Ուկրաինային ԱՄՆ լրացուցիչ ռազմական օգնության մասին կարող է հայտարարվել արդեն այս շաբաթվա վերջին, CNN-ին ասել է ԱՄՆ Ազգային անվտանգության խորհրդի ռազմավարական հաղորդակցության համակարգող Ջոն Քըրբին:
«Կարծում եմ, որ դուք կշարունակեք լսել ԱՄՆ-ից Ուկրաինայի համար անվտանգության ոլորտում լրացուցիչ փաթեթների, լրացուցիչ զենքի և հնարավորությունների մասին: Հնարավոր է՝ այս շաբաթվա վերջում», - նշել է Քըրբին:
ԱՄՆ պետքարտուղար Էնթոնի Բլինքենը երեկ ասել է, որ Միացյալ Նահանգները վճռական է տրամադրել Ուկրաինային այն, ինչ անհրաժեշտ է մարտի դաշտում հաջողության հասնելու համար:
«Այս ագրեսիայի զարգացման հետ, զարգացել է նաև մեր օգնությունը Ուկրաինային՝ համոզվելու համար, որ ունեն այն, ինչ անհրաժեշտ է ագրեսիային հակազդելու համար», - ասել է Բլինքենը Վաշինգտոնում Մեծ Բրիտանիայի արտգործնախարար Ջեյմս Քլևերլիի հետ համատեղ մամուլի ասուլիսում:
ԱՄՆ պետքարտուղարը բարձր է գնահատել Ուկրաինային տանկեր մատակարարելու Բրիտանիայի պատրաստակամությունը։
Երեկ կայացել են Ռուսաստանի և Թուրքիայի նախագահներ Վլադիմիր Պուտինի և Ռեջեպ Թայիփ Էրդողանի հեռախոսային բանակցությունները, հաղորդում է Կրեմլի մամուլի ծառայությունը։
«Հեռախոսազրույցի ընթացքում կողմերը հաստատել են երկկողմ հարաբերությունների համալիր զարգացման մտադրությունը։ Առաջնահերությունների թվում նշվել է էներգետիկ ոլորտում համագործակցությունը, այդ թվում` Ռուսաստանում արդյունահանված բնական գազի արտահանումը և Թուրքիայի տարածաշրջանային գազային հաբի ստեղծումը», - նշված է Կրեմլի հաղորդագրության մեջ։
Ռուսական կողմը հաղորդում է, որ Պուտինն ու Էրդողանը քննարկել են Ուկրաինայում ստեղծված իրավիճակն ու ուկրաինական գյուղմթերքի արտահանման շուրջ ձեռք բերված պայմանավորվածությունների կատարման ընթացքը։
«Բացի այդ, քննարկվել են թուրք-սիրիական հարաբերությունների կարգավորմանը վերաբերող հարցեր՝ Անկարայի կողմից նախաձեռնված եռակողմ ռուս-թուրք-սիրիական խորհրդակցությունների համատեքստում», - հաղորդում է Ռուսաստանի նախագահի մամուլի ծառայությունը։
Ֆինլանդիան Կիևին «Լեոպարդ» մակնիշի տանկեր կտրամադրի միայն Գերմանիայի համաձայնության դեպքում, այսօր հայտարարել է այդ երկրի պաշտպանության նախարար Միկո Սավոլան։ Ֆիննական ռազմական գերատեսչության ղեկավարի խոսքով՝ գերմանական արտադրության սպառազինության վերաարտահանման դեպքում Գերմանիայի թույլտվությունը պարտադիր է։
«Թե ինչ դիրքորոշում մենք կորդեգրենք «Լեպորադների» հարցում, Գերմանիայից է մեծապես կախված», - հայտարարել է Ֆինլանդիայի պաշտպանության նախարարը։
Նախորդ շաբաթ Ֆինլանդիայի նախագահ Սաուլի Նիինիստոն չէր բացառել ոչ մեծ թվով «Լեոպարդների» փոխանցումը Կիևին, «եթե եվրոպական պետությունների ավելի մեծ շրջանակ նման որոշում կայացնի»։
Ռուսական աղբյուրների փոխանցմամբ՝ այսօր Սևաստոպոլի մերձակայքում ոչնչացված անօդաչուների թիվը հասել է 7-ի։ Այս մասին հաղորդել է բռնակցված Սևաստոպոլի նահանգապետ Միխաիլ Ռազվոզժաևը։
Նրա խոսքով՝ բոլոր անօդաչուները ՀՕՊ ուժերի ու Սևծովյան նավատորմի կողմից ոչնչացվել են մինչև ափ հասնելը, ուստի քաղաքում գտնվող որևէ շինություն կամ ռազմավարական նշանակության օբյեկտ չի տուժել։
Սևաստոպոլի ծովածոցում խոցված առաջին ԱԹՍ-ի մասին Ռազվոզժաևը հայտնել էր դեռ գիշերը, հետագայում դրանց թիվն, ըստ պաշտոնյայի, հասել էր երեքի։
«Անօդաչուների երկրորդ հարձակումը Սևաստոպոլի ուղղությամբ մեկնարկել էր կեսօրին», - հաղորդում է «Ինտերֆաքս» գործակալությունը։
Դնեպրում հրթիռակոծության հետևանքով զոհերի թիվը հասել է 35-ի։ Այս մասին տեղեկացրել է նահանգապետ Վալենտին Ռեզնիչենկոն՝ նշելով, որ փրկարարական և որոնողական աշխատանքները շարունակվում են։
«Այս պահի դրությամբ ևս 35 մարդ համարվում է անհետ կորած, վիրավորների թիվը հասել է 75-ի», - նշել է պաշտոնյան։
ԵԱՀԿ գործող նախագահ, Հյուսիսային Մակեդոնիայի արտաքին գործերի նախարար Բուջար Օսմանին այսօր կայցելի Ուկրաինա և կհանդիպի բարձրաստիճան պաշտոնյաների հետ։ Սա նրա առաջին պաշտոնական այցն է որպես ԵԱՀԿ գործող նախագահ։
Նախարար Օսմանիի հանդիպումների ընթացքում կքննարկվեն հումանիտար և անվտանգության մարտահրավերները, որոնց բախվում է երկիրը Ուկրաինայի դեմ Ռուսաստանի շարունակվող պատերազմի պատճառով։ Քննարկումները կներառեն նաև Ուկրաինայի ժողովրդի, ինստիտուտների և քաղաքացիական հասարակության ամենահրատապ կարիքները, ինչպես նաև ԵԱՀԿ-ի դերը երկրի կայունությունն ուժեղացնելու և առաջացող բազմաթիվ մարտահրավերներին դիմակայելու գործում:
ԵԱՀԿ գործող նախագահը կայցելի նաև Կիևի մարզ՝ դիտարկելու պատերազմի ազդեցությունը խաղաղ բնակչության և քաղաքացիական ենթակառուցվածքների վրա և տեղեկանալու այդ տարածքում անհրաժեշտ միջազգային օգնության ծավալին:
Ուկրաինական կողմի հաղորդմամբ՝ այս գիշեր ռուսական զորքերը հրթիռակոծել են Զապորոժիեն: Այս մասին Telegram-ում գրել է Զապորոժիեի շրջանի վարչակազմի ղեկավար Ալեքսանդր Ստարուխը։
Նրա խոսքով՝ հարվածի հետևանքով մի քանի մարդ թեթև վնասվածքներ են ստացել։ Ավերվել են քաղաքացիական, բնակելի և արտադրական ենթակառուցվածքներ։ Զապորոժիեի քաղաքային խորհրդի քարտուղարի փոխանցմամբ՝ երեք մարդ գտնվում է հիվանդանոցներում։ Նրանց թվում երկու երեխա՝ ինը և տասնհինգ տարեկան։
Ռուսական կողմը հաղորդում է, որ այսօր առավոտյան համազարկային համակարգերով հրթիռակոծվել է Մակեևկան: Ռուսաստանը նաև հայտնել է, որ Սևաստոպոլի վրա անօդաչու թռչող սարք է խոցվել:
Երեկ Գերմանիայում մեկնարկել է ուկրաինական զորքերի վերապատրաստումը՝ ամերիկյան զինված ուժերի կողմից, հաղորդում է Associated Press-ը՝ հղում անելով Միացյալ Նահանգների զինված ուժերի գլխավոր շտաբի պետ Մարկ Միլլին:
Նրա խոսքով՝ մի քանի օր առաջ Ուկրաինայից ժամանած մոտ 500 զինծառայողներ կանցնեն այդ վերապատրաստումը։ Նշվում է, որ Միլլին նախատեսում է այսօր այցելել Բավարիայի դաշնային նահանգում գտնվող մարզահրապարակ և անձամբ ծանոթանալ մարզումների ծրագրին։
ՆԱՏՕ-ի գլխավոր քարտուղար Յենս Ստոլտենբերգը գերմանական լրատվամիջոցներին տված հարցազրույցում ասել է, որ մոտ ապագայում Ուկրաինան կստանա ծանր սպառազինության հերթական խմբաքանակը։
«Ծանր սպառազինության մատակարարման հետ կապված վերջին պարտավորությունները կարևոր են, մոտ ապագայում ես ակնկալում եմ ավելին (մատակարարում): Կարևոր է, որ մենք Ուկրաինային մատակարարենք այն սպառազինությունը, որն անհրաժեշտ է»,- ասել է նա։
Դնեպր քաղաքում բնակելի շենքի հրթիռակոծության զոհերի թիվը վերջին տվյալներով հասել է 30-ի, 75 մարդ տուժել է: Փլատակների տակ, սակայն, հնարավոր է դեռ մնացել են մարդիկ: Մոտ 40 մարդ անհետ կորած է համարվում, զոհվածների թիվը կարող է աճել: Փրկարարական աշխատանքները շարունակվում են:
Երկու օրում փլատակների տակից փրկարարները տասնյակ մարդկանց են հանել, այդ թվում՝ վեց երեխայի, նրանց կյանքը հաջողվել է փրկել: