Ադրբեջանի պաշտպանության նախարարությունը հայտարարում է, որ պատասխան կրակ է բացել Սյունիքում տեղակայված հայկական դիրքերի ուղղությամբ:
«Ապրիլի 18-ին, մոտավորապես 22:35-ին Հայաստանի զինված ուժերի՝ Գորիսի շրջանում տեղակայված ստորաբաժանումները թեթև զինատեսակներից կրակ են բացել ադրբեջանական բանակի դիրքերի ուղղությամբ։ Ադրբեջանական բանակը համարժեք պատասխան քայլեր է ձեռնարկել նշված դիրքերի ուղղությամբ»,- հայտարարում է Բաքուն։
Հայկական կողմն իր դիրքերի ուղղությամբ կրակոցների մասին չի հաղորդել, սակայն հերքել է հրադադարը խախտելու՝ Ադրբեջանի ռազմական գերատեսչության պնդումը:
«Պաշտպանության նախարարությունը վերահաստատում է, որ ՀՀ վարչապետի աշխատակազմի դիրքորոշմանը համապատասխան՝ պատրաստ է հետաքննել Ադրբեջանի ՊՆ հաղորդագրությունը հիմնավորող փաստերը՝ դրանք ՀՀ-ին փոխանցելու պարագայում»,- նշված է հաղորդագրությունում։
Պաշտպանության նախարարությունը դարձյալ հիշեցրել է հրադադարի խախտման դեպքերի հետաքննության Հայաստան-Ադրբեջան համատեղ մեխանիզմ ստեղծելու առաջարկը, ինչին Ադրբեջանը չի արձագանքում:
Երեկ Սյունքի մարզի Խնածախի բնակիչներն «Ազատությանը» պատմել էին, որ նախորդ գիշերը ադրբեջանական կողմից առավել ինտենսիվ կրակոցների ձայներ են լսել:
