Վերջին 24 ժամվա ընթացքում ռուսական ուժերն ինտենսիվորեն հրթիռակոծում են Ուկրաինայի արևելյան շրջանները, ապրիլի 15-ի առավոտյան հայտնել է Ոկրաինայի զինված ուժերի գլխավոր շտաբը։
Դոնեցկի մարզում Բախմուտից արևմուտք ընկած Սլովյանսկ (Սլավյանսկ) ու Կրամատորսկ քաղաքների վրա նախօրեին տասներեք S-300 (С-300) հրթիռ է արձակվել։
Սլովյանսկում 6 հրթիռներն ընկել են բնակելի շենքի ու տների վրա։ Առնվազն 9 խաղաղ բնակիչ է զոհվել, շուրջ երկու տասնյակ վիրավորներ կան։
«Չարիքի պետությունը հերթական անգամ ցուցադրում է իր էությունը», - Տելեգրամի իր ալիքում գրել է Ուկրաինայի նախագահ Վլադիմիր Զելենսկին։
Ուկրաինայի զինված ուժերի գլխավոր շտաբը հայտնում է, որ Դոնեցկի մարզում Լիմանի, Բախմուտի, Ավդիևկայի և Մարյինկայի ուղղություններով ռուսական ուժերի 56 գրոհ հետ է մղվել։
BBC ռադիոկայանը, Медиазона կայքը և կամավոր հետաքննողները համատեղ անցկացրած հետազոտության արդյունքում հրապարակել են զեկույց, ըստ որի Ուկրաինայում ապրիլի կեսի դրությամբ զոհվել է առնվազն 20451 զինծառայող:
Ենթադրվում է, որ ամենածանր կորուստները ռուս-ուկրաինական պատերազմում ռուսները կրում են Բախմուտի շրջանում:
Ենթադրվում է, որ յուրաքանչյուր շաբաթվա ընթացքում ռուսները միջինը 700 զինծառայող են կորցնում: Պատերազմի առաջին տարվա ընթացքում շաբաթական կորուստների թիվը 250-ից 300 է եղել:
BBC-ն, Медиазона-ն և կամավոր հետաքննողները նշում են, որ իրենց տվյալներում ներառվում են միայն անուն-ազգանուններով հաստատված կորուստները, որոնց մասին տեղեկությունները կան բաց աղբյուրներում, ինչը նշանակում է, որ զոհերի իրական թիվը կարող է շատ ավելի մեծ լինել:
Պաշտոնապես չհաստատված տվյալներով, Ռուսաստանն Ուկրաինայում կարող էր այսօրվա դրությամբ կորցնել 41 հազար զինծառայող:
Միացյալ Նահանգների ռազմածովային վերլուծությունների կենտրոնի փորձագետների կարծիքով, Ուկրաինայում ռուսների ընդհանուր անդառնալի կորուստների թիվը (զոհվածներ, ծանր վիրավորներ և անհետ կորածներ) կարող է գերազանցել 184 հազարը:
Դոնեցկի և Լուգանսկի ինքնահռչակ կազմավորումների «ժողովրդական միլիցիայի» զինծառայողների կորուստները նշված զեկույցում ընդգրկված չեն:
Ռուսաստանի Հարավային զինտարածքի օդուժը Հայաստանում անցկացրած վարժանքի ընթացքում պայմանական հակառակորդի օդակայան է «ոչնչացրել»: Այդ մասին այսօր հայտնել է Հարավային զինտարածքի մամլո վարչությունը:
Վարժանքներին մասնակցել են Ми-8МТВ և Ка-52 տեսակի մարտական ուղղաթիռներ, ինչպես նաև МиГ-29 տեսակի մարտական ինքնաթիռ:
«Ուղղաթիռները կատարել են ուսումնական-մարտական թռիչքներ, որոնց ընթացքում «ոչնչացրել են» պայմանական հակառակորդի ավիացիոն տեխնիկան, օդակայանի ենթակառուցվածքը և թռիչքուղին: Ինքնաթիռն այդ ընթացքում ապահովել է ուղղաթիռները պայմանական հակառակորդի ՀՕՊ-ից պաշտպանելու խնդիրը, հրթիռներով հարվածներ է հասցրել օդակայանին և կապի միջոցներին», - ասվում է հաղորդագրությունում:
Բացի այդ, ուղղաթիռները և օդանավը կատարել են բարձր լեռնային պայմաններում տարբեր աստիճանի բարդության օդային մանևրեր:
Ուկրաինական «Նավթոգազը» հայտարարում է Ռուսաստանի նկատմամբ «էներգետիկ ճակատում» տարած հաղթանակի մասին։ Ուկրաինայի էներգետիկ հսկա ընկերությունը պնդում է, որ Հաագայի դատարանը Մոսկվային պարտավորեցրել է 5 միլիարդ դոլար վճարել Ղրիմում ընկերության ակտիվների անօրինական բռնագրավման համար։
«Այժմ Ռուսաստանը պետք է հետևի վճռին միջազգային իրավունքով ստանձնած պարտավորություններին համապատասխան»,- հայտարարել է «Նաթոգազի» գործադիր տնօրեն Ալեքսի Չերնիշովը։
Կրեմլի խոսնակ Դմիտրի Պեսկովն, արձագանքելով դատարանի վճռին, նշել է, որ Ռուսաստանը դեռ ուսումնասիրում է այն։
Ուկրաինայի զինված ուժերի գլխավոր շտաբի գլխավոր օպերատիվ վարչության պետի տեղակալ Օլեքսի Գրոմովը այսօր ասել է, որ ամենաբարդ ուղղությունը մնում է Բախմուտի ուղղությունը, որտեղ ռուսները շարունակում են հարձակողական գործողությունները Բախմուտ քաղաքի կենտրոնական հատվածում։
Պաշտպանության փոխնախարար Հաննա Մալիանիի պնդմամբ, ռուսները Բախմուտում ո'չ մարդկանց են խնայում, ո'չ էլ տեխնիկան. - «Թեև հակառակորդը Բախմուտում կենտրոնացրել է իր պրոֆեսիոնալ ստորաբաժանումները՝ ներառյալ «Վագներ» մասնավոր ռազմական ընկերության վարձկաններին, օդադեսանտային ստորաբաժանումները և հատուկ նշանակության ջոկատները, ռուսները չեն կարող այնտեղ հասնել իրենց նպատակներին, այսինքն՝ ամբողջությամբ վերահսկել Բախմուտ քաղաքը: Այսօր ռուսները այնտեղ հսկայական կորուստներ են կրում, և չնայած այս կորուստներին, նրանք կանգ չեն առնում»։
13 ամսից ավելի տևող այս պատերազմում Ռուսաստանը 110 հազար մարդ է կորցրել՝ սպանված և վիրավոր։ Ընդ որում, սրանք ռուսական կողմի տվյալներն են։
Այս մասին, հղում անելով ամերիկյան փաստաթղթերի արտահոսքին, այսօր գրել է New York Times-ը՝ շեշտելով, որ սրանք ռուսական հատուկ ծառայությունների տվյալներն են։
Փաստաթղթերից մեկում ասվում է, որ Ռուսաստանի անվտանգության դաշնային ծառայությունը մեղադրել է Ռուսաստանի ՊՆ-ին «Ուկրաինայում ռուսական կորուստները թաքցնելու» մեջ, քանի որ ռազմական գերատեսչությունն իր զեկույցներում հաշվի չի առնում Ռոսգվարդիայի, «Վագների» և չեչեն ստորաբաժանումների կորուստները։
Ռուսաստանյան իրավապահները պնդում են, որ բացահայտել են բլոգեր Վլադլեն Տատարսկու (Ֆոմինի) սպանության երկրորդ կազմակերպչին, որն, ըստ նրանց, «ահաբեկչությունից հետո Հայաստանի տարածքով մեկնել է Թուրքիա»:
ՌԴ Անվտանգության դաշնային ծառայությունը հայտարարել է, որ բացահայտել է ապրիլի 2-ին Սանկտ Պետերբուրգում ռազմական լրագրող Վլադլեն Տատարսկու սպանության կազմակերպիչներին։ Ըստ գերատեսչության՝ սպանության ետևում կանգնած են «Ուկրաինայի հատուկ ծառայությունները, դրանց գործակալները, այդ թվում՝ արտասահմանում թաքնված ռուսաստանյան ընդդիմության շարքերից»։
Ռուսաստանի ԱԴԾ տեղեկություններով՝ Տատարսկու սպանությունը Դարյա Տրեպովայի հետ միասին նախապատրաստել է Ուկրաինայի քաղաքացի Յուրի Դենիսովը:
«Տեղի ունեցած ահաբեկչությունից հետո ապրիլի 3-ին Յուրի Դենիսովը Հայաստանի տարածքով տարանցիկ թռիչքով մեկնել է Թուրքիա», - ասվում է գերատեսչության կայքում հրապարակված հաղորդագրությունում:
Նորվեգիայի արտգործնախարարությունը լրտեսության կասկածանքով երկրից արտաքսում է Ռուսաստանի դեսպանատան 15 աշխատակիցների։
«Կառավարությունը որոշում է կայացրել անցանկալի անձ հայտարարել ռուսաստանյան հետախուզության 15 աշխատակիցների, որոնք Նորվեգիայում աշխատել են դիվանագիտական քողի տակ։ Հետախուզության այդ սպաները պետք է մոտ ժամանակներս լքեն Նորվեգիայի տարածքը», - ասվում է պաշտոնական հաղորդագրությունում։
ՆԱՏՕ-ի անդամ Նորվեգիան սահմանակից է Ռուսաստանին:
Նորվեգիայի դիվանագիտության ղեկավար Անիկեն Հյուիտֆելդը հայտարարել է, որ այդ քայլը «կարևոր միջոց է՝ հակազդելու և նվազեցնելու ռուսական հետախուզության գործունեության շրջանակը երկրում, պաշպանելու Նորվեգիայի ազգային շահերը»:
Շվեյցարական UBS և Credit Suisse բանկերը սկսել են նախազգուշացնել ռուսաստանցի հաճախորդներին հաշիվները փակելու մասին, եթե նրանք հարկեր վճարեն Ռուսաստանի բյուջե: Այս մասին գրում է РБК-ն՝ հղում անելով իրավաբաններին ու շվեյցարական բանկային հատվածի աղբյուրին։
«Մեր փաստաբանական գրասենյակ են դիմել մոտ տասը հոգի, ովքեր մինչ այժմ ստացել են ոչ պաշտոնական հեռախոսազանգեր բանկի աշխատակիցներից՝ զգուշացում է եղել, որ եթե նրանք չդադարեն լինել Ռուսաստանում տեղակայված ընկերությունների սեփականատեր և շարունակեն հարկեր վճարել, բանկը ստիպված կլինի փակել նրանց հաշիվը», - ասել է LEOLEX իրավաբանական գրասենյակի կառավարիչ գործընկեր Ռոման Կուդինովը։
Մեկ այլ շվեյցարացի փաստաբան պնդում է, որ իր հաճախորդներն արդեն բախվել են հաշիվների արգելափակման՝ Ռուսաստանի բյուջե հարկերի վճարման պատճառով։
Շվեյցարիան ավելի վաղ միացել է Ռուսաստանի դեմ Ուկրաինա լայնամասշտաբ ներխուժումից հետո Եվրամիության սահմանած պատժամիջոցներին։ Շվեյցարական ֆինանսական հաստատություններին արգելվում է ավանդներ ընդունել ռուս ֆիզիկական և իրավաբանական անձանցից, եթե մեկ ավանդատուի համար ավանդների գումարը գերազանցում է 100 հազար շվեյցարական ֆրանկը:
Նոյեմբերի 25-ի դրությամբ Շվեյցարիայի իշխանությունները սառեցրել են 7,5 մլրդ շվեյցարական ֆրանկ (7,89 մլրդ դոլար) ռուսական ակտիվներ։ Բացի ֆինանսների սառեցումից, Շվեյցարիայի իշխանությունները բռնագրավել են պատժամիջոցների տակ գտնվող ռուսաստանցիների վերագրվող 15 անշարժ գույք։
ԱՄՆ առևտրի նախարարությունը որոշել է արտահանման սահմանափակումներ մտցնել 28 կազմակերպությունների համար: Ռուսաստանյան, չինական, թուրքական ընկերությունների շարքում է հայտնվել նաև հայաստանյան մեկ ընկերություն:
Ամերիկյան վարչակազմը պնդում է, որ այդ կազմակերպությունները ներգրավված են «Միացյալ Նահանգների ազգային անվտանգության և արտաքին քաղաքական շահերի դեմ ուղղված գործունեության մեջ»:
Ընկերությունները հայտնվել են «սև ցուցակում» «արտահանման վերահսկողությունը շրջանցելու և ամերիկյան արտադրանք գնելու կամ գնելու փորձի համար՝ Ռուսաստանի ռազմական և/կամ պաշտպանական արդյունաբերական բազային աջակցելու նպատակով»:
Ներդրվող սահմանափակումների արդյունքում մատակարարները չեն կարողանա ամերիկյան ապրանքներ ուղարկել ԱՄՆ առևտրի նախարարության պատժամիջոցների տակ գտնվող իրավաբանական անձանց՝ առանց նախապես հատուկ լիցենզիա ստանալու։ Միաժամանակ, լիցենզիայի հայտերը քննարկելիս կգործի «մերժման կանխավարկած», այսինքն՝ ամենայն հավանականությամբ, նման դիմումները կմերժվեն։
Ռուսները շարունակում են գրոհել ուկրաինական դիրքերը Դոնբասում։
Պատերազմի ուսումնասիրման ամերիկյան ինստիտուտի տվյալներով, ռուսական ուժերն այժմ վերահսկում են Բախմուտի տարածքի 76,5 տոկոսը, ռուսները սակայն պնդում են, թե վերահսկում են քաղաքի առնըվազն 86,1 տոկոսը։
Ուկրաինական կողմը, Բախմուտը պաշտպանելու հետ մեկտեղ, նախապատրաստվում է հակահարձակման։ Այն հայտարարված էր գարնանը, սակայն պաշտոնական Կիևը չի հնչեցրել հակահարձակման ո'չ կոնկրետ ժամկետը, ո'չ էլ պլանը։