Առաջին պաշտոնական այցով Լեհաստան է ժամանել Ուկրաինայի նախագահ Վլադիմիր Զելենսկին։
Սա Զելենսկու երրորդ արտասահմանյան ուղևորությունն է պատերազմի մեկնարկից ի վեր։
Լեհաստանի նախագահի գրասենյակի փոխանցմամբ, Վարշավայում Զելենսկին կհանդիպի լեհ պաշտոնակից Անջեյ Դուդայի, վարչապետ Մատեուշ Մորավեցկիի, մի շարք նախարարների հետ, ինչպես նաև ուղերձով կդիմի լեհերին և հարևան այդ երկրում ապաստանած ուկրաինացի փախստականներին։
Ուկրաինայում ռուսական ուժերի դեմ ռազմական գործողություններին մասնակցող ևս երկու վրացի է սպանվել։ Զոհվածների անուններն ու մահվան հանգամանքները դեռևս չեն հաղորդվում։
Անցած շաբաթ հայտնի դարձավ Բախմուտում 29-ամյա Միխայիլ Մազանաշվիլիի մահվան մասին, որը նույնպես որպես կամավոր միացել էր ուկրաինական զինված ուժերին։
Վրացական աղբյուրների համաձայն, Ուկրաինայում, պատերազմի մեկնարկից ի վեր, զոհվել է 41 վրացի։
The Wall Street Journal-ի ամերիկացի լրագրող Էվան Գերշկովիչը, ով Ռուսաստանում ձերբակալվել էր լրտեսության մեղադրանքով, ապրիլի 4-ին առաջին անգամ հանդիպել է փաստաբանների հետ, հայտնել է թերթի գլխավոր խմբագիր Էմմա Թաքերը նամակում, որն ուղարկվել է հրատարակության աշխատակիցներին, փոխանցում է Reuters-ը։
«Էվանի առողջական վիճակը լավ է, և նա շնորհակալ է ամբողջ աշխարհից աջակցության համար», - գրել է Թաքերը։
Նամակի տեքստում նշվում է նաև, որ Էվանի ընտանիքը «շունչ է քաշել, երբ իմացել է, որ վերջապես կապ է հայտնվել նրա հետ»։
Թաքերը հավելել է, որ Գերշկովիչը կալանքը բողոքարկել է փաստաբանների միջոցով։
Սպիտակ տունը հայտնել է, որ վարչակազմը քրտնաջան աշխատում է նրան ազատ արձակելու համար:
Ֆրանսիայի նախագահ Էմանյուել Մակրոնը և Եվրահանձնաժողովի նախագահ Ուրսուլա ֆոն դեր Լայենն այսօր սկսում են եռօրյա այցը Չինաստան:
Ելիսեյան պալատն ավելի վաղ մամուլին տեղեկացրել էր, որ ուկրաինական իրադարձությունները լինելու են Չինաստանի իշխանությունների հետ քննարկումների կենտրոնում։
Իր հերթին, ֆրանսիական դիվանագիտության ղեկավար Կատրին Կոլոննան օրեր առաջ նշել էր, որ Մակրոնը մտադիր է Չինաստանի ղեկավարությանը զգուշացնել Ռուսաստանին «ռազմական աջակցությունից զերծ մնալու» կարևորության մասին։
Հաղորդվում է նաև, որ Մակրոնի հետ Չինաստան կմեկնի ֆրանսիացի գործարարների մեծ պատվիրակություն։
«Սա իսկապես պատմական օր է, որովհետև շատ շուտով, ինչպես ասաց գլխավոր քարտուղարը, մենք կողջունենք Ֆինլանդիայի մուտքը դաշինք։ Ինձ մոտ գայթակղություն առաջացավ ասելու, որ սա հավանաբար միակ բանն է, որի համար մենք կարող ենք շնորհակալություն հայտնել Պուտինին», - Բրյուսելում ասել է ԱՄՆ-ի պետքարտուղար Էնթոնի Բլինքենը, դաշինքի գլխավոր քարտուղար Յենս Ստոլտենբերգի հետ կայացած մամուլի համատեղ ասուլիսում։
Բլինքենը Բրյուսելում հանդիպում է ունեցել նաև Ուկրաինայի արտգործնախարար Դմիտրի Կուլեբայի հետ։
Ռազմական դաշինքներին միանալու հարցում ավանդաբար չեզոք դիրքորոշում որդեգրած Շվեդիան և Ֆինլանդիան Ռուսաստանի Ուկրաինա ներխուժելուց հետո ՆԱՏՕ-ին միանալու հայտ ներկայացրեցին։
Շվեդիայի հայտը Թուրքիայի և Հունգարիայի կողմից վավերացվելու կարիք ունի, իսկ Ֆինլանդիան դառնում է ՆԱՏՕ-ի 31-րդ անդամը։
