Մեծ Բրիտանիան այսօր՝ Ուկրաինայի նախագահ Վլադիմիր Զելենսկու Լոնդոն կատարած այցի օրը, նոր պատժամիջոցներ է սահմանել Ռուսաստանի նկատմամբ:
Ցանկը հրապարակվել է կառավարության պաշտոնական կայքէջում, որտեղ նշվում է, որ «պատժամիջոցների են ենթարկվում Ռուսաստանի ռազմարդյունաբերական համալիրի ձեռնարկությունները և Վլադիմիր Պուտինի իշխանության ու հարստությունների հետ առնչություն ունեցող անձինք»:
Պատժամիջոցների ցանկում են Ձեռներեցների իրավունքների հարցով նախագահի լիազոր ներկայացուցիչ Բորիս Տիտովը, նրա որդին՝ գործարար Պավել Տիտովը, Regnum գործակալության սեփականատեր Սերգեյ Ռուդնովը:
Այդ ցուցակում է «Ռոսիա» դրամատան բաժնետեր Սվետլանա Կրիվոնոգիխը: Ըստ «Պրոյեկտ» վերլուծական կենտրոնի անցկացրած հետաքննության, նրա ակտիվները հասնում են 7 միլիարդ 700 միլիո ռուբլու: Այդ գումարը հավասար է մոտ 100 միլիոն դոլարի:
«Կրիվոնոգիխն ունի դուստր, ով արտաքինով աներևակայելի աստիճանի նման է Ռուսաստանի նախագահին»,- գրել է «Պրոյեկտը»:
Սանկցիաների են ենթարկվել նաև «Աերոստարտ» ընկերության ղեկավար Վիկտոր Մյաչինը, «Ռ-Ֆարմ» ընկերության տնօրենների խորհրդի նախագահ Ալեքսեյ Ռեպիկը, «Միավորված էներգետիկ համակարգեր» ընկերության տնօրենների խորհրդի փոխնախագահ Եվգենի Շկլովը և «Էներգետիկա. Համագործակցություն. Հաջողություն» ընկերության սեփականատեր Նիկոլայ Եգորովը:
Ռուս-ուկրաինական պատերազմի մեկնարկից ի վեր Լոնդոնը պատժամիջոցներ է սահմանել Ռուսաստանի ավելի քան 1300 ֆիզիկական և իրավաբանական անձանց նկատմամբ:
Ուկրաինայի նախագահ Վլադիմիր Զելենսկին այսօր կայցելի Լոնդոն, որտեղ կհանդիպի Մեծ Բրիտանիայի և Հյուսիսային Իռլանդիայի Միացյալ Թագավորության վարչապետ Ռիշի Սունակի հետ և ելույթ կունենա խորհրդարանում:
Բացի այդ, Զելենսկին կայցելի Բրիտանիայում ուսումնական դասընթացների մասնակցող ուկրաինացի զինծառայողներին:
BBC հեռուստառադիոկայանի փոխանցմամբ, ենթադրվում է, որ Լոնդոնն այսօր կհայտարարի Ռուսաստանի նկատմամբ նոր պատժամիջոցների մասին:
Զելենսկու այցը Լոնդոն նրա երրորդ միջազգային ուղևորությունն է անցյալ տարվա փետրվարի 24-ին մեկնարկած պատերազմի ընթացքում և առաջինն այս տարում:
Pianistico միջազգային երաժշտական մրցույթի ղեկավարները չեղյալ են հայտարարել Բերգայում և Բրեշայում ռուսաստանցի աշխարհահռչակ դաշնակահար Դենիս Մացուևի ելույթները:
Փառատոնի կայքում ասվում է, որ այդ որոշումն ընդունվել է Ռուսաստանի քայլերը և նախագահ Վլադիմիր Պուտինի քաղաքականությունը բազմիցս անվերապահորեն հրապարակավ սատարելու Մացուևի դիրքորոշման առնչությամբ:
Ավելի վաղ Arts Against Aggression («Արվեստներն ագրեսիայի դեմ») կազմակերպության ակտիվիստները, ինչպես նաև Իտալիայում Ուկրաինայի դեսպան Յարոսլավ Մելնիկը Բերգամոյի և Բրեշայի քաղաքապետերին դիմել են Մացուևի համերգներն արգելելու ուղերձներով:
«Ուկրաինայի ժողովրդի հանդեպ մեր կարեկցանքից դրդված և ուկրաինացիներին առավել քան երբևէ մեր դրկիցները համարելով՝ մենք խնդրում ենք Pianistico փառատոնին չեղյալ հայտարարել Դենիս Մացուևի համերգները», - ասվում է Բերգամոյի և Բրեշայի քաղաքապետերի պատասխան նամակում:
Arts Against Aggression կազմակերպությունը փորձում է նաև հասնել Արեցոյում՝ Պետրարկայի թատրոնում ռուսաստանցի օպերային երգչուհի Աննա Նետրեբկոյի համերգների չեղարկմանը, քանի որ երգչուհին հանդիսացել է Պուտինի վստահված անձը: Անցյալ տարվա փետրվարին նա ասել է, թե դատապարտում է պատերազմը, բայց մնում է հայրենասեր և ռուսական մշակույթի նվիրյալ:
ԱՄՆ Պետդեպարտամենտը հավանություն է տվել Լեհաստանին հեռահար հրթիռների և արձակման կայանների հնարավոր վաճառքին մինչև 10 միլիարդ դոլար արժողությամբ գործարքի շրջանակում, երեքշաբթի օրը հայտնել է Պենտագոնը:
Լեհաստանն ակտիվորեն արդիականացնում է իր զինված ուժերը՝ միաժամանակ իր հին զենքերի մի մասը նվիրաբերելով հարևան Ուկրաինային՝ ռուսական ներխուժման դեմ պայքարելու համար:
Պոտենցիալ վաճառքը ներառում է հեշտ տեղաշարժվող HIMARS հրետանային հրթիռային համակարգերը, որոնց օգտագործումը Կիևին հնարավորություն է տվել առաջադիմել մարտի դաշտում։
ԱՄՆ-ը մերժել է ATACMS հրթիռներ փոխանցելու Ուկրաինայի խնդրանքը և Լեհաստանին թույլ չի տա դրանք փոխանցել Ուկրաինային առանց իր հավանության։
Լեհաստանը զորավարժություն է անցկացրել ամերիկյան Patriot համակարգերով:
Լեհաստանի պաշտպանության նախարար Մարիուշ Բլաշչակն ասել է, թե բոլորը գիտեն, որ արևելյան սահմանին պատերազմ է, և անցկացվող զորավարժությունների նպատակը ագրեսորին զսպելն է։
«Մենք ցուցադրում ենք լեհական բանակի մարտունակությունը»,- ասել է նա, նշելով նաև, որ Ուկրաինայի պատերազմի փորձը ցույց է տալիս, թե որքան կարևոր է ապահովել հակաօդային ու հակահրթիռային պաշտպանությունը։
Patriot համակարգերը համարվում են հակաօդային պաշտպանության ամենաառաջատար միջոցներից մեկը, որն ընդգրկված է ՆԱՏՕ-ի սպառազինությունների մեջ։
Patriot -ը առաջին անգամ կիրառվել է 1991 թվականին՝ Ծոցի պատերազմում պաշտպանելով Սաուդյան Արաբիային, Քուվեյթին ու Իսրայելին։
Անցած դեկտեմբերին ԱՄՆ-ն հայտնեց Patriot համակարգեր Ուկրաինային տրամադրելու մասին՝ ռուսական ագրեսիային, օդային հարձակումներին դիմակայելու համար։
Ռուսաստանի պաշտպանության նախարար Սերգեյ Շոյգուն այսօր հեռախոսակապով անցկացրած խորհրդակցության ժամանակ ասել է, որ չնայած արևմտյան երկրների կողմից Կիևին ցուցաբերվող ռազմական աննախադեպ օգնությանը՝ ուկրաինական զինված ուժերը շարունակում են զգալի կորուստներ կրել։ Նրա ասելով՝ հունվարին ուկրաինացի 6 հազար 500 զինծառայող է զոհվել, խոցվել է 26 ռազմական օդանավ, 7 ուղղաթիռ, 208 անօդաչու թռչող սարք։ Շոյգուի բերած տվյալներով` ուկրաինական բանակը նաև 341 տանկ և զրահամեքենա է կորցրել ու համազարկային կրակի 40 ռեակտիվ համակարգ։
Շոյգուն հավաստիացրել է, որ Ուգլեդարի և Արտյոմովսկի (Բախմուտի) ուղղություններով մարտական գործողությունները հաջող են զարգանում։
Գերագույն ռադան Ուկրաինայի ներքին գործերի նախարար նշանակեց Իգոր Կլիմենկոյին։ Իշխող ուժի խմբակցության պատգամավոր Յարոսլավ Ժելեզնյակը սոցցանցում գրել է, որ Կլիմենկոյին ներկայացրել է վարչապետը, 321 պատգամավոր պաշտպանել է նրա առաջարկը։
2023 թվականի հունվարի 18-ին ուղղաթիռի աղետի հետևանքով զոհվեցին Ուկրաինայի ներքին գործերի նախկին նախարար Դենիս Մոնաստիրսկին ու նախարարության բարձրաստիճան այլ պաշտոնյաներ։
Իգոր Կլիմենկոն մինչ այս ղեկավարում էր Ուկրաինայի ազգային ոստիկանությունը։
Գերագույն ռադան այսօր հաստատեց Ուկրաինայի նախագահի առաջարկը՝ անվտանգության ծառայության ղեկավար նշանակվեց գեներալ Վասիլի Մալյուկը։
Շուրջ յոթ ամիս նա փաստացի ղեկավարում էր այդ կառույցը՝ 2022-ի հուլիսից կատարելով անվտանգության ծառայության ղեկավարի պարտականությունները։
Այսօր վաղ առավոտյան Մոսկվայից 120 կիլոմետր հարավ-արևմուտք գտնվող Կալուգայի մարզում անօդաչու թռչող սարք է պայթել։ Այս մասին սոցիալական ցանցերում արված գրառմամբ տեղեկացրել է Կալուգայի նահանգապետ Վլադիսլավ Շապշան։
Պաշտոնյայի խոսքով՝ ԱԹՍ-ն պայթել է մարզի անտառներից մեկում՝ 50 մետր բարձրության վրա։ Դրոնի պատկանելության մասին ռուսական աղբյուրները չեն հաղորդում։
Սա Կալուգայի մարզում անօդաչու թռչող սարքի ի հայտ գալու երկրորդ դեպքն է։ Առաջին անգամ մարզի տարածքում հարվածային դրոններ խոցվել էին հոկտեմբերի 12-ին՝ «Շայովկա» ավիաբազայի մերձակայքում։ Այստեղ տեղակայված է Ռուսաստանի ԶՈւ 52-րդ գվարդիական ավիացիոն գունդը։
Ռուսաստանը և Իրանը ծրագրում են Ռուսաստանի տարածքում ձեռնարկություն բացել՝ արտադրելու իրանական անօդաչու թռչող սարքեր՝ նման այն դրոններին, որոնք ռուսական բանակն օգտագործում է Ուկրաինայի վրա հարձակումների ժամանակ։ Այդ մասին գրում է The Wall Street Journal-ը՝ վկայակոչելով իր աղբյուրները։
Ըստ հրապարակման զրուցակիցների՝ հունվարի 5-ին իրանական պատվիրակությունը ժամանել է Ռուսաստանի Թաթարստան հանրապետության Ելաբուգա քաղաք, այցելել դատարկ տեղանք, որտեղ ապագայում նախատեսվում է գործարան կառուցել:
Տեղեկության համաձայն՝ նոր ձեռնարկությունը կկարողանա արտադրել առնվազն 6 հազար անօդաչու թռչող սարք։ Երկու երկրները նախատեսում են նաև արտադրել ավելի արագաշարժ անօդաչու թռչող սարք, որը նվազ խոցելի կլինի Ուկրաինայի հակաօդային պաշտպանության համար, հայտնում է WSJ-ը:
Նախագիծը երկու երկրների միջև 1 միլիարդ դոլար արժողությամբ գործարքի մի մասն է:
Ռուսաստանցի և իրանցի պաշտոնյաները չեն արձագանքել թերթի խնդրանքներին՝ մեկնաբանել այս տեղեկությունները, նշում է The Wall Street Journal-ը: