Հայաստան-Վրաստան ֆուտբոլային հանդիպումից տասն օր առաջ տոմսերի վաճառքն առայժմ չի մեկնարկել. ազգային հավաքականի ֆան շարժումները մտավախություն ունեն, որ սկզբունքային դիմակայությանն ընդառաջ իրենց չեն տրամադրի ավանդաբար հատկացվող տեղերը: Արդեն մի քանի ամիս Ֆուտբոլի ֆեդերացիայի ղեկավարության հրաժարականը պահանջող ֆան շարժումները՝ FAF-ն ու Red Eagles-ն ահազանգում են՝ տոմսերի հարցով հստակություն առայժմ չկա:
Ազգային հավաքականի տնային հանդիպումներում FAF-ն արևելյան տրիբունայի կենտրոնական հատվածն է զբաղեցնում, Red Eagles-ը հարավայինում է տեղավորվում: Ի տարբերություն մարզադաշտ այցելող մյուս ֆուտբոլասերների՝ ֆան շարժումներն ավելի կազմակերպված են երկրպագում, բացականչությունները, երգերը նախապես մշակվում են ու հանդիպումների ամբողջ ընթացքում չեն լռում:
Հայաստանում ՈՒԵՖԱ-ի թղթակից Մհեր Խուդավերդյանը, որը FAF-ի անդամների հետ մշտական կապի մեջ է, բացատրում է, թե ինչպես է սովորաբար տեղի ունենում այս գործընթացը. - «Տոմսերը այնպես չէ, որ ուղղակի նվեր են տրվում ֆան շարժումներին, այլ որոշակի զեղչով վաճառվել են և առանձին ձևով են վաճառվել, այսինքն՝ իրենք բաց վաճառք որպես այդպիսին չի կազմակերպվել, և կայքում անհասանելի են այդ տեղերը եղել այլ ֆուտբոլասերների համար»:
Ազգերի լիգայի շրջանակում Հայաստանի հավաքականը Վազգեն Սարգսյանի անվան Հանրապետական մարզադաշտում Վրաստանի ընտրանուն կընդունի մարտի 20-ին, երեք օր անց թիմերն արդեն Թբիլիսիում ուժերը կչափեն: Կովկասյան դերբիի նժարին այս մրցաշարի B դիվիզիոնի ուղեգիրն է՝ երկու խաղերի արդյունքում հաղթողը հաջորդ մրցաշրջանը կարգով ավելի բարձր B դիվիզիոնում կսկսի:
ԿԱՐԴԱՑԵՔ ՆԱԵՎ ՈՒԵՖԱ-ի Ազգերի լիգայի փլեյօֆում Հայաստանը կմրցի Վրաստանի հետՖուտբոլի ֆեդերացիայի կայքում տոմսերի վաճառքի փոխարեն պարզապես գրված է՝ «Շուտով», այնինչ վերջին շրջանում ազգային թիմի հանդիպումների տոմսերն ավելի վաղ էին հանվում վաճառքի, անցած սեպտեմբերին կայացած Հայաստան-Լատվիա խաղի տոմսերը հնարավոր էր ձեռք բերել հուլիսին:
«Դեռ չկա անգամ ինֆորմացիա, թե երբ է նախատեսվում սկսել տոմսերի վաճառքը, ինչը ենթադրում է, որ ինչ-որ պրոցես է գնում էս մասով, դեռ չեն կարողանում որոշում կայացնել, թե ինչ պետք է արվի՝ երկրպագուների ավանդական տեղերն արդյոք տրվելու են երկրպագուներին, բացվելո՞ւ է երկրպագուների համար վաճառքը, թե՞ ոչ», - նշեց Խուդավերդյանը:
