Երեկ երեկոյան Բելգորոդում պայթյուն է որոտացել։ Ռուսաստանի պաշտպանության նախարարությունը հաղորդել է, որ ռուսական Սու-34 ռազմական ինքնաթիռից զինամթերք է ընկել։
«Ապրիլի 20-ին՝ Մոսկվայի ժամանակով մոտավորապես ժամը 22:15, Բելգորոդ քաղաքի վրայով օդատիեզերական ուժերի Սու-34 ինքնաթիռի թռիչքի ժամանակ տեղի է ունեցել ավիացիոն զինամթերքի չպլանավորված վայրէջք», - հայտնել են գերատեսչությունից։
Պայթյունի հետևանքով քաղաքի կենտրոնում երկու կին վիրավորվել է, բնակելի շենքեր են վնասվել։
Աշխարհի 7 առաջատար տերությունների ներկայացուցիչները դիտարկում են Ռուսաստան ապրանքների արտահանման գրեթե ամբողջական արգելք սահմանելու հնարավորությունը, հաղորդում է «Կիոդո» ճապոնական գործակալությունը՝ հղում անելով Ճապոնիայի կառավարության իր աղբյուրներին։
Bloomberg-ը նույնպես, վկայակոչելով իր աղբյուրները, հայտնել է, որ ԱՄՆ-ն ու Ուկրաինայի մյուս դաշնակիցները քննարկում են «Ռուսաստան արտահանումների մեծ մասի ուղղակի արգելքը»։ Հաղորդագրության համաձայն՝ Մեծ յոթնյակի պաշտոնյաներն այդ հարցի շուրջ քննարկումներ են անցկացնում մայիսին Ճապոնիայում կայանալիք G7-ի գագաթնաժողովից առաջ։
Ենթադրվում է, որ եթե G7-ը հաստատի դա, նմանատիպ արգելող միջոցներ կներդրվեն նաև Եվրամիության անդամ երկրների կողմից։
Այս գիշեր Ուկրաինայի տարածքի զգալի մասում օդային տագնապ է հայտարարվել: Ուկրաինական կողմը հաղորդում է, որ պատճառը ռուսական զինուժի անօդաչու թռչող սարքերի հերթական գրոհն է՝ հիմնականում իրանական արտադրության «Շահիդ»-ների։
Մասնավորապես, 25-օրյա ընդմիջումից հետո առաջին անգամ հարձակման է ենթարկվել Ուկրաինայի մայրաքաղաքը։ Կիևի քաղաքային իշխանությունների տվյալներով՝ 8 անօդաչու թռչող սարք հայտնաբերվել և խոցվել է հակաօդային պաշտպանության ուժերի կողմից։ Նախնական տվյալներով՝ հարձակման հետևանքով զոհեր և ավերածություններ չկան։
Միաժամանակ, ինչպես հայտնել է Պոլտավայի շրջանի վարչակազմը, անօդաչու թռչող սարքի հարվածով շրջանում ոչնչացվել է քաղաքացիական ենթակառուցվածքային օբյեկտ։ «Փրկարարներն աշխատում են կրակը մարելու ուղղությամբ: Նախնական տվյալներով զոհեր չկան»,- իր Telegram ալիքում գրել է շրջանի ղեկավար Դմիտրի Լունինը։
Ուկրաինայի զինված ուժերի գլխավոր շտաբն այսօր առավոտյան իր հաղորդագրությունում հայտնում է, որ ընդհանուր առմամբ Ռուսաստանը գիշերն Ուկրաինա է արձակել մոտ 10 «Շահեդ-136» անօդաչու թռչող սարք, դրանցից 8-ը խոցվել է։ Ընդհանուր առմամբ, վերջին մեկ օրվա ընթացքում ռուսները 23 ավիահարված են հասցրել Ուկրաինայի տարածքում, հայտնում է Ուկրաինայի ԶՈՒ գլխավոր շտաբը։
Կիևի քաղաքային խորհուրդը խզել է հողի վարձակալության պայմանագիրն Ուկրաինայում Ռուսաստանի Դաշնության դեսպանատան հետ: Այդ մասին հայտնել է Կիևի քաղաքապետ Վիտալի Կլիչկոն:
Որոշումն ընդունվել է քվեարկությամբ: Առաջարկին կողմ են քվեարկել մայրաքաղաքի օրենսդիր մարմնի 120 պատգամավորներից 73-ը:
Կիևի քաղաքային խորհրդի պատգամավորները դիմել են Ուկրաինայի կառավարությանը ռուսաստանյան դիվանագիտական ներկայացուցչության գույքը պետականացնելու առաջարկով:
Ուկրաինայում Ռուսաստանի դեսպանությունը 2022 թվականի փետրվարի 24-ից՝ Ուկրաինա ռուսների ռազմական հարձակման օրվանից փակ է:
Կիևում շարունակվում է խորհրդային և ռուսաստանյան անուններից և խորհրդանիշներից հրաժարվելու գործընթացը: Պատերազմի մեկնարկից հետո Կիևում 288 օբյեկտներ նոր անուններ են ստացել:
Ուկրաինայի մայրաքաղաքում մտադիր են վերանվանել մոտ կես հազար փողոցներ, մետրոյի մի քանի կայարաններ և ապամոնտաժել 6 տասնյակ արձաններ ու հուշատախտակներ: Նման գործընթացներ են իրականացվում նաև Ուկրաինայի այլ քաղաքներում:
Թուրքիան մտադիր չէ միանալ Ռուսաստանի նկատմամբ առանձին երկրների սահմանած պատժամիջոցներին, սակայն պարտավորված կլինի հետևել սահմանափակող որոշումներին, եթե դրանք մտցվեն ՄԱԿ-ի որոշմամբ: Այդ մասին այսօր Անթալիայի մարզում գտնվող Ալանիա ծովափնյա քաղաքում ասել է Թուրքիայի արտաքին գերատեսչության ղեկավար Մևլյութ Չավուշօղլուն:
«Մենք ՆԱՏՕ-ի ամենահզոր երկրների հնգյակում ենք, բայց պետք է մտածենք մեր ազգային շահերի մասին: Ենթադրենք, ես միացա Ռուսաստանի դեմ պատժամիջոցներին, բա այդ դեպքում Ալանիայի առևտրականներն ինչպե՞ս են Ռուսաստանում վաճառելու իրենց ապրանքը: Սակայն, եթե պատժամիջոցները ՄԱԿ-ը սահմանի, ապա այո, այդ դեպքում ես պարտավորված կլինեմ դրանց հետևել»,- ասել է Չավուշօղլուն:
Նրա փոխանցմամբ, նպատակահարմար չէ անտեսել սեփական երկրի շահերն ամենից բարձր դասելու սկզբունքը և միանալ առանձին պետությունների կողմից սահմանված պատժամիջոցներին, անկախ այն բանից՝ արդար են դրանք, թե անարդար:
Հյուսիսատլանտյան դաշինք Ուկրաինայի մուտքի կանխումը մնում է «հատուկ ռազմական գործողության» նպատակներից մեկը: Այդ մասին այսօր ասել է Կրեմլի խոսնակ Դմիտրի Պեսկովը:
«Անկասկած դա {ՆԱՏՕ-ին Ուկրաինայի միանալը} լուրջ և էական սպառնալիք կստեղծի մեր երկրի անվտանգության համար»,- ասել է խոսնակը:
Անդրադառնալով Կիև ՆԱՏՕ-ի գլխավոր քարտուղար Յենս Ստոլտենբերգի այսօր կատարած այցին, Պեսկովը նշել է, որ Մոսկվայում դրա կապակցությամբ չեն գնահատում ՆԱՏՕ-ին միանալու Ուկրաինայի հեռանկարը:
Ավելի վաղ ՆԱՏՕ-ի մի անանուն ներկայացուցիչ ասել է, որ Ստոլտենբերգի Կիև կատարած այցի ընթացքում կքննարկվեն ապրիլի 21-ին Գերմանիայում՝ Ռամշտայնի ամերիկյան ռազմակայանում նախատեսված շփման խմբի նիստին առնչվող հարցեր:
Ռամշտայնի խումբը կարգավորում է ՆԱՏՕ-ի երկրների կողմից Ուկրաինային զենք ու զինամթերք տրամադրելու գործընթացը:
ՆԱՏՕ-ի գլխավոր քարտուղար Յենս Ստոլտենբերգը նախապես չհայտարարված այցով ժամանել է Կիև:
Ուկրաինայի մայրաքաղաքի Միխայլովյան հրապարակում տեղադրված հուշարձանի մոտ Ստոլտենբերգը հարգանքի տուրք է մատուցել ռուսների դեմ պատերազմում զոհված ուկրաինացի զինծառայողների հիշատակին, ապա այցելել է խոցված ռուսական զինտեխնիկայի բացօթյա ցուցահանդես:
Ուկրաինայի ղեկավարների հետ Ստոլտենբերգի բանակցությունների օրակարգի մասին տեղեկություններ չկան:
Այցից քիչ առաջ նա հայտարարել է, որ Հյուսիսատլանտյան դաշինքը կշարունակի սատարել Ուկրաինային՝ չնայած միջուկային զենք կիրառելու հնարավորության մասին Կրեմլի հնչեցրած ակնարկներին:
«Ռուսաստանն անմիջական սպառնալիք է մեր անվտանգության համար», - ասել է Ստոլտենբերգը:
ԱՄՆ-ում Բելառուսի քաղաքացի է ձերբակալվել, ով մեղադրվում է հակառուսական պատժամիջոցները շրջանցելու համար՝ ի շահ գործարար Սերգեյ Կուրչենկոյի, հայտնում է Միացյալ Նահանգների արդարադատության նախարարությունը։ Սերգեյ Կարպուշկինին մեղավոր ճանաչվելու դեպքում սպառնում է մինչև 20 տարվա ազատազրկում։
«Բելառուսի քաղաքացի 46-ամյա Սերգեյ Կարպուշկինը՝ Մայամիից, ձերբակալվել և դաշնային քրեական դատարանի կողմից մեղադրվել է օլիգարխ Սերգեյ Կուրչենկոյի և նրա հետ կապված երկու ընկերությունների դեմ ԱՄՆ պատժամիջոցները խախտելու սխեմային մասնակցելու համար», - ասված է գերատեսչության հաղորդագրությունում։
Արդարադատության նախարարության տվյալներով՝ Կարպուշկինը և Ֆլորիդայի բնակիչ Ջոն Ունսալանը երեք տարի շարունակ մասնակցել են «օլիգարխ Սերգեյ Կուրչենկոյի նկատմամբ ԱՄՆ պատժամիջոցները շրջանցելու սխեմային»։ Հետաքննությունը կարծում է, որ նրանք գնել են 150 միլիոն դոլարի մետաղի արտադրության նյութեր «Կուրչենկոյի հետ կապված» երկու ընկերությունների համար։
Ամերիկյան արտադրության Patriot ՀՕՊ պաշտպանության համակարգերը արդեն իսկ Ուկրաինայում են։ Այդ մասին ապրիլի 19-ին տեղեկացրել է Ուկրաինայի պաշտպանության փոխնախարար Ալեքսանդր Պավլյուկը։
Նրա պնդմամբ՝ խոսքը այն Patriot համակարգերի մասին է, որոնք Կիևին են փոխանցել Միացյալ Նահանգները, Գերմանիան և Նիդերլանդները։
Բեռլինը նախօրեին էր պաշտոնապես հաստատել, որ խոստացված Patriot համակարգերից մեկը արդեն իսկ փոխանցվել է Ուկրաինային։
Ռուսաստանի նախագահ Վլադիմիր Պուտինը չորեքշաբթի օրը Մոսկվայում կայացած խորհրդակցության ժամանակ հաստատել է, որ օրերս մեկնել էր Խերսոնի և Լուգանսկի մարզեր։
Ռուսաստանի նախագահի խոսքով, ինքը անձամբ էր ժամանել այստեղ տեղակայված ռուսական զորքերի շտաբներ՝ «զինվորականներին գործից չկտրելու համար»։