Մայիսի 11-ի ուժգին քամին Երևանում փոշու ամպեր բարձրացրեց, հատկապես մայրաքաղաքի բազմաթիվ շինհրապարակների մոտակայքում էր վիճակը վատ: Փակ պատուհանների հետևից երևանցիները տեսանկարահանել են որևէ կերպ չփակված կառուցվող շենքերից ելնող և տեսադաշտը փակող փոշու քուլաները:
Սա եզակի դեպք չէ. Երևանում ամեն քամու հետ օդի աղտոտվածություն ու փոշին իրենց խիստ զգացնել են տալիս. «Հետք»-ն է հաշվել, որ նախորդ տարվա մեծ մասը՝ ավելի քան 10 ամիս, փոշու պարունակությունն օդում նորմայից բարձր է եղել: Երևանի փողոցներում արված փոքրիկ հարցման մասնակիցները ևս ասում են՝ փոշին շատ է:
Քաղաքապետարանի աշխատակազմի բնապահպանության վարչության պետի տեղակալ Գորիկ Ավետիսյանի խոսքով՝ մայիսի 11-ի փոշին կարճատև քամու հետևանքով էր, որն օդ բարձրացրեց Երևանում շինհրապարակների և 15-ից ավելի բաց հանքերի փոշին: Հանքերի վրա, Ավետիսյանն ասում է, քաղաքային իշխանությունները մեծ ազդեցություն չունեն, իսկ կառուցապատողների դեպքում նախատեսում են տուգանքները խստացնել, թեև օրենքը հիմա մանրամասն նկարագրում է, ինչպես պիտի շինհրապարակ կահավորված լինի:
Մանրամասները՝ «Ազատության» ռեպորտաժում.
