Երևանի Նոր Նորքի թաղապետարանում միջադեպի գործով կա 6 ձերբակալված, այդ թվում՝ ակտիվիստ Արթուր Չախոյանը, «Ազատությանը» փոխանցեցին ոստիկանությունից:
Ըստ «Ազատության» տեղեկությունների՝ Նոր Նորքի թաղապետը ձերբակալվածների թվում չէ։
Ակտիվիստ Արթուր Չախոյանին Նոր Նորքի ոստիկանությունից ավելի վաղ շտապօգնության մեքենայով տեղափոխել էին հիվանդանոց:
Նրա դեմքին տեսանելի էին վնասվածքները, որ այսօր ստացել էր Նոր Նորքի թաղապետարանում, երբ գնացել էր մասնակցելու հանրային քննարկման:
Նոր Նորք վարչական շրջանի ղեկավար Տիգրան Տեր-Մարգարյանը և մի քանի այլ անձինք հարվածել էին ակտիվիստին:
Ինչպես երևում է լրատվամիջոցների հրապարակած տեսանյութում, մինչ քննարկումը վիճաբանություն է սկսվում, Չախոյանի նկատմամբ բռնություն է գործադրվում:
ՆԳՆ-ից «Ազատությանը» փոխանցել են, որ ոստիկանության օպերատիվ արձագանքնման խմբերը տեսանյութի հրապարակումից հետո մեկնել են թաղապետարան: Արթուր Չախոյանը հրավիրվել է ոստիկանություն՝ հաղորդում տալու:
Երևանի քաղաքապետարանից մեկնաբանելով միջադեպը՝ նշել են, որ բռնությունը ցանկացած դրսևորմամբ անընդունելի է։
«Միևնույն ժամանակ, հարկ է նշել, որ հայհոյանքը, վիրավորանքը և անհատի արժանապատվությունը նվաստացնող ցանկացած վարք ևս բռնության ձևեր են և չեն կարող դիտարկվել խոսքի ազատության շրջանակում», - փոխանցել են քաղաքապետարանից։
ԿԱՐԴԱՑԵՔ ՆԱԵՎ Ծեծ ու վիճաբանություն Երևանի Նոր Նորքի թաղապետարանում