Արդյոք տոմսերի վաճառքի ուշացումը կապ ունի վերջին շրջանում ֆեդերացիայի ղեկավարության հրաժարականի՝ երկրպագուների պահանջի հետ: Այս հարցի պատասխանը ստանալ չհաջողվեց, «Ազատությանն» ամբողջ օրվա ընթացքում չհաջողվեց նրանց հետ կապ հաստատել:
Իսկ Թբիլիսիում մարտի 23-ին կայանալիք պատասխան հանդիպման տոմսերի վաճառքը ոչ միայն սկսվել է, այլև արդեն ամբողջությամբ սպառվել՝ Sold out:
«Վրաստանից եկող ինֆորմացիան այնպիսին է, որ Հայաստանում տեղի ունենալիք խաղի ամբողջ հյուրերի սեկցիան՝ շուրջ 900 տոմս, արդեն տրվել է վրացական կողմին և նաև հյուրերի սեկցիայի կողքին գտնվող մոտ 1500 տեղ տրվել վրացիներին: Այս ինֆորմացիան պաշտոնապես ոչ մի տեղ դեռ հաստատված չի, բայց անընդհատ այս ինֆորմացիաներ գալիս են և կարծես թե հերքում էլ չունեն, պետք է որ դա համապատասխանի իրականությանը», - ասաց Հայաստանում ՈՒԵՖԱ-ի թղթակիցը:
Երկրպագուներն անհանգիստ են՝ եթե ֆան շարժումների ավանդական տեղերը չհատկացվեն, գուցե ստացվի այնպես, որ Երևանում ավելի շատ վրացի երկրպագուների ձայները լսվեն, նրանց թիվը կարող է զգալի լինել: Տարիներ առաջ ակումբային ֆուտբոլում է մի այսպիսի աղմկոտ դեպք է եղել, երբ կատալոնական «Բարսելոնա»-ի հարկի տակ Ֆրանկֆուրտի «Այնթրախթ»-ի հետ հանդիպմանը գերմանացի երկրպագուների ձայնն էր գերիշխում:
Ֆան շարժումների ու Ֆուտբոլի ֆեդերացիայի ղեկավարության հարաբերություններն ամիսներ շարունակ լարված են: Հավաքականի ձախողումներից դժգոհ երկրպագուները հրաժարականի պահանջով փողոց դուրս եկան, բողոքի ակցիաներն այնուհետև մարզադաշտեր հասան: Վերջին նման ակցիան ուղեկցվեց ոստիկանական գործողություններով, ցույցի մի շարք մասնակիցներ ձերբակալվեցին, ապա նրանց նկատմամբ խուլիգանության հոդվածով մեղադրանք առաջադրվեց: Նրանք ազատ արձակվեցին չհեռանալու պայմանով:
ԿԱՐԴԱՑԵՔ ՆԱԵՎ
Խուլիգանություն․ ֆուտբոլի 9 երկրպագուների նկատմամբ հանրային քրեական հետապնդում է հարուցվելՄարտաֆիլմ հիշեցնող տեսարաններ Հայաստանի ֆուտբոլի առաջնությունումԱնցած նոյեմբերին հավաքականի վերջին տնային հանդիպմանն էլ ֆան շարժումները «հեռացի՛ր» վանկարկումներով ակցիա իրականացրին:
Ֆեդերացիան վերջերս հիշեցրեց այս դեպքերն ու հայտարարեց, թե «երկրպագուների որոշ խմբերի պահվածքի հետևանքով Հայաստանում ՈՒԵՖԱ-ի միջազգային բարձր չափանիշներին համապատասխանող միակ մարզադաշտը գտնվում է ՈՒԵՖԱ-ի հատուկ մոնիթորինգի տակ, և եթե միջադեպը կրկնվի, մարզադաշտը կարող է որակազրկվել»:
ԿԱՐԴԱՑԵՔ ՆԱԵՎ
«Հանրապետական» մարզադաշտը գտնվում է ՈՒԵՖԱ-ի հատուկ մոնիթորինգի տակ. ՀՖՖՈՒԵՖԱ-ն 37 500 եվրոյով տուգանել է Հայաստանի ֆուտբոլի ֆեդերացիային