«Անհավանական է, բայց փաստ է՝ մեզ կրկին սպառնում են գերմանական Leopard տանկերով, որոնց վրա խաչեր կան», - հայտարարել է Ռուսաստանի նախագահ Վլադիմիր Պուտինը՝ առաջին անգամ մեկնաբանելով գերմանական տանկեր Կիև մատակարարելու Բեռլինի որոշումը։
Ելույթ ունենալով Վոլգոգրադում Ստալինգրադի ճակատամարտում տարած հաղթանակի 80-ամյակին նվիրված համերգին, Պուտինը պնդել է, թե Ռուսաստանը արևմտյան տանկերի, այդ թվում՝ Leopard-ների մատակարարմանն էլ կարող է պատասխանել , «և զրահատեխնիկայի կիրառմամբ էլ գործը չի ավարտվի»։
Ամիսներ տևած քննարկումների արդյունքում ընդունված որոշման մասին խոսելիս Գերմանիայի կանցլեր Օլաֆ Շոլցը Բունդեսթագում հայտարարել է, որ Բեռլինը կանի ամեն հնարավորը՝ թույլ չտալու, որպեսզի պատերազմը վերածվի Մոսկվայի և ՆԱՏՕ-ի միջև հակամարտության։
Եվրահանձնաժողովի ղեկավար Ուրսուլա ֆոն դեր Լայենը և 15 եվրոկոմիսարներ ժամանել են Կիև։ Պաշտոնական աղբյուրների համաձայն՝ Ուկրաինայի իշխանությունների հետ նախատեսված հանդիպումների օրակարգում ԵՄ-ին Կիևի անդամակցությանը հարցն է։
Ըստ Եվրահանձնաժողովի հաղորդագրության, քննարկումների ընթացքում կողմերը «կարծիքներ կփոխանակեն ԵՄ-ի և Ուկրաինայի միջև համագործակցության բազմաթիվ ոլորտների շուրջ, կքննարկեն ապագա վերակառուցումը, ինչպես նաև երկրի եվրոպական ուղին»:
Կիևում նախատեսված Ուկրաինա-Եվրոպական միություն գագաթնաժողովի ընթացքում Բրյուսելը, ինչպես ակնկալվում է, առաջին անգամ բարձր մակարդակով գնահատական կտա, թե որքանով է Ուկրաինան մոտեցել Եվրամիության անդամակցությանը վերջին յոթ ամսվա ընթացքում։
Երկիրը դաշինքին միանալու հայտ է ներկայացրել անցած գարնանը և արդեն հունիսին ստացել անդամակցության թեկնածուի կարգավիճակ։
Առնվազն հինգ մարդ վնասվածքներ է ստացել Կրամատորսկի վրա հրթիռային նոր հարվածների հետևանքով, հայտնել է Դոնեցկի շրջվարչակազմի ղեկավար Պավել Կիրիլենկոն: Նրա խոսքերով՝ վնասվել են մի շարք բնակելի շենքեր, դպրոց, մեքենաներ։
Երեկ երեկոյան ևս հաղորդվել էր ռուսական ուժերի կողմից Կրամատորսկի հրթիռակոծության մասին, որի հետևանքով առնվազն 3 մարդ զոհվել է, ևս 20-ը՝ վիրավորվել։
Ռուսաստանի պաշտպանության նախարարության ներկայացուցիչ Իգոր Կոնաշենկովը հայտարարել է, որ ռուս զինվորականների թիրախը Կրամատորսկում HIMARS և MLRS հրթիռային կայաններն են եղել, որոնք ոչնչացվել են։
Առնվազն ութ մարդ է զոհվել Ղրիմի Սևաստոպոլ քաղաքում անցած գիշեր շինարարների ժամանակավոր կացարանում բռնկված հրդեհի հետևանքով։ Սևաստոպոլի նահանգապետ Միխայիլ Ռազվոժաևի խոսքերով՝ հրդեհը բռնկվել է Տավրիդա մայրուղու՝ Սևաստոպոլ և Սիմֆերոպոլ քաղաքները միացնող նոր ճանապարհի կառուցման աշխատողների կեցավայրում։
Ռուսաստանի արտակարգ իրավիճակների նախարարության տվյալներով` ութ զոհից բացի, ևս երկու մարդ էլ վնասվածքներ է ստացել։ Ըստ Ռուսաստանի կողմից բռնակցված թերակղզու իշխանությունների, հրդեհը տեղի է ունեցել էլեկտրական սարքի կարճ միացման հետևանքով։
Ուկրաինայի Դոնեցկի մարզի Կրամատորսկ քաղաքում հրթիռակոծության հետևանքով բազմաբնակարան շենք է փլվել։ Դոնեցկի շրջանային ռազմական վարչակազմի ղեկավար Պավել Կիրիլենկոյի խոսքով՝ առնվազն 3 մարդ զոհվել է, ևս 20-ը՝ վիրավորվել։ Ուկրաինացի պաշտոնյան նշել է, որ ամենայն հավանականությամբ՝ փլատակներում ևս մարդիկ կան:
Ուկրաինայի պաշտոնական աղբյուրների համաձայն՝ ռուսական զորքերն «Իսկանդեր-Կ» հրթիռով հարվածել են քաղաքի բնակելի հատվածին՝ վնասելով առնվազն 8 բազմաբնակարան շենք։
Ռուսական կողմը դեռևս չի մեկնաբանել հրթիռակոծությունը։
Կրամատորսկը ուկրաինացի զինվորականների վերահսկողության տակ է, քաղաքը գտնվում է Բախմուտ քաղաքից մի քանի տասնյակ կիլոմետր հեռավորության վրա, որը ռուսական ուժերի հարձակման թիրախում է, քաղաքի շուրջ պատերազմի մեկնարկից ի վեր ամենակատաղի մարտերն են մղվում:
ՆԱՏՕ-ի գլխավոր քարտուղար Յենս Ստոլտենբերգն այս շաբաթ ուղևորության ժամանակ, որը ներառում էր կանգառներ Սեուլում և Տոկիոյում, կոչ արեց ավելի շատ ռազմական օգնություն ցուցաբերել Ուկրաինային՝ որպես օրինակ մատնանշելով եվրոպական երկրները:
Հարավային Կորեան և Ճապոնիան արդեն Ուկրաինային ոչ մահաբեր ռազմական տեխնիկա են նվիրաբերել՝ ներառյալ զրահաբաճկոններ և սաղավարտներ, Սեուլը նաև հավանություն է տվել ուկրաինացի զինվորականներին մատակարարող երկրներին հարավկորեական արտադրության զենքի վաճառքին։ Սակայն երկու պետություններից ոչ մեկը զենք չի առաքել անմիջապես Ուկրաինա՝ մասամբ նույն իրավական սահմանափակումների պատճառով, որոնք հետ են պահում եվրոպական շատ երկրներին:
Ո՛չ Հարավային Կորեան, ո՛չ Ճապոնիան Ուկրաինայի նկատմամբ իրենց քաղաքականությունը փոխելու մտադրություն ցույց չտվեցին։ Այնուամենայնիվ, Ստոլտենբերգի մեկնաբանությունները հուշում են, որ Արևմուտքը կարող է ավելի ու ավելի մեծ ճնշում գործադրել նրանց վրա ռազմական օգնություն տրամադրելու համար, նկատում են վերլուծաբանները:
Վրաստանի իշխանությունները ուկրաինացի ժողովրդի արյան գնով ցանկանում են վերադարձնել Ռուսաստանի օկուպացրած տարածքները՝ միևնույն ժամանակ ծաղրելով Ուկրաինայի քաղաքացուն՝ Վրաստանի նախկին նախագահ Միխեիլ Սաակաշվիլիին: Նման հայտարարությամբ է հանդես եկել Ուկրաինայի Անվտանգության և պաշտպանության խորհրդի քարտուղար Ալեքսեյ Դանիլովը։
«Ես լսել եմ Վրաստանի նախագահի հայտարարությունը, ով կարծում է, որ մենք Ռուսաստանի հետ ինչ-որ խաղաղության համաձայնագրեր կստորագրենք։ Նա ինչ-որ երազում է, թե մենք դրանում պետք է ներառենք Վրաստանի այն հատվածը, որն Ռուսաստանը օկուպացրել է 2008 թվականին։ Բայց երբ ես մարտին ելույթ ունենալով վրացի եղբայրներին ասացի՝ «եկեք օգնեք և մենք միասին կաշխատենք», Վրաստանը՝ ի դեմս այդ նույն մարդկանց, լռեց և նույնիսկ նկատողություն արեց, որ ես խառնվում եմ իրենց գործերին», - ասել է Դանիլովը:
Վրաստանի նախագահ Սալոմե Զուրաբիշվիլին հայտարարել է` ռուս-ուկրաինական հակամարտության քաղաքական կարգավորման բանակցություններում պետք է պահանջել, որ ռուսները հեռանան ոչ միաjն Ուկրաինայի, այլև Վրաստանի օկուպացված տարածքներից՝ Աբխազիայից և Հարավային Օսիայից։
Bloomberg կայքում նախօրեին հրապարակված հարցազրույցում Զուրաբիշվիլին ասել է, որ Ռուսաստանը պարտվել է բոլոր ճակատամարտերը, եթե ոչ՝ պատերազմը, և ապագա դիվանագիտական կարգավորումը պետք է ներառի նաև Աբխազիայից ու Հարավային Օսիայից ռուսական զորքերը դուրս բերելու հարցը։
Նրա խոսքով՝ վրացական հարցը պարզապես պարտավոր է լինել բանակցությունների սեղանին, չի կարելի անգամ մտածել, որ այս պատերազմը կավարտվի առանց Ռուսաստանի նահանջի բոլոր օկուպացված տարածքներից։
Ռուսական ուժերը Դոնեցկում Բախմուտի և Ուգլեդարի ուղղություններով շարունակում են հարձակողական գործողությունները։
Դոնեցկի ռուսական վարչակազմի ղեկվարի օգնական Յան Գագինը պետական հեռուստաընկերությամբ ասել է, թե Բախմուտը ներկա դրությամբ օպերատիվ շրջափակված է, ռուսական ուժերը փակում են քաղաքի շուրջ օղակը։
«Հիմա մարտեր են ընթանում Բախմուտը հարևան Չասով Յար քաղաքի հետ կապող մայրուղին վերահսկողության տակ վերցնելու համար»,- ասել է նա։
Հաղորդելով ռուսական կողմի պնդումները՝ «Ռոյթերսը» նշում է, որ անկախ աղբյուրներից այս պահին հնարավոր չէ ճշտել այդ տեղեկատվությունը։
Բախմուտի համար պայքարը կես տարի շարունակվում է, վերջին շրջանում ռուսական ուժերը հաղորդել էին քաղաքի շուրջ մի քանի գյուղեր գրավելու մասին։
Մինչ պատերազմը Բախմուտում 70 հազար մարդ էր ապրում, հիմա մնացել են մի քանի հազարը։ Ոստիկանության աշխատակից Պավլո Դյաչենկոն ասել է, որ հանդիպում են մնացած բնակիչներին՝ համոզելու տարհանվել քաղաքից։ Օրերս նրանք վեցամյա Ալինային տեղափոխել են Սլավյանսկ, որտեղ նա միացել է ընտանիքին։ Ալինան Բախմուտում մնացել էր ռուսների կողմից հրետակոծված շենքում, պապիկի ու տատիկի հետ։ Պավլո Դյաչենկոյի խոսքով՝ Բախմուտում դեռ մոտավորապես 200 երեխա կա։
Պատերազմի ուսումնասիրության ինստիտուտը հաղորդում է, որ ռուսական հրամանատարությունը կադրային զինվորականների խոշոր ստորաբաժանումներ է ուղարկել Բախմուտ՝ «Վագների» վարձկաններին օգնելու շարունակել հարձակման տեմպերը։ Ռուսներրը փորձում են հյուսիսից ու հարավից քաղաքը շրջափակելու վտանգներ ստեղծել՝ ուկրաինական ուժերին ստիպելու դուրս գալ քաղաքից։ Ուկրաինական կայազորը մատակարարումների, իսկ անհրաժեշտության դեպքում հեռանալու երկու ճանապարհ ունի՝ արևմտյան ուղղությամբ դեպի Չասով Յար, կամ Կրասնոե։
«ՆԱՏՕ-ն [Մոսկվայի հետ հարաբերություններում] շարունակում է բարձրացնել խաղադրույքները, քանի որ Ռուսաստանի ռազմավարական պարտության մասին երազանքներն Արևմուտքում դեռ պահպանվում են։ Նման բան, սակայն, չի լինի»,- «Ռիա Նովոստի» գործակալության հետ զրույցում հայտարարել է Ռուսաստանի արտաքին հետախուզության ծառայության (СВР) տնօրեն Սերգեյ Նարիշկինը։
«Մենք արձանագրում ենք Կիևի խամաճիկային վարչակազմին տրամադրվող սպառազինության քանակի և տեսականու ընդլայնումն, ինչը բացատրվում է հետևյալ տրամաբանությամբ՝ Միացյալ Նահանգները, դրա դաշնակիցները հաստատակամ են Ռուսաստանի հետ պատերազմել մինչև վերջին ուկրաինացին», - ասել է ռուսական արտաքին հետախուզության պետը։