Ուկրաինային ավիացիայի և հեռահար հրթիռների փոխանցման շուրջ բանակցություններն ընթանում են գործընկերների հետ արագացված ռեժիմով, ասել է նախագահի աշխատակազմի ղեկավարի խորհրդական Միխայիլ Պոդոլյակը։
Նրա խոսքով՝ գործընկերները հասկանում են պատերազմի տրամաբանությունը։
«Նույն կերպ, ռուսական բանակի առանցքային գործիքը կտրուկ նվազեցնելու համար, ինչով նրանք այսօր կռվում են առաջնագծում, և դա առաջին հերթին թնդանոթային հրետանին է, մեզ պետք են հրթիռներ, որոնք կկործանեն նրանց պահեստները», - ասել է նա։
Նույն Ղրիմում, նշել է նախագահի աշխատակազմի ղեկավարի խորհրդականը, կան տարբեր տեսակի 100-ից ավելի պահեստներ։
«Եվ, իհարկե, դրանք պետք է ոչնչացնել, հակառակ դեպքում Զապորոժիեի, Դոնեցկի և Լուգանսկի խմբավորումները (ռուսական բանակի-խմբ.) կունենան զգալի քանակությամբ հրետանային հնարավորություններ, չեմ կարծում, որ պատերազմի շրջանակներում ինչ-որ մեկը սա չի հասկանում»,- շեշտել է Պոդոլյակը։
«Հետևաբար, առաջին՝ բանակցությունները (ավիացիայի և հեռահար հրթիռների տրամադրման վերաբերյալ-խմբ.) արդեն ընթանում են, երկրորդ՝ բանակցություններն ընթանում են արագացված տեմպերով, երրորդ՝ գործընկերները հասկանում են այս ամենը: Չորրորդ՝ հոգեբանական կարգավիճակը գործընկեր երկրներում»,- նշել է նա։
2022 թվականին ռուսաստանցիները ռեկորդային ծավալի դրամական փոխանցումներ են կատարել հարևան երկրներ, հայտնում է РБК-ն։ Պարբերականն ուսումնասիրել է Ղազախստան, Վրաստան, Ուզբեկստան, Հայաստան և Ղրղըզստան փոխանցումների վիճակագրությունը:
Տրանսֆերտների աճի հիմնական պատճառներից մեկը ռուսների տեղափոխությունն է այլ երկրներ ռուս - ուկրաինական պատերազմի և զորահավաքի ֆոնին։
Ուկրաինայի արտգործնախարարություն է կանչվել Հունգարիայի դեսպանը՝ երկրի վարչապետ Վիկտոր Օրբանի հայտարարություններից հետո: Այս մասին հայտարարել է գերատեսչության ներկայացուցիչ Օլեգ Նիկոլենկոն։
Հինգշաբթի օրը լրագրողների հետ հանդիպմանը Օրբանը կարծիք է հայտնել, թե Ռուսաստանի նախագահ Վլադիմիր Պուտինը չի կարող իրեն թույլ տալ պարտվել պատերազմում, քանի որ 2024 թվականին մասնակցելու է նախագահական ընտրություններին։
Հունգարիայի վարչապետը նաև ասել է, թե Մոսկվան չի կարող թույլ տալ, որպեսզի ՆԱՏՕ-ն ներկա լինի ուկրաինական տարածքում, և հետևաբար իր առջև նպատակ է դնում Ուկրաինան վերածել «չկառավարվող ավերակների»։
Օրբանը հայտարարել է, թե Ուկրաինան այժմ «ոչ մեկի տարածք» է, և այն համեմատել է Աֆղանստանի հետ։
Լեհաստանի վարչապետ Մատեուշ Մորավեցկին հայտարարել է, որ Վարշավան Ուկրաինային լրացուցիչ 60 տանկ կտրամադրի` գերմանական արտադրության 14 Leopard-ներից բացի։
«Հենց հիմա մենք պատրաստ ենք ուղարկել մեր արդիականացված տանկերից 60-ը, որոնցից 30-ը՝ [լեհական արտադրության] PT-91», - կանադական CTV News հեռուստատեսության հետ զրույցում ասել է Մորավեցկին:
2022 թվականին ռուս արտահանողներն ավելի քան կրկնապատկել են հեղուկ գազի վաճառքը Բալթյան երկրներին, որի մի մասն այնուհետև վաճառվել է Ուկրաինային, հայտնում է Reuters-ը՝ վկայակոչելով տարածաշրջանում թրեյդերների և փոխադրողների շրջանում իր աղբյուրները։
Գործակալության տվյալներով՝ Լատվիայում ռուսական գազի մասնաբաժինը գերազանցել է ներմուծման 90 տոկոսը, իսկ Լատվիային, Լիտվային և Էստոնիային հեղուկացված բնական գազի ընդհանուր վաճառքը 2021 թվականին 159 հազար տոննայից հասել է 331 հազար տոննայի՝ 2022 թվականին։
Միայն դեկտեմբերին Լատվիան և Լիտվան Ուկրաինային մատակարարել են մոտ 15 հազար տոննա հեղուկ գազ՝ այս ամիս Ուկրաինայի հեղուկ գազի ընդհանուր ներմուծման 15 տոկոսը։
Reuters-ի տվյալներով՝ Կիևը Բալթյան երկրներից ենթադրաբար ռուսական վառելիք է գնում գնային տարբերություններից ելնելով․ 150-200 դոլար մեկ տոննայի գնի տարբերությունն է՝ Լեհաստանի և Ռումինիայի առաջարկած գների համեմատ։
Բալթյան երեք երկրների կառավարությունները չեն մեկնաբանել այս տեղեկատվությունը։ Լատվիան, Լիտվան և Էստոնիան ակտիվ աջակցում են Ռուսաստանի դեմ սահմանված պատժամիջոցներին և արդեն խստացրել են ռուսաստանցիների համար վիզային ռեժիմը։
Ռուսաստանցի օլիգարխ Ռոման Աբրամովիչը հնարավոր է նույնպես հայտնվի ԱՄՆ պատժամիջոցների տակ, քանի որ Ուկրաինայի և Ռուսաստանի միջև խաղաղություն հաստատելու նրա փորձերը ձախողվել են, ասվում է The Wall Street Journal-ի հրապարակման մեջ:
Մոտ մեկ տարի առաջ Աբրամովիչը փորձեց օգնել դադարեցնել պատերազմն Ուկրաինայում, փրկել իր հեղինակությունն ու 15 միլիարդ դոլարի կարողությունը Արևմուտքում:
Ռուսաստանի գլխավոր դատախազությունը Meduza-ն երկրում անցանկալի կազմակերպություն է ճանաչել:
Կարգավիճակը նշանակում է, որ հրատարակության հետ համագործակցությունը կարող է քրեական հետապնդման պատճառ դառնալ ՌԴ քաղաքացիների համար։
Դատախազությունը պնդում է, թե Meduza-ի իրավաբանական անձը «վտանգ է ներկայացնում Ռուսաստանի Դաշնության սահմանադրական կարգի և անվտանգության հիմքերի համար»։
Մինչ այս Proekt և The Insider հրատարակությունների խմբագրություններն էին ներառվել անցանկալի կազմակերպությունների ցանկում։
Meduza-ն հիմնադրվել է 2014 թվականին, խմբագրությունը բացվել է Ռիգայում։ Այն Ռուսաստանում ամենահայտնի լրատվական կայքերից է։ Գործարկման պահին թիմի կորիզը կազմված էր Մայդանում իրադարձությունների մեկնարկից հետո գրաքննվող Lenta.ru նախագիծը լքած լրագրողներից: 2021 թվականի ապրիլին խմբագրությունը Ռուսաստանում ճանաչվել է «օտարերկրյա գործակալ»։ Խմբագրությունը մնաց առանց գովազդատուների, ստիպված եղավ հրաժարվել Ռիգայում և Մոսկվայում գրասենյակներից, կրճատել ծախսերը և գործնականում դադարեցնել համագործակցությունը ազատ գործող լրագրողների հետ։
Meduza-ին որպես անցանկալի կազմակերպություն ճանաչելու որոշումից հետո հրատարակությունը դադարեցրել է նշել իր նյութերը որպես «օտարերկրյա գործակալի»։
Meduza-ն հրապարակում է լրագրողական հանրության արձագանքները Ռուսաստանի իշխանությունների որոշմանը։Meduza-ին աջակցել են, մասնավորապես, Dozhd-ը, Republic-ը , Paper-ը, Novaya Gazeta. Եվրոպա-ն, մի շարք այլ լրատվամիջոցներ, խմբագիրներ և լրագրողներ:
Եվրոպայի խորհրդի Խորհրդարանական վեհաժողովը (ԵԽԽՎ) հինգշաբթի օրը պահանջել է ստեղծել հատուկ միջազգային տրիբունալ՝ Ուկրաինայի դեմ պատերազմ սկսելու համար ռուսաստանցի և բելառուսցի առաջնորդներին պատասխանատվության ենթարկելու համար։
Ձայների 100 կողմ և 1 ձեռնպահ հարաբերակցությամբ Եվրոպայի խորհրդի անդամ 46 երկրների ներկայացուցիչներն ընդունեցին բանաձև՝ ուղղված քաղաքացիական և զինվորական առաջնորդների դեմ, ովքեր «ծրագրել, նախապատրաստել, սկսել կամ իրականացրել են» ագրեսիա Ուկրաինայի դեմ: Անուններ չեն նշվել։
Եվրոպայի խորհուրդը միավորում է ավելի շատ երկրներ, քան Եվրամիությունը, ներառյալ՝ նախկին խորհրդային հանրապետությունները, ինչպիսին են Հայաստանը և Ադրբեջանը, Մոլդովան: Հայաստանի պատվիրակները քվեարկությանը չեն մասնակցել, ադրբեջանցի երկու խորհրդարանական կողմ է քվեարկել բանաձևին:
Եվրախորհրդարանը, որը ներկայացնում է Եվրամիության անդամ 27 երկրները, նախորդ շաբաթ նմանատիպ տեքստ է ընդունել:
Ուկրաինայի նախագահ Վլադիմիր Զելենսկին այսօր ասել է, թե հետաքրքրված չէ Ռուսաստանի նախագահ Վլադիմիր Պուտինի հետ բանակցություններով:
«Դրանք [բանակցությունները] ինձ համար հետաքրքիր չեն: Հետաքրքրված չեմ հանդիպել նրան, զրուցել նրա հետ: Ես իսկապես չեմ հասկանում, թե ով է հիմա որոշումներ կայացնում Ռուսաստանում»,- ասել է Զելենսկին Sky News բրիտանական հեռուստաընկերությանը տված հարցազրույցում:
Նա ավելացրել է, թե Ռուսաստանի նախաձեռնած «հատուկ ռազմական օպերացիայից» հետո Պուտինն իր համար «ոչ ոք է դարձել»:
Ավելի վաղ Զելենսկին հատուկ հրամանագրով արգելել է բանակցություններ վարել Ռուսաստանի հետ:
Կրեմլի խոսնակ Դմիտրի Պեսկովն այդ կապակցությամբ ասել է, որ Մոսկվայի և Կիևի բանակցությունները հիմա իսկապես անհնարին են, «քանի որ դրանց համար պայմաններ չկան ոչ դե-ֆակտո, ոչ էլ դե-յուրե»:
Ռուսաստանն այսօր նորից հրթիռակոծել է Ուկրաինայի բնակավայրերը: Դրան վաղ առավոտյան նախորդել է մարտական ԱԹՍ-ների գրոհը: Զոհվել է 11 մարդ, նրանցից առնվազն մեկը՝ մայրաքաղաք Կիևում:
Պայթյուններ են որոտացել նաև Դնեպրոպետրովսկի, Վիննիցայի, Օդեսայի և Զապորոժիեի շրջաններում: Կիևում բնակիչներն ապաստանել են մետրոյի ստորգետնյա կայաններում:
Ռուսները թիրախավորել են կենսական նշանակության ենթակառուցվածքը, մասնավորապես, էներգետիկայի համակարգը: Մի շարք շրջաններում հոսանքի մատակարարումն ընդհատվել է:
Ուկրաինացիներն այսօր հաղորդել են առնվազն 24 ռուսական գրոհային անօդաչուներ վայր գցելու մասին: Ռուսները Կիևի վրա ավելի քան 15 հրթիռ են արձակել: