BBC-ի ռուսական ծառայությունը հրապարակել է Ամանորի գիշերը Ուկրաինայի զինված ուժերի հրթիռային հարվածից զոհված 92 ռուս զինվորականների անուններն ու լուսանկարները։
Ռուսաստանի պաշտպանության նախարարությունն ավելի փոքր կորուստների մասին էր հայտնել։
Հաղորդվում է, որ լրատվամիջոցը մահացածներին նույնականացրել է բաց տեղեկությունների հիման վրա:
«Առվազն ևս 16 զինվորականների ընտանիքներ չեն կարողանում գտնել հարազատներին ոչ մահացածների, ոչ էլ ողջերի շարքում», - գրում է BBC-ի ռուսական ծառայությունը և հավելում, որ ներկայացնում է միայն նրանց անունները, ովքեր միանշանակ զոհվել են։
Միացյալ Նահանգներն ու Գերմանիան պատրաստ են Ուկրաինա տանկեր ուղարկել, Կիևը հույս ունի՝ դրանք ռազմի դաշտում իրավիճակ են փոխելու։
Հաղորդվում է, որ Գերմանիայի կանցլեր Օլաֆ Շոլցն առնվազն 14 գերմանական արտադրության Leopard 2 տանկ ուղարկելու որոշում է կայացել։
Անանուն աղբյուրներին հղում անելով՝ ամերիկյան լրատվամիջոցները գրել են, որ Վաշինգտոնն էլ, իր հերթին, շուտով կհայտնի առվազն 30 տանկ ուղարկելու մասին։
Կոռուպցիոն սկանդալների ֆոնին՝ Ուկրաինայում հրաժարական են տալիս հինգ նահանգապետեր, չորս փոխնախարարներ, այս մասին հայտարարել է Ուկրաինայի կառավարության ներկայացուցիչ Օլեգ Նեմչինովը։
Նրա խոսքերով՝ հեռացող պաշտոնյաների թվում են Դնեպրոպետրովսկի, Սումիի, Զապորոժիեի, Խերսոնի և Կիևի շրջանների ղեկավարները։ Ուկրաինական պաշտոնական աղբյուրների համաձայն՝ պաշտոնանկ են արվել նաև երկրի պաշտպանության փոխնախարարը, համայնքների և տարածքների զարգացման երկու փոխնախարարները, սոցիալական քաղաքականության փոխնախարարը։
Նախօրեին էլ կոռուպցիայի կասկածանքով պաշտոնանկ է արվել ենթակառուցվածքների փոխնախարարը:
Հետաքննությունը պնդում է, որ Վասիլի Լոզինսկին 400 հազար դոլարի դիմաց համաձայնել է նպաստել ուռճացված գներով սարքավորումների և գեներատորների ձեռքբերման պայմանագրերի կնքմանը։ Այսօր ավելի վաղ հայտնի է դարձել նաեւ Ուկրաինայի նախագահի աշխատակազմի ղեկավարի տեղակալ Կիրիլ Տիմոշենկոյի հրաժարականի մասին: Մամուլը պարզել էր, որ պետական պաշտոնյան տեղաշարժվում է թանկարժեք ամենագնաց մեքենայով, որը նվիրաբերվել էր Ուկրաինային մարդասիրական առաքելությունների համար:
Լեհաստանը պաշտոնապես դիմել է Գերմանիային՝ խնդրելով թույլ տալ Ուկրաինային փոխանցել գերմանական արտադրության Leopard տանկերը։ Այս մասին հայտարարել է Լեհաստանի պաշտպանության նախարար Մարիուշ Բլաշչակը։
Գերմանիայի արտգործնախարար Աննալենա Բերբոքն ավելի վաղ հայտարարել էր, որ Բեռլինը չի միջամտի Լեհաստանից գերմանական տանկերի մատակարարմանը, եթե երկիրը համապատասխան դիմում ներկայացնի։
Գերմանիայի պաշտպանության նախարար Բորիս Պիստորիուսի հետ հանդիպումից հետո ՆԱՏՕ-ի գլխավոր քարտուղար Յենս Ստոլտենբերգն այսօր վստահություն է հայտնել, որ դաշնակիցները շուտով որոշում կկայացնեն Ուկրաինային տանկեր մատակարարելու հարցով։ Նրա խոսքով՝ որոշում դեռ չկա, բայց Բեռլինն արդեն հասկացրել է իր դաշնակիցներին, որ ցանկության դեպքում կարող են սկսել գործընթացը:
Լոնդոնում տեղակայված Ռազմավարական հետազոտությունների միջազգային ինստիտուտի տվյալներով՝ ՆԱՏՕ-ի դաշնակիցներն իրենց տրամադրության տակ ունեն ավելի քան 2 հազար Leopard-ներ, որոնք իրենց տեսակի մեջ աշխարհում ամենաառաջադեմն ու արդյունավետն են:
Հրաժարական է տվել Ուկրաինայի նախագահի աշխատակազմի ղեկավարի տեղակալ Կիրիլ Տիմոշենկոն, պատճառների մասին պաշտոնապես չի հաղորդվում։
Մոտ մեկ ամիս առաջ ուկրաինական մի շարք անկախ լրատվամիջոցներ պարզել էին, որ պետական պաշտոնյան տեղաշարժվում է թանկարժեք ամենագնաց մեքենայով, որը General Motors-ը նվիրաբերել է Ուկրաինային մարդասիրական առաքելությունների համար:
Նախօրեին էլ կոռուպցիայի կասկածանքով պաշտոնանկ է արվել Ուկրաինայի ենթակառուցվածքների փոխնախարարը: Հետաքննությունը պնդում է, որ Վասիլի Լոզինսկին 400 հազար դոլարի դիմաց համաձայնել է նպաստել ուռճացված գներով սարքավորումների և գեներատորների ձեռքբերման պայմանագրերի կնքմանը։
Ուկրաինայի Ազգային հակակոռուպցիոն բյուրոն հետաքննում է նաև զինվորականների համար սննդամթերքի ձեռքբերման գործընթացում հնարավոր չարաշահումների մասին պնդումները:
Եվրամիության (ԵՄ) անդամ երկրների արտգործնախարարները պայմանավորվել են Ուկրաինային տրամադրել 500 միլիոն եվրո արժողությամբ ռազմական օգնության նոր փաթեթ:
Զենքի մատակարարման համար այդ միջոցները հատկացվելու են Խաղաղության եվրոպական հիմնադրամի հաշվից։
Բացի այդ, հաղորդվում է, որ նախարարները պայմանավորվել են այս հիմնադրամից 45 մլն եվրո հատկացնել Կիևին՝ ԵՄ ուսումնական առաքելությունում ուկրաինացի զինվորականների վերապատրաստման համար։
Այսպիսով, ներառյալ այս որոշումը Խաղաղության եվրոպական հիմնադրամի շրջանակներում Ուկրաինային տրամադրվող ընդհանուր ռազմական օգնությունը կհասնի մինչև 3,6 միլիարդ եվրո։
«Բեռլինի թույլտվությամբ թե առանց դրա՝ Լեհաստանը միևնույն է, իր զինանոցում գտնվող գերմանական արտադրության Leopard 2 մակնիշի տանկերն ուղարկելու է Ուկրաինա», - այսօր հայտարարել է Լեհաստանի վարչապետ Մատեուշ Մորավեցկին։
«Մենք, իհարկե, կդիմենք Գերմանիային նման թույլտվություն ստանալու խնդրանքով։ Դա, սակայն, երկրորդական հարց է։ Անգամ եթե մենք նման համաձայնություն չստանանք, ի վերջո, ավելի փոքր մի կոալիցիայի կազմում (նույնիսկ եթե դրանում Գերմանիան ընդգրկված չլինի) մենք միևնույն է մեր տրամադրության տակ եղած տանկերը տրամադրելու ենք Ուկրաինային», - հայտարարել է Լեհաստանի վարչապետը։
Ռուսաստանի ԱԳ նախարար Սերգեյ Լավրովի պնդմամբ` արևմտյան պետությունների և Մոսկվայի հարաբերություններն ընդհուպ մոտեցել են իրական պատերազմին։
«Արևմուտքի հետ հակամարտությունն այլևս դժվար է հիբրիդային անվանել։ Դա ավելի մոտ է իրական պատերազմին», - հայտարարել է Լավրովը՝ կրկին քննադատելով արևմտյան պետություններին Կիևին սպառազինություն մատակարարելու համար։
«Այս պահին Ռուսաստանի և Ուկրաինայի միջև բանակցությունների համար պայմաններ գոյություն չունեն՝ ոչ դե-ֆակտո և ոչ էլ դե-յուրե», -այսօր պատասխանելով ռուսաստանցի լրագրողների հարցերին՝ հայտարարել է Կրեմլի պաշտոնական ներկայացուցիչ Դմիտրի Պեսկովը։
«Մենք լսում ենք Կրեմլից հնչող հայտարարությունները, գիտենք նաև այն իրավական հիմնավորումների մասին, որոնք ներկայացնում է ուկրաինական վարչակազմը՝ բացատրելով բանակցությունների անհնարինությունը։ Այդ իսկ պատճառով այժմ կարելի է փաստացի ընդունել՝ բանակցությունների համար որևէ պայման գոյություն չունի», - հայտարարել է Ռուսաստանի նախագահի մամուլի քարտուղարը։
Բեռլինը պատրաստ է Վարշավային թույլատրել իր տրամադրության տակ գտնվող գերմանական արտադրության Leopard 2 մակնիշի տանկերը տրամադրել Ուկրաինային։ Այս մասին կիրակի օրը ֆրանսիական LCI լրատվական ալիքի եթերում հայտարարել է Գերմանիայի ԱԳ նախարար Աննալենա Բերբոկը։
«Եթե մեզ դիմեն նման խնդրանքով, մենք այդ քայլին չենք խոչընդոտի։ Մենք գիտենք, թե որքան կարևոր են այդ տանկերը Ուկրաինայի համար, այդ իսկ պատճառով այժմ այս հարցը քննարկում ենք մեր դաշնակիցների հետ», - հայտարարել է Գերմանիայի արտգործնախարարը։