Ալյասկայում վաղը ԱՄՆ նախագահի հետ նախատեսված հանդիպումից առաջ Ռուսաստանի նախագահն այսօր ակնարկել է, որ Մոսկվան կբարձրացնի միջուկային զենքի վերահսկման հարցը՝ որպես անվտանգության հարցերի քննարկման մաս:
Այսօր հրավիրված խորհրդակցությանը Վլադիմիր Պուտինն ասել է, որ Վաշինգտոնն ակտիվորեն ու անկեղծ ջանքեր է գործադրում, որպեսզի դադարեցվեն մարտական գործողությունները, հանգուցալուծվի ճգնաժամն ու ձեռք բերվեն համաձայնություններ, որոնք հակամարտությունում ներգրավված բոլոր կողմերի շահերից են բխում: «Որպեսզի մեր երկրների միջև, Եվրոպայում և ամբողջ աշխարհում երկարաժամկետ խաղաղության պայմաններ ստեղծվեն, եթե հաջորդ փուլերում մենք համաձայնության հասնենք ռազմավարական հարձակողական զենքի վերահսկողության ոլորտում» ,- ասել է ՌԴ նախագահը:
ԿԱՐԴԱՑԵՔ ՆԱԵՎ Պուտինը Թրամփի հետ հանդիպումից առաջ խորհրդակցություն է անցկացրելՊուտինի օգնական Յուրի Ուշակովն իր հերթին ասել է, որ վաղվա հանդիպման գլխավոր թեման Ուկրաինան է, սակայն կքննարկվեն նաև տնտեսական կապերի «հսկայական չիրացված ներուժը»: Առաջնորդները կհանդիպեն դեմ առ դեմ՝ թարգմանիչների մասնակցությամբ, հանդիպմանը կհետևի մամուլի ասուլիս:
Թրամփ - Պուտին բանակցություններից առաջ Ուկրաինայի նախագահն այսօր հանդիպել է Մեծ Բրիտանիայի վարչապետի հետ: Վլադիմիր Զելենսկին հայտնել է, որ մանրամասն քննարկել են Ուկրաինայի անվտանգության հնարավոր երաշխիքների հարցը: Մեծ Բրիտանիայի վարչապետի գրասենյակը հայտարարել է, որ Թրամփ-Պուտին հանդիպումը առաջընթացի իրական հնարավորություն է:
Մինչ այդ ԱՄՆ նախագահը հայտարարել էր, որ եթե Ալյասկայի հանդիպմանը Պուտինը չհամաձայնի Ուկրաինայում հրադադար հաստատելուն, ապա շատ ծանր հետևանքներ կլինեն՝ չհստակեցնելով, թե կոնկրետ ինչ նկատի ունի: Թրամփը նշել է՝ եթե Ալյասկայի հանդիպումը հաջող անցնի, կցանկանար հաջորդն անցկացնել Ուկրաինայի նախագահի մասնակցությամբ, որը պետք է վճռորոշ լինի. «Կցանկանայի, որ այն տեղի ունենար առաջին հանդիպումից գրեթե անմիջապես հետո։ Մենք արագ երկրորդ հանդիպումը կանցկացնենք նախագահներ Պուտինի, Զելենսկիի և իմ մասնակցությամբ, եթե նրանք ցանկանան, որ ես այնտեղ լինեմ», - հայտարարել է ԱՄՆ նախագահը:
Դոնալդ Թրամփը նաև նշել է՝ եթե առաջին հանդիպումը լավ չանցնի, ապա երկրորդը չի լինի: Ըստ CBC News-ի, սակայն, Թրամփի վարչակազմն արդեն եռակողմ հանդիպման վայրն է ընտրում:
ԿԱՐԴԱՑԵՔ ՆԱԵՎ Թրամփը ԵՄ առաջնորդներին և Զելենսկիին վստահեցրել է՝ Պուտինի հետ տարածքային հարցեր չի քննարկիՈւկրաինայի և եվրոպական երկրների առաջնորդների հետ Թրամփի երեկվա հեռավար հանդիպումից հետո Ֆրանսիայի նախագահն ասել է, որ Սպիտակ տան ղեկավարը համաձայն է, որ ԱՄՆ-ն և մյուս դաշնակիցները պետք է մասնակցեն Ուկրաինային անվտանգության երաշխիքներ տալուն: Այդ մասին գրել է նաև Politico-ն: Սակայն Թրամփը բացառել է, որ Կիևը միանա ՆԱՏՕ-ին, ինչը խաղաղություն հաստատելու՝ Մոսկվայի գլխավոր պայմաններից մեկն է: Չնայած Թրամփը հրապարակավ չի խոսել անվտանգության երաշխիքների մասին, ԵՄ-ն արդեն ողջունել է նրա հայտարարությունը:
