Ֆրանսիան մտահոգված է հայ - ադրբեջանական սահմանին տիրող լարվածությամբ, այսօր հայտարարել է Ֆրանսիայի արտգործնախարար Ժան-Նոել Բարոն։
Ֆրանսիական դիվանագիտության ղեկավարը հույս է հայտնել , որ այդ լարվածությունը հնարավոր կլինի թուլացնել եվրոպական դիտորդական առաքելության ընդլայնման օգնությամբ:
«Ինչ վերաբերում է Ադրբեջանին, ես շատ մտահոգված եմ սահմանին լարվածության աճով։ Հույս ունեմ, որ այնտեղ տեղակայված եվրոպական առաքելության կազմը կընդլայնվի, որպեզի հնարավոր լինի հետևել և զսպել այդ լարվածությունը»,- հայտարարել է Բարոն:
«Այժմ անհրաժեշտ է ստորագրել խաղաղության պայմանագիրը, իսկ կամայականորեն ձերբակալվածները, բանտարկվածները պետք է ազատ արձակվեն», - ընդգծել է Ֆրանսիայի արտգործնախարարը Լյուքսեմբուրգում, ուր ժամանել է՝ մասնակցելու Եվրամիության ԱԳ նախարարների հանդիպմանը:
Նախարարի հայտարարությունը X-ի իր էջում հրապարակել է Հայաստանում Ֆրանսիայի դեսպան Օլիվիե Դըկոտինյին:
Վերջին շաբաթներին Բաքուն Երևանին գրեթե ամենօրյա ռեժիմով մեղադրում է իր դիրքերը թիրախավորելու համար, այս նույն ընթացքում Սյունիքի, Գեղարքունիքի սահմանային բնակավայրերից հաղորդում են չդադարող կրակոցների մասին։ Մարտի 31-ից սկսած երկու անգամ, այդ թվում՝ այսօր, հայկական կողմը հաղորդել է Սյունիքի Խնածախ գյուղի ուղղությամբ ադրբեջանցիների կրակոցների մասին՝ Բաքվին կոչ անելով հետաքննել այդ փաստերը և հանդես գալ հրապարակային պարզաբանումներով։