Լոռու մարզի Ջրաշեն գյուղում 40 օրական Նարինե Խաչատրյանի մահվան փաստով Սպիտակի քննչական բաժնում հարուցվել է քրեական գործ:
Ըստ Քննչական կոմիտեի տարածած տեղակատվության, նոյեմբերի 16-ին «Սպիտակի բժշկական կենտրոն» տեղափոխված նորածնին բժիշկները օգնություն չեն ցուցաբերել, չեն կատարել իրենց մասնագիտական պարտականությունները, ինչը հանգեցրել է երեխայի մահվան:
Խաչատրյանների երիտասարդ ընտանիքը մինչև օրս բնակվում է փայտե տնակում, Նարինեն նրանց երրորդ երեխան էր: Հայրը՝ Կարենը պատմեց, որ քնելուց առաջ երեխան որևէ գանգատ չի ունեցել, լուսադեմին են միայն նկատել, որ դժվար է շնչում, ու անմիջապես երեխային տարել Սպիտակի հիվանդանոց:
Այստեղ, Կարենի խոսքով, որևէ օգնություն չեն ստացել․ պարզվել է, որ ողջ հիվանդանոցը խավարի մեջ է, էլեկտրականությունն անջատված է, հերթապահ մանկաբույժը տեղում չէ:
«Ասում եմ՝ մի հատ օգնություն ցույց տվեք, ասում են՝ խոպան ա գնացել մանկաբույժը: Էն մյուսն էլ ասում ա՝ տունն ա: Ես քսան րոպես սպասել եմ՝ մարդ չկա, չի գալիս, օգնություն ցույց չի տալիս», - պատմեց նա:
Հերթապահ բուժքույրը առաջարկել է երեխային Վանաձոր տեղափոխել: Երեխան, դժբախտաբար, ճանապարհին մահացել էր:
Մեր այցելության պահին Սպիտակի բժշկական կենտրոնի տնօրեն Արսեն Մկրտչյանը տեղում չէր, ստիպված էինք նրա հետ զրուցել հեռախոսով: Նշելով, որ այդ պահին հիվանդանոցում էլեկտրաէներգիա չի եղել, իսկ երեխային միայն բուժքույրն է զննել՝ նա, այդուհանդերձ, չընդունեց, թե բժիշկներն անփույթ են եղել, ասաց՝ երեխան իրենց մոտ արդեն մահացած է տեղափոխվել․ - «Փոքրիկը արդեն մահացած ա եղել: Բուժքույրը իրենց գյուղացի է եղել, մահացել է բառը չի ասել: Որ հարցրել են՝ ո՞նց ա երեխան, ասել է՝ երեխան չկա: Չեն հասկացել․․․»
Այնինչ փոքրիկի հայրը հարց է բարձրացնում՝ եթե մահացած էր՝ ինչո՞ւ էին հորդորում Սպիտակից Վանաձոր տեղափոխել: Համաձայն չէ նաև դիահերձումից հետո բժիշկների տված եզրակացությանը, թե մահվան պատճառը թոքաբորբն է եղել․ - «Դրանից երեք օր առաջ ես մեր տուն բերել եմ մանկաբույժին: Ասի մի հատ ստուգի թոքերը, իրա առողջականը ընդհանուր: Ասաց՝ շատ լավ է»:
Տնակում ապրող Խաչատրյանների ընտանիքը սոցիալապես անապահով է, սակայն Կարենն ասում է՝ սննդի ու վառելիքի պակաս երբևէ չեն ունեցել:
Ի դեպ, նրանց տնակի կողքին այն կիսակառույցն է, որը արդեն 3 տարի է «Գլենդել Հիլզը» ավարտին չի հասցնում, որ ընտանիքը տնակից բնակարան տեղափոխվի: