Մոլդովայում ազատազրկման է դատապարտվել Գագաուզիայի ինքնավար մարզի ռուսամետ ղեկավարը

Քիշնևի դատարանը յոթ տարվա ազատազրկման է դատապարտել Գագաուզիայի ինքնավար մարզի ռուսամետ ղեկավար Եվգենիա Գուցուլին՝ մեղադրելով նրան ֆինանսական չարաշահումների և Մոլդովայում արգելված «Շոր» կուսակցությանը ֆինանսավորելու համար։

Դատապարտված առաջնորդը դատարանի որոշումը որակել է քաղաքական պատվեր և հայտարարել է, թե չի ընդունում մեղադրանքը։ Կրեմլը ևս դատապարտել է դատավճիռը և պնդել, թե երկրի եվրոպամետ կառավարությունը միտումնավոր գրգռում է հասարակական կարծիքը Ռուսաստանի դեմ։

Դատավճիռը կայացվել է սեպտեմբերի 28-ին կայանալիք խորհրդարանական ընտրություններին ընդառաջ, մինչ Մոլդովան պարբերաբար մեղադրում է Մոսկվային իր ներքին քաղաքականությանը միջամտելու համար։