Այս գիշեր Օդեսայի վրա գրոհած 17 կամիկաձե անօդաչու թռչող սարքերից հակաօդային պաշտպանության ուժերը ոչնչացրել են 14-ը, որոնցից 13-ը՝ Օդեսայի շրջանի երկնքում, իսկ մեկը՝ Նիկոլաևի շրջանի, ասել է Օդեսայի շրջանային ռազմական վարչակազմի խոսնակ Սերգեյ Բրատչուկը:
Նրա խոսքով՝ անօդաչուներից մեկը հարվածել է Օդեսայի մարզում գտնվող ձեռնարկությանը, ինչի հետևանքով հրդեհ է բռնկվել, սակայն մինչև առավոտ փրկարարներին հաջողվել է մարել այն։ «Նախնական՝ առանց մարդկային կորուստների»,- հավելել է Բրատչուկը։
Ուկրաինայի զինված ուժերի «Հարավ» օպերատիվ հրամանատարության ներկայացուցչի փոխանցմամբ՝ խոսքը իրանական արտադրության «Շահեդ-136» և «Շահեդ-131» հարձակողական անօդաչուների մասին է։
Ռուսաստանի Բրյանսկի շրջանի նահանգապետ Ալեքսանդր Բոգոմազը, իր հերթին, հայտնել է Ուկրաինայի զինված ուժերի կողմից անօդաչու թռչող սարքերի կիրառմամբ հարձակումների մասին։
«Զոհեր չկան, պայթուցիկ սարքի արձակման հետևանքով վնասվել է շրջանային զինկոմիսարիատի շենքը», - երեկ իր Տելեգրամ ալիքում գրել է Բոգոմազը։
Սանկտ Պետերբուրգի սրճարանում պայթյունի գործը վերաորակվել է Ռուսաստանի քրեական օրենսգրքի 205-րդ հոդվածի 3-րդ մասով՝ «ահաբեկչական գործողություն», հաղորդում է ՌԴ քննչական կոմիտեն իր Telegram ալիքում։
«Հանցագործությունը կատարելու կասկածանքով բերման է ենթարկվել Դարյա Տրեպովան։ Նրա հետ կատարվում են անհրաժեշտ քննչական գործողություններ։ Հետաքննությունն ապացույցներ ունի, որ հանցագործության պլանավորումն ու կազմակերպումն իրականացվել է Ուկրաինայի տարածքից», - ասված է հաղորդագրությունում:
Քրեական գործն ի սկզբանե հարուցվել էր սպանության հատկանիշներով:
Սանկտ Պետերբուրգի սրճարանում ապրիլի 2-ին տեղի ունեցած պայթյունից զոհվել է Դոնբասի ռուս անջատական, նախկին զինյալ, բլոգեր և ռազմական լրագրող Վլադլեն Տատարսկին` Մաքսիմ Ֆոմինը:
Վերջին տվյալներով՝ տուժել է 40 մարդ, այդ թվում՝ 3 դեռահաս։ Սանկտ Պետերբուրգի հիվանդանոցներում այս պահին ստացիոնար բուժում է ստանում 25 մարդ, նրանցից 5-ի վիճակը գնահատվում է ծանր, հաղորդում է Ռուսաստանի առողջապահության նախարարությունը:
Ռուսաստանը Եվրամիությունը համարում է ոչ-բարեկամական կառույց, հայտարարել է արտգործնախարար Սերգեյ Լավրովը:
«Եվրամիությունը կորցրեց Ռուսաստանը: Բայց սրա համար ինքն է մեղավոր։ Ի վերջո, հենց ԵՄ անդամ երկրներն ու հենց Միության ղեկավարներն են բացահայտ հայտարարում Ռուսաստանին, ինչպես իրենք են ասում՝ ռազմավարական պարտություն հասցնելու անհրաժեշտության մասին։ Նրանք զենք-զինամթերքով են ապահովում Կիևի հանցավոր ռեժիմը, հրահանգիչներ և վարձկաններ են ուղարկում Ուկրաինա։ Այդ պատճառով մենք ԵՄ-ը համարում ենք ոչ-բարեկամական միություն»,- ասել է Ռուսաստանի ԱԳ նախարարը։
Նրա խոսքով, «ի պատասխան թշնամական քայլերի՝ Մոսկվան կգործի անհրաժեշտության դեպքում կոշտ, առաջնորդվելով Ռուսաստանի ազգային շահերով և դիվանագիտական պրակտիկայում ընդունված փոխադարձության սկզբունքով»։
Լավրովն ասել է, որ փոխվել է իր արտասահմանյան ուղևորությունների աշխարհագրությունը, և այժմ այն արտացոլում է «ռուսական առաջնահերթությունները միջազգային ասպարեզում», որոնք ամրագրված են արտաքին քաղաքականության նոր հայեցակարգում։
«Պուտինի հաղթանակը ողբերգություն կլինի Ուկրաինայի համար, վտանգավոր՝ ՆԱՏՕ-ի դաշնակիցների համար», - Հյուսիսատլանտյան ռազմական դաշինքի ղեկավար Յենս Ստոլտենբերգն այս մասին հայտարարեց «Ազատ Եվրոպա/Ազատություն ռադիոկայանին» տված բացառիկ հարցազրույցում։
Ուկրաինայում ավերիչ պատերազմի մեկնարկից 13 ամիս անց էլ ՆԱՏՕ-ի գլխավոր քարտուղարը վերահաստատում է՝ կշարունակեն աջակցել Ուկրաինային այնքան, որքան անհրաժեշտ կլինի։
Լրագրողի հարցին, թե արդյո՞ք հավատում է, որ Ուկրաինան կկարողանա ռազմական ճանապարհով ազատագրել Ղրիմը, և պատրա՞ստ են այդ հարցում ևս քաղաքական ու գործնական աջակցություն տրամադրել Կիևին, Ստոլտենբերգն արձագանքեց․ - «Մենք աջակցում ենք Ուկրաինայի ինքնապաշտպանության կամ Ուկրաինայի տարածքը պաշտպանելու իրավունքին, և մենք պատրաստ ենք աջակցել Ուկրաինային այնքան ժամանակ, որքան դա կպահանջվի»։
Թեև վերջին շաբաթներին ռուսական կողմն ակտիվ հարձակողական գործողություններ է իրականացնում Ուկրաինայի արևելքում միանգամից մի քանի ուղղություններով, Ուկրաինայի զինվորական ղեկավարությունը հայտարարում է առաջիկա շաբաթներին նոր հակահարձակման պլանների մասին։ Թե ինչով կպսակվեն Կիևի ծրագրերը, Ստոլտենբերգը խուսափեց կանխատեսումներ անել. - «Պատերազմներն իրենց էությամբ անկանխատեսելի են։ Կարծում եմ՝ հիմա ոչ ոք չի կարող հստակ ասել, թե ինչպես և երբ կավարտվի այս պատերազմը և ինչպես այն կզարգանա ընթացիկ տարում»:
Արևմտյան ռազմական դաշինքի ղեկավարը միևնույն ժամանակ հավաստիացրեց՝ այդ հակահարձակումը սկսելու համար ՆԱՏՕ-ի անդամ երկրները Ուկրաինային անհրաժեշտ օգնություն են տրամադրում։
Հարցին , թե որքանո՞վ է հավանական ներկայիս ճակատային գիծը սառեցնելու սցենարը, և ինչպե՞ս դա կազդի պատերազմի ընթացքի վրա, ՅԵնս Ստոլտենբերգը պատասխանեց՝ Կիևի դաշնակիցների պարտականությունն է թույլ չտալ նման սցենար։
«Քանի որ մենք կցանկանայինք, իհարկե, որպեսզի Ուկրաինան ի վիճակի լինի ազատագրել ավելի շատ տարածքներ և դուրս մղի նախագահ Պուտինի զինվորներին, և այդ ժամանակ դա կարող է ինչ-որ բանակցությունների համար պայմաններ ստեղծել։ Կրկին, Ուկրաինան է որոշողը, թե որոնք են ընդունելի պայմանները բանակցությունների համար, ինչն է ընդունելի արդյունքը: Բայց մենք գիտենք, որ այն, ինչ տեղի է ունենում բանակցային սեղանի շուրջ, անմիջականորեն կապված է մարտադաշտի հզորության հետ: Այնպես որ, եթե մենք ցանկանում ենք բանակցային լուծում, որի դեպքում Ուկրաինան հաղթանակ կտոնի որպես անկախ ինքնիշխան պետություն, ուրեմն մենք այսօր պետք է ռազմական աջակցություն ցուցաբերենք», - հայտարարեց ՆԱՏՕ-ի գլխավոր քարտուղարը:
Ռուսաստանի ՊՆ նախարար Սերգեյ Շոյգուն այսօր անցկացրած խորհրդակցությունում ասել է, որ Ֆինլանդիայի անդամակցումը ՆԱՏՕ-ին՝ հակամարտությունը ընդլայնելու ռիսկեր է ստեղծում, բայց հատուկ գործողության արդյունքի վրա ազդեցություն չի ունենա։
Ուկրաինա ներխուժելը, առանց առիթի սանձազերծած պատերազմը ռուսները «հատուկ գործողություն» են կոչում։