Հայաստանին աջակցելու ամենաարդյունավետ միջոցն ԱՄՆ տեսանկյունից կլիներ Հարավային Կովկասում խաղաղության հասնելու օրակարգն ԱՄՆ քաղաքական վերնախավի առաջնահերթությունների ցանկում ներառելը: Այս մասին վարչապետ Նիկոլ Փաշինյանը խոսել է Վաշինգտոնում «Save Armenia»-ի կողմից կազմակերպված ընդունելությանը:
Ընդունելությանը, կառավարության հաղորդմամբ, մասնակցել են «Save Armenia»-ի համահիմնադիր Ռոբերտ Նիկոլսոնը, մի շարք դիվանագետներ, հասարակական, քաղաքական գործիչներ:
«Եթե հարցնեք, թե որն է Հայաստանին աջակցելու ամենաարդյունավետ միջոցն ԱՄՆ տեսանկյունից, կասեմ, որ Հարավային Կովկասում խաղաղության հասնելու օրակարգն ԱՄՆ քաղաքական վերնախավի առաջնահերթությունների ցանկում ներառելը կլիներ շատ կարևոր, որովհետև իհարկե, մենք խթանում ենք ազատություններն, այդ թվում` կրոնական ազատությունը, բայց գիտեք, ես կարծում եմ` մարդկանց ազատությունները պաշտպանելու լավագույն գործիքը կայուն խաղաղությունն է», - ասել է Նիկոլ Փաշինյանը:
Երևանն այժմ կենտրոնացած է խաղաղության օրակարգի վրա, որովհետև համոզված է, որ Հարավկովկասյան տարածաշրջանում միայն կայուն խաղաղության առկայությունն է, որ կարող է երաշխավորել «պատշաճ միջավայր ժողովրդավարության համար, մարդկանց իրավունքների պաշտպանության համար և Հայաստանի զարգացման համար», շեշտել է նա։
ԱՄՆ նորընտիր նախագահ Թրամփի երդմնակալությունից ուղիղ մեկ շաբաթ առաջ Հայաստանը և Միացյալ Նահանգները ստորագրեցին Ռազմավարական գործընկերության հանձնաժողովի կանոնադրությունը։ Այն Երևանի ու Վաշինգտոնի միջև նախատեսում է համագործակցության մի քանի ոլորտներ, ընդգծվում է ինքնիշխանության և տարածքային ամբողջականության պաշտպանությունը:
Փաշինյանն ավելի վաղ հանդիպել է նաև տեղի հայ համայնքի ներկայացուցիչների հետ, այնտեղ հայտարարել, որ ՀՀ-ի հարատևության համար պետք է ստեղծել մի իրավիճակ, երբ տարածաշրջանում հնարավոր լինի ապրել առանց արտաքին միջամտության:
ԱՄՆ մայրաքաղաքում Հայաստանի դեսպանատան առջև ամերիկահայ երիտասարդները վարչապետին դիմավորել են «Ժողովրդավարությունը շեղվել է իր ուղուց», «Փախստականները մոռացված են», «Արցախին դավաճանել են» գրությամբ պաստառներով:
ԿԱՐԴԱՑԵՔ ՆԱԵՎ Փաշինյանը հանդիպել է ԱՄՆ հայ համայնքի հետ. դեսպանատան առջև երիտասարդները պաստառներով են դիմավորել