Ռուսաստանի Կալուգայի մարզում կիրակի վաղ առավոտյան երկու անօդաչու թռչող սարք է ընկել, հայտնել է մարզի նահանգապետ Վլադիսլավ Շապշան Telegram -ում։
Մի անօդաչու թռչող սարքն ընկել է Ստրելկովկա գյուղի մոտ, մյուսը՝ Մեդինսկի մունիցիպալ շրջանի անտառում։
Ըստ նախնական տեղեկությունների՝ զոհեր և վիրավորներ չկան, միայն նվազագույն ավերածություններ են, ասել է Շապշան։
Կալուգայի շրջանը հյուսիսից սահմանակից է Մոսկվայի մարզին։
«Հակահարձակման հարցում մեր գեներալները դրական են տրամադրված», - այսօր Կիևում հայտարարել է Ուկրաինայի նախագահ Վլադիմիր Զելենսկին՝ պնդելով, թե ամենօրյա կապի մեջ է երկրի Զինված ուժերի հրամանատարների՝ մասնավորաբար գլխավոր հրամանատար Զալուժնու և ցամաքային ուժերի ղեկավար Սիրկսու հետ։
Մեկնաբանելով սոցիալական ցանցերում շրջանառվող լուրերն, ինչպես նաև Ռուսաստանի նախագահի երեկվա հայտարարությունները, որոնց համաձայն ուկրաինական հակահարձակման մեկնարկը այնքան էլ հաջող չի ընթանում, Զելենսկին նշել է. - «Տելեգրամ ալիքներին և Պուտինին ես չէի վստահի։ Այս պահին Ուկրաինան հակահարձակվողական պաշտպանական գործողություններ է իրականացնում։ Ինչ փուլում են դրանք գտնվում՝ մանրամասնել չէի ցանկանա»։
Կանադայի վարչապետ Ջասթին Թրյուդոն անակնկալ այցով ժամանել է Կիև։
Կանադայի հանրային ռադիոյի փոխանցմամբ` նախապես չազդարարված ուղևորության ընթացքում կառավարության ղեկավարին ուղեկցում է երկրի ֆինանսների նախարար, ծագումով ուկրաինուհի Խրիստյա Ֆրիդլանդը։
«Կիև ժամանելուն պես Թրյուդոն այցելել է 2014 թվականից Ռուսաստանի դեմ կռիվներում զոհված ուկրաինացի զինծառայողների պատվին կառուցված հուշահամալիր», - հաղորդում է Reuters գործակալությունը:
Ռուսաստանի նախագահ Վլադիմիր Պուտինը հայտարարել է ուկրաինական հակահարձակման մեկնարկի մասին, ինչի մասին, ըստ նրա, վկայում է Ուկրաինայի զինված ուժերի կողմից ռազմավարական ռեզերվների օգտագործումը։
Ռուսաստանի նախագահը նաև հայտարարել է, որ Ուկրաինայի զինված ուժերը ոչ մի հատվածում հաջողությունների չեն հասել՝ «մեր զինվորների խիզախության, զորքերի ճիշտ կազմակերպման շնորհիվ»։
Անցած մեկ օրվա ընթացքում հեղեղված Խերսոնի մարզում ռուսական գնդակոծության հետևանքով երկու մարդ զոհվել է, 17-ը՝ վիրավորվել, հայտնել է մարզային վարչակազմի ղեկավար Ալեքսանդր Պրոկուդինը՝ հավելելով, որ շրջանը ենթարկվել է 44 գրոհի։
Երկու օր առաջ Կախովկայի հիդրոէլեկտրակայանի ամբարտակի ճեղքման պատճառով առաջացած ջրհեղեղի հետևանքով չորս մարդ է զոհվել, 13-ը անհետ կորել են, հայտնել է Ուկրաինայի ներքին գործերի նախարարությունը։ Օկուպացված տարածքների ռուսական իշխանությունները հայտնում են ութ զոհի մասին։ Ավելի քան 2300 մարդ տարհանվել է։ Ռուսական կողմը հայտնում է տասնյակ հազարավոր մարդկանց տարհանման մասին։
Մինչդեռ ուկրաինական կողմը պնդում է, թե ռուսները առանց օգնության են թողել աղետի գոտում հայտնված իրենց վերահսկողության տակ գտնվող տարածքների բնակիչներին
ԱՄՆ-ի նախագահ Ջո Բայդենը և Բրիտանիայի վարչապետ Ռիշի Սունակը Վաշինգտոնում հայտարարել են, որ Ուկրաինային ցուցաբերող աջակցությունը չի թուլանա։
Բրիտանիայի վարչապետն ընդգծել է, որ Ուկրաինայի աջակիցները պետք է հստակ ազդանշան տան Ռուսաստանի նախագահ Վլադիմիր Պուտինին, որ նա իզուր չսպասի Ուկրաինային տրամադրվող օգնության դադարեցմանը։
Վորոնեժի Բելինսկի փողոցում, նախնական տվյալներով, անօդաչու թռչող սարք է ընկել, տեղում աշխատում են հատուկ ծառայությունները, հայտնել է շրջանի նահանգապետ Ալեքսանդր Գուսևը։
Նա ասել է, որ միջադեպի հետևանքով տուժել է առնվազն երկու մարդ։
Telegram ալիքներն ավելի վաղ հայտնել էին, որ պայթուցիկներով բեռնված անօդաչու թռչող սարքը մխրճվել է բնակելի շենքի մեջ։ Տեղի բնակիչները պայթյունի ձայն են լսել։
Առողջապահության համաշխարհային կազմակերպությունը (ԱՀԿ) առաջին անհրաժեշտության պարագաներ է տրամադրել Կախովկա ՀԷԿ-ի ամբարտակի պայթեցմանը հաջորդած ջրհեղեղից տուժած շրջանների բնակիչներին։
ԱՀԿ-ի գլխավոր քարտուղար Թեդրոս Գեբրեյեսուսը նախազգուշացրել է ջրհեղեղի բացասական ազդեցության մասին տարածաշրջանի ջրամատակարարման, սանիտարական և առողջապահական համակարգերի վրա:
ԱՀԿ-ի փորձագետներն աղետի գոտիներում խոլերայի հարուցիչ են հայտնաբերել, հայտնում է Reuters-ը։
Այս գիշեր օդային տագնապ է հայտարարվել ողջ Ուկրաինայում, այդ թվում՝ առաջնագծից հեռու արևմտյան շրջաններում։
Հետևանքների վերաբերյալ պաշտոնական մեկնաբանություններ դեռևս չկան։
Ռուսաստանի Բելգորոդի շրջանի ղեկավարի խոսքով՝ վերջին 24 ժամում Ուկրաինայից զանգվածային գնդակոծության է ենթարկվել շրջանի տարածքը և, մասնավորապես, շրջկենտրոնը։
Այս գիշեր երեք մարդ վիրավորվել է, նրանք գտնվում են հիվանդանոցում, հայտնել է շրջանի ղեկավար Վյաչեսլավ Գլադկովը Telegram-ի իր ալիքում։
Ուկրաինայի իշխանությունները բազմիցս հերքել են, որ կրակում են ռուսական տարածքի վրա։
Թե ով է պայթեցրել ՀԷԿ-ը, հստակ տվյալներ դեռ չկան։ Արևմտյան մամուլը գրել է, թե ամերիկյան հետախուզությունը ունի տվյալներ, որ դա արել են ռուսները՝ ուկրաինական հակահարձակումը կանգնեցնելու նպատակով, սակայն ապացույցներ դեռ չեն հրապարակվել։ Պաշտոնական Վաշինգտոնը միևնույն ժամանակ ասում է, որ եթե Ռուսաստանը լայնամասշտաբ ռազմական ներխուժում չսկսեր, ապա ողբերգությունը տեղի չէր ունենա։
«Այս ամբարտակը ռուսների հսկողության տակ էր, և նրանք են պատասխանատու պատերազմի հետևանքով առաջացած ավերածությունների համար», - ասել է Սպիտակ տան մամուլի խոսնակը։
Աղետը, որի ծավալները դեռ վերջնականապես չեն հաշվարկել, չի կանգնեցրել ո'չ ռուսական ռմբակոծությունները, ո'չ էլ ուկրաինական հակահարձակումը։ Առնվազն մեկ կին մահացել է, ևս երկու մարդ վիրավորվել է այսօր Խերսոնի հրետակոծության հետևանքով, հայտնում է Ուկրաինայի ՆԳՆ-ն՝ ընդգծելով, թե գնդակոծությունը սկսվել է քաղաքացիների տարհանման ժամանակ։
Ընդ որում, ուկրաինական հաղորդագրությունների համաձայն, ռուսական զորքերը ամբողջությամբ թողել են ջրհեղեղից տուժած շրջանները և այնտեղ մնացած մարդկանց տարհանում են ուկրաինացի փրկարարները։