ԿԱՐԴԱՑԵՔ ՆԱԵՎ Թրամփը բացառել է Կիևի անդամակցությունը ՆԱՏՕ-ինԷմանյուել Մակրոնը նաև հայտնել է, որ Թրամփը հստակ է ասել՝ Ուկրաինայի տարածքների հարցը կարող է և կբանակցվի միայն երկրի նախագահի հետ. «Գրավված տարածքները … Ուկրաինայի մնացած տարածքի և Եվրոպայի համար խաղաղության երաշխիքների անբաժանելի մասն են, ուստի դա չի կարող քննարկվել առանց Ուկրաինայի նախագահի։ Այսօր տարածքային փոխանակման որևէ լուրջ սխեմա չկա սեղանին» ,- հայտարարել է Ֆրանսիայի առաջնորդը։
Մեծ Բրիտանիայի վարչապետը տեսակապով հանդիպմանն ասել է, որ Ուկրաինային անվտանգության երաշխիքներ տալու առումով առաջընթաց կա, նաև նշել՝ Ուկրաինայի հարցով որևէ բանակցություն չի կարող լինել առանց Կիևի: Քիր Սթարմերը նաև ասել է՝ միջազգայնորեն ճանաչված սահմանները չեն կարող և չպետք է փոխվեն ուժով:
«Սահմանների, դիվանագիտության, հրադադարի մասին որևէ բանակցություն պետք է զուգակցվի անվտանգության ամուր և վստահելի երաշխիքի հետ՝ ապահովելու, որ ցանկացած խաղաղություն լինի երկարատև, և ցանկացած գործարքի դեպքում Ուկրաինան կարողանա պաշտպանել իր տարածքային ամբողջականությունը» , - ասել է Մեծ Բրիտանիայի վարչապետը:
Գերմանիայի կանցլերի փոխանցմամբ էլ՝ Թրամփին փոխանցել են միասնական ուղերձ՝ Ալյասկայի հանդիպմանը պետք է հաշվի առնվեն Եվրոպայի և Ուկրաինայի անվտանգության շահերը, իսկ Ուկրաինան պետք է մասնակցի հաջորդ հանդիպումներին։ «Ուկրաինան պատրաստ է բանակցել տարածքների շուրջ։ Սակայն, այսպես կոչված շփման գիծը պետք է լինի մեկնարկային կետը։ Ռուսական օկուպացիայի իրավական ճանաչումը քննարկման առարկա չէ։ Պետք է շարունակի գործել սկզբունքը, որ սահմանները չպետք է փոխվեն ուժով»,-ասել է Մերցը:
Այս ֆոնին Գերմանիան 500 մլն դոլար է հատկացրել Ուկրաինայի համար ԱՄՆ-ից զենք գնելու նպատակով: Վլադիմիր Զելենսկին հայտնել է, որ Ուկրաինան եվրոպացի դաշնակիցներից 1,5 միլիարդ դոլար է ստացել ամերիկյան զենք գնելու համար:
Այս ընթացքում կողմերը շարունակել են հարվածել միմյանց: Ուկրաինական անօդաչուների հարվածներից Բելգորոդում և Դոնի Ռոստովում 14 մարդ է վիրավորվել: Վոլգոգրադում հարվածել են նավթի բազայի: Ուկրաինան հայտարարել է, որ կայունացրել են իրավիճակը Դոբրոպիլիա քաղաքի մոտ, որտեղ օրեր առաջ ռուսական հետևակի մի քանի խումբ 10 կմ առաջ էր գնացել: Ռուսաստանն ու Ուկրաինան այսօր գերիներ են փոխանակել՝ 87-ը 87-ի դիմաց, նրանց թվում՝ քաղաքացիական անձինք: