Հերթական սկանդալը Երևանի քաղաքապետարանի շուրջ. երեկվանից սոցցանցերում մի ձայնագրություն է տարածվում, որի մեջ անհայտ անձինք ավտոբուսների վարորդներին հրահանգում են մարդկանց հորդորել վճարել, չվճարելու դեպքում մեքենան կանգնեցնել, վճարման կտրոնները ստուգել:
«Կանգնեք, ասեք` վճարեք, չեմ քշում, թե չէ, ոչ մեկ ձրի չնստի, ձրի են նստում, ասեք` վճարեք, չէ, տրանսպորտը չշարժեք», - ասված է ձայնագրությունների մեջ:
Ովքեր են այս ձայնագրություններում հրահանգ տվողները՝ պարզ չէ: Հայտնի չէ նաև, թե ով և ինչպես է ձայնագրել զրույցները: Սկանդալային հատվածները համացանցում են արդեն մեկ ամբողջ օր, բայց մինչ այս պահը քաղաքապետարանը պարզաբանում չի տվել, չի հերքել դրանց իսկությունը, ոչ էլ իր առնչությունը ձայնագրություններում կոշտ զգուշացումներ տվողների հետ: Քաղաքապետարանի լրատվականից «Ազատությանն» ասացին, որ այս պահին մեկնաբանություն չունեն:
Դատելով այս ձայնագրություններից՝ անհայտ անձինք վարորդներին, ըստ էության, հորդորում են առճակատման գնալ թանկացած տրանսպորտի համար չվճարողների հետ: Բանը վիրավորանքների է հասնում, չվճարող երիտասարդներին անվանում են «թուլա» ու «լակոտ»:
ԿԱՐԴԱՑԵՔ ՆԱԵՎ «Փորձում են բոյկոտի ալիքը կոտրել». հսկիչների շուրջ ընդդիմության պնդումն ու քաղաքապետարանի պարզաբանումըՎարորդների աշխատանքային պայմանագրերում որևէ ուղիղ կետ չկա չվճարողներին իջեցնելու, ներս չթողնելու կամ էլ այդ պատճառով վարելուց հրաժարվելու մասին: Դրույթ կա միայն զգուշացման մասին, որպեսզի վճարները միայն սահմանված կարգով կատարվեն, ևս մեկ կետով էլ վարորդները պարտավոր են թույլ չտալ կանխիկ վճարումները: Ուղևորավարձի վերաբերյալ կետերը պայմանագրում այսքանն են:
Այս փաստը, սակայն, չի խանգարում նման կարգադրություններ իջեցնել ու անգամ սպառնալ վարորդներին, որ բոլորին օնլայն հետևում են: Հատվածներից մեկում դժգոհում են նրանց աշխատանքից, հրահանգ տվողը բարկացած է, որ վարորդներն ավտոբուսի երկու դռներն էլ բացում են:
ԿԱՐԴԱՑԵՔ ՆԱԵՎ Երևանի քաղաքապետարանը դեռ չի հաշվել՝ քանի հոգի է միասնական տոմսային փաթեթ գնելԹանկացած տրանսպորտի դռներ փակել-չփակելու հարցը քաղաքացիների հիմնական դժգոհություններից մեկն է, «Ժոնգ Տոնգ« ավտոբուսներում վճարում ընդունող միայն մեկ սարք է տեղադրված՝ առջևի դռան մոտ: Բողոքներից ու լրատվամիջոցների հրապարակումներից հետո վերջին շրջանում վարորդները բացում են նաև երկրորդը, սակայն, փաստորեն ձայնագրությունում հրահանգողներին այդ փաստը դուր չի եկել:
Ավագանու ընդդիմադիր «Մայր Հայաստան» խմբակցության անդամները «Երևանի ավտոբուս» ընկերություն էին գնացել պարզաբանումներ ստանալու համար: Մեծ հիմնարկի դռներն ու դարպասները, սակայն, փակ էին, նրանց ոչ ոք չընդունեց:
«Փախել են», - ասաց ավագանու անդամ Գևորգ Ստեփանյանը:
Օրվա ընթացքում «Ազատություն»-ը ևս մի քանի անգամ զանգահարեց «Երևան ավտոբուսի» խոսնակին, սակայն նրա հեռախոսը դարձյալ անհասանելի էր: Իսկ այս սկանդալի մասին լռող քաղաքապետարանն այսօր տեղեկացրել է կանաչապատման աշխատանքների, փողոցներից մեկում երթևեկության կարգի փոփոխության, աշակերտների հյուրընկակելու ու ձնամաքրման աշխատանքների մասին: Ո՛չ պաշտոնական հաղորդագրություններում ու ո՛չ էլ սոցցանցերի հրապարակումներում աղմկահարույց ձայնագրությանը որևէ անդրադարձ չկա: