկարաժամկետ և կայուն լուծում: Իհարկե, կանդրադառնանք ռուսատյացությանը ոչ միայն Ուկրաինայում, այլև Արևմուտքում»,- ասել է Պոլյանսկին:
Նա նշել է, որ համազեկուցողների անունները կհրապարակվեն նիստի նախօրեին, ինչը թույլ կտա կանխել նրանց վրա ճնշումները թշնամաբար տրամադրված երկրների ներկայացուցիչների կողմից:
Ուկրաինայի նախագահ Վլադիմիր Զելենսկին այսօր Կիևում ընդունել է Ֆինլանդիայի վարչապետ Սաննա Մարինին:
Հանդիպման ընթացքում Զելենսկին շնորհակալություն է հայտնել Ֆինլանդիային ռուս-ուկրաինական պատերազմում ցուցաբերած աջակցության համար:
«Շնորհակալ եմ Ֆինլանդիային հրասայլերի հարցում մեզ ակտիվորեն օգնելու համար: Համոզված են, որ այս բնագավառում մեր համագործակցությունը համապատասխանում է և՛ Ուկրաինայի, և՛ Ֆինլանդիայի ինքնիշխանությունը և տարածքային ամբողջականությունը երաշխավորելու հրամայականին»,- ասել է Զելենսկին:
«Մենք ապրում ենք խավարի ժամանակներում, բայց կա նաև հույս, և դա այն է, որ մենք միավորվել ենք, սատարում ենք սանկցիաներին, տնտեսական և ռազմական օգնություն ենք տրամադրում Ուկրաինային: Մենք միավորված ենք և պաշտպանում ենք մեր արժեքները, և Ուկրաինան ռազմի դաշտում իր պայքարով եվրոպական արժեքներն է պաշտպանում»,- ասել է վարչապետ Մարինը:
Նախագահ Զելենսկին Ֆինլանդիայի վարչապետին նաև հավաստիացրել է, որ Ուկրաինան ոչ մի կապ չունի «Հյուսիսային հոսք» անդրջրյա գազատարների ոչնչացման հետ:
Եվրահանձնաժողովի նախագահ Ուրսուլա ֆոն դեր Լայենը ռազմական հանցագործություն է անվանել լույս հինգշաբթի գիշերը Ռուսաստանի կողմից Ուկրաինայի հրթիռակոծությունը։
«Այսօր խոսեցի Վլադիմիր Զելենսկու հետ՝ անցած գիշեր Ուկրաինային հասցված անկանոն հրթիռային հարվածներից հետո: Ռուսաստանի կանխամտածված հարվածը խաղաղ բնակչությանը և էներգացանցին ռազմական հանցագործություն է: Սա ամրապնդում է մեր ընդհանուր հանձնառությունը՝ շարունակել Ուկրաինայի բարեփոխումները նրա եվրոպական ճանապարհին», - գրել է ֆոն դեր Լայենը Twitter-ում:
Ավելի վաղ Ուկրաինայի հերթական հրթիռակոծումը դատապարտել էին Եվրամիության դիվանագիտության ղեկավար Ժոզեպ Բորելը, Սպիտակ տան ներկայացուցիչները և ՄԱԿ-ի Ատոմային էներգիայի միջազգային գործակալության ղեկավարը։
Եվրահանձնաժողովի նախագահ Ուրսուլա ֆոն դեր Լայենը ռազմական հանցագործություն է անվանել լույս հինգշաբթի գիշերը Ռուսաստանի կողմից Ուկրաինայի հրթիռակոծությունը։
«Այսօր խոսեցի Վլադիմիր Զելենսկու հետ՝ անցած գիշեր Ուկրաինային հասցված անկանոն հրթիռային հարվածներից հետո: Ռուսաստանի կանխամտածված հարվածը խաղաղ բնակչությանը և էներգացանցին ռազմական հանցագործություն է: Սա ամրապնդում է մեր ընդհանուր հանձնառությունը՝ շարունակել Ուկրաինայի բարեփոխումները նրա եվրոպական ճանապարհին», - գրել է ֆոն դեր Լայենը Twitter-ում:
Ավելի վաղ Ուկրաինայի հերթական հրթիռակոծումը դատապարտել էին Եվրամիության դիվանագիտության ղեկավար Ժոզեպ Բորելը, Սպիտակ տան ներկայացուցիչները և ՄԱԿ-ի Ատոմային էներգիայի միջազգային գործակալության ղեկավարը։
Ռուս - ուկրաինական պատերազմի էպիկենտրոնում հայտնված Զապորոժիեի ատոմային էլեկտրակայանում ստեղծվել է ծայրահեղ վտանգավոր իրավիճակ:
Ատոմակայանը զրկվել է հոսանքի արտաքին սնուցումից և իր կարևոր սարքավորումների ու նախևառաջ միջուկային ռեակտորների անվտանգությունը պահպանում է դիզելային գեներատորների արտադրած էլեկտրականությամբ: Այն անհրաժեշտ է սարքավորումների ու միջուկային վառելիքի հովացման համար:
Եթե ջերմությունը երկար ժամանակով գերազանցի սահմանված նորմերը, ապա կառաջանա պայթյունի վտանգ: Իսկ դա, իր հերթին, աննկարագրելի ծանր հետևանքներ կունենա Եվրոպայի և գուցե ամբողջ աշխարհի համար:
Նախօրեին հատուկ հայտարարությամբ է հանդես եկել Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսսին:
«Այսօր առավոտյան ժամը 5-ից Զապորոժիեի ԱԷԿ-ը մնացել է արտակարգ դեպքերի համար նախատեսված դիզելային գեներատորների հույսին: Դա պաշտպանական վերջին, ամենավերջին պատնեշն է: Թուլլ տվեք մի բան ասեմ՝ սա արդեն վեցերորդ անգամն է, կրկնում եմ՝ վեցերորդ անգամը, երբ ԱԷԿ-ը զրկվում է դրսից ստացվող հոսանքից և պետք է գործի արտակարգ պայմաններում: Թույլ տվեք նաև հիշեցնել, որ Զապորոժիեի ԱԷԿ-ն ամենախոշորն է Եվրոպայում», - ահազանգել է Գրոսսին:
ԱԷՄԳ-ի ղեկավարը ոչ միայն անընդունելի է համարում այս իրավիճակը, այլև ասում է, թե այս անխոհեմ կացությունը մի օր վատ կվերջանա: «Մենք պարտավոր ենք ապահովել կայանի անվտանգությունը», - հայտարարել է Գրոսսինն և իր գործընկերների աջակցությունն է հայցել:
Կիևում լայնածավալ ավիահարվածի ժամանակ մի քանի շրջաններում այսօր առավոտյան պայթյուններ են որոտացել, կան զոհեր:
Ականատեսների հաղորդումներից հետո, քաղաքապետ Վիտալի Կլիչկոն հայտնել է նոր պայթյունի մասին Ուկրաինայի մայրաքաղաքի Սվյատոշինսկի թաղամասում։ Նա նաև ասել է, որ «մեքենաներ են այրվում բնակելի շենքերից մեկի բակում», և հիշեցրել, որ Կիևում օդային տագնապը շարունակվում է։ Հաջորդ գրառման մեջ Կլիչկոն հայտնել է երկու զոհի մասին:
Ուկրաինական լրատվամիջոցները գրում են, որ նախնական տեղեկություններով՝ օգտագործվել են նաև բալիստիկ հրթիռներ։
Կիևի շրջանային ռազմական վարչակազմի տվյալներով՝ վտանգը դեռ պահպանվում է։ Իշխանությունները քաղաքացիներին խնդրում են չլքել անվտանգ վայրերը, հակաօդային պաշտպանությունն աշխատում է։
Ուկրաինայում մարտի լույս 9-ի գիշերը օդային տագնապ է հայտարարվել։ Պայթյուններ են լսվել մի շարք շրջաններում, Օդեսայի մարզում հայտնել են, որ հարվածներ են հասցվել էներգետիկ ենթակառուցվածքի օբյեկտին։ «Էներգոատոմ»-ի վկայությամբ՝ հրթիռակոծության պատճառով Զապորոժիեի ատոմակայանը լիովին հոսանքազրկվել է և անցել անջատման ռեժիմի։
Էլեկտրաէներգիայի վթարային անջատումների պատճառով Կիևի սպառողների 40 տոկոսը մնացել է առանց ջեռուցման։
Խարկովում՝ քաղաքի և շրջանի վրա մոտ 15 հարված է եղել: Զոհերի և վնասի չափի մասին տեղեկությունը ճշտվում է։
Օդեսայի շրջանային ռազմական վարչակազմի ղեկավար Մաքսիմ Մարչենկոն հայտնել է, որ «շրջանի էներգետիկ ենթակառուցվածքին հրթիռային հարվածներ են հասցվել, վնասվել են բնակելի շենքեր»։ Նրա խոսքով՝ զոհեր և վիրավորներ չկան։ Շրջանում մտցվել են էլեկտրամատակարարման սահմանափակումներ։
ՆԱՏՕ-ի գլխավոր քարտուղար Յենս Ստոլտենբերգը հայտարարել է, թե չի բացառում ռուսական ուժերի կողմից Բախմուտի գրավումը առաջիկա օրերին։ Ելույթ ունենալով Եվրամիության և Ուկրաինայի պաշտպանության նախարարների հետ հանդիպմանը՝ Ստոլտենբերգը մեկնաբանել է Դոնեցկի մարզի Բախմուտի մերձակայքում շարունակվող ծանր մարտերը։
«Ռուսաստանը որակի պակասը փորձում է լրացնել քանակով։ Նրանք [ռուս զինվորականները-խմբ.] մեծ կորուստներ են կրել, բայց միևնույն ժամանակ չենք կարող բացառել, որ Բախմուտն ի վերջո մոտ օրերս կարող է ընկնել: Կարևոր է ընդգծել, որ դա չի նշանակում, որ պատերազմում միանշանակ բեկում է տեղի ունեցել։ Սա պարզապես ընդգծում է, որ մենք չպետք է թերագնահատենք Ռուսաստանին», - ասել է նա։
Չորեքշաբթի առավոտյան ԱՄՆ Պատերազմի ուսումնասիրման ինստիտուտի փորձագետները հայտնել են, որ ուկրաինական բանակը Բախմուտի արևելյան մասից նահանջել է, իսկ «Վագների» ղեկավար Եվգենի Պրիգոժինը հայտարարել է, որ խմբավորումը գրավել է այդ շրջանը։
Ավելի ուշ ուկրաինական լրատվամիջոցները հայտնել են, որ Ուկրաինայի զինված ուժերի ցամաքային զորքերի հրամանատար Ալեքսանդր Սիրսկին երկու շաբաթվա ընթացքում չորրորդ անգամ ժամանել է Բախմուտ։ Գեներալի տելեգրամյան ալիքում տեսանյութ է հրապարակվել, որում նա պարգևներ է հանձնում քաղաքի պաշտպաններին։