Պենտագոնն ԱՄՆ օրենսդիրներին մանրամասներ է ներկայացրել, թե ինչպես է պատրաստվել ու իրականացվել Իրանի երեք միջուկային օբյեկտների վրա հարձակումը: Չնայած զինվորականները որոշ նոր տեղեկություններ են տրամադրել, ըստ ամերիկյան լրատվամիջոցների, որևէ նոր ապացույց չի ներկայացվել, թե որքան արդյունավետ է եղել գործողությունը Իրանի միջուկային ծրագիրը ոչնչացնելու առումով:
Պաշտպանության նախարար Փիթ Հեգսեթը, անդրադառնալով դիտարկմանը, թե տեղեկություններ կան, որ Իրանը հարձակումից առաջ Ֆորդոյի օբյեկտից այլ վայր է տեղափոխել բարձր հարստացված ուրանը, ասել է, որ նման տեղեկության չի տիրապետում:
«Ես տեղյակ չեմ որևէ հետախուզական տեղեկության մասին, որն ուսումնասիրել եմ և որում ասվում է, որ ինչ-որ բան այնտեղ չի եղել, որտեղ պետք է լիներ, տեղաշարժվել է կամ այլ բան», - նշել է Հեգսեթը։
Պենտագոնի բրիֆինգին մասնակցած հանրապետական սենատոր Թոմ Քոթթոնն ասել է, որ անկասկած ԱՄՆ-ն մեծ հարված է հասցրել Իրանի միջուկային ծրագրին, ինչը տարիներ շարունակ ավելի անվտանգ կդարձնի թե՛ Ամերիկան, թե՛ ողջ աշխարհը։
«Կարծում եմ՝ մենք աղետալի վնաս ենք հասցրել Իրանի միջուկային ծրագրին: Դա, իհարկե, չի նշանակում, որ նրանք չեն կարող փորձել այն վերականգնել որոշ ժամանակ անց», - ընդգծել է սենատորը:
Դեմոկրատ սենատոր Քրիս Մերֆին էլ ասել է, որ դատելով այն ամենից, ինչ ներկայացրել են Պենտագոնի ներկայացուցիչները, Իրանի ծրագիրը կարծես միայն մի քանի ամսով է հետ մղվել, սակայն չի ոչնչացվել, ինչպես հայտարարում է ԱՄՆ ղեկավարությունը:
«Անկասկած, ծրագրին վնաս է հասցվել, բայց պնդումները, թե ոչնչացրել ենք այն, պարզապես չեն հիմնավորվում: Չեմ կարծում, որ նախագահը ճշմարտությունն էր ասում, երբ պնդում էր, որ ծրագիրը ոչնչացվել է … դեռ զգալի հնարավորություններ մնում են», - ասել է Մերֆին։
CNN-ը, հղում անելով իրազեկ չորս աղբյուրի, գրում է, որ ԱՄՆ վարչակազմը գաղտնի բանակցում է, որպեսզի Իրանին վերադարձնի բանակցությունների սեղանին: Այդ նպատակով, ըստ լրատվամիջոցի, Վաշինգտոնը մտադիր է մեղմել պատժամիջոցները, Իրանին տրամադրել սառեցված միջոցների մի մասը, որոնք Թեհրանը պետք է օգտագործի խաղաղ նպատակներով միջուկային էներգիայի արտադրության համար:
Սակայն Իրանի արտգործնախարար Աբբաս Արաղչին ասել է, որ այժմ ԱՄՆ-ի հետ հանդիպելու ծրագիր չունեն և հերքել է ԱՄՆ նախագահի հայտարարությունը, թե Վաշինգտոնի և Թեհրանի միջև հաջորդ շաբաթ բանակցություններ են նախատեսված
«Բանակցությունները վերսկսելու վերաբերյալ որևէ համաձայնություն այս պահին ձեռք չի բերվել։ Հստակ հայտարարում եմ, որ որևէ խոստում չի տրվել, և մենք ընդհանրապես չենք խոսել բանակցությունների վերսկսման մասին», - հայտարարել է Արաղչին։
Այս ֆոնին Իրանի Սահմանադրական խորհուրդը հավանություն է տվել Ատոմային էներգիայի միջազգային կազմակերպության հետ համագործակցությունը դադարեցնելու ծրագրին, որ օրեր առաջ հաստատել էր խորհրդարանը՝ պատճառաբանելով, որ գործակալությունը չի դատապարտել Իսրայելի ու ԱՄՆ-ի հարվածներն երկրի միջուկային օբյեկտներին:
Իսրայելի և Իրանի միջև հաստատված հրադադարից մի քանի օր անց Իսրայելի վարչապետ Բենյամին Նեթանյահուն հայտարարել է, որ Իրանի նկատմամբ հաղթանակը խաղաղության դռներ է բացում, որն Իսրայելը չպետք է վատնի. - «Մենք ուժով պայքարել ենք Իրանի դեմ և մեծ հաղթանակի ենք հասել։ Այդ հաղթանակը հնարավորություն է բացում խաղաղության համաձայնագրերի էական ընդլայնման համար։ Մենք եռանդուն աշխատատանք ենք տանում այդ ուղղությամբ»:
BBC-ի փոխանցմամբ՝ այս ընթացքում Իրանում ձերբակալությունների ալիք է սկսվել: Իսրայելի հետախուզական գործակալությունների հետ կապերի մեջ կասկածվող բազմաթիվ մարդկանց մահապատժի են ենթարկել: Իրանի նախագահն Ադրբեջանի պաշտոնակցին հորդորել է հետաքննել հաղորդումները, ըստ որոնց՝ պատերազմի օրերին իսրայելական անօդաչուներն ու ինքնաթիռները կարող էին Իրանի օդային տարածք մտնել Ադրբեջանի տարածքով։
Ըստ IRNA գործակալությա՝ Իլհամ Ալիևն ափսոսանք է հայտնել Իսրայելի հարձակումների և դրանց հետևանքով քաղաքացիական բնակչության շրջանում զոհերի կապակցությամբ և վերահաստատել, որ Ադրբեջանը հարգում է Իրանի ինքնիշխանությունն ու տարածքային ամբողջականությունը:
