Մոսկվայի Տրետյակովյան պատկերասրահի տնօրենը լքում է պաշտոնը։ Ռուսաստանյան հեղինակավոր արվեստի թանգարանի ղեկավար Զելֆիրա Տրոգուլովան հրաժարական է տվել պատերազմին աջակցող խմբերի կողմից իր հասցեին քննադատությունների ֆոնին։
2015 թվականից թանգարանը ղեկավարող Տրոգուլովան առայժմ չի մեկնաբանել իր հեռացումը։
Անցած նոյեմբերին պատկերասրահում չեղարկվել էր Մոսկվայի ժամանակակից արվեստի բիենալեն՝ պատճառների թվում նշվել էր «ցուցանմուշների անհամապատասխանությունը տարածքին»։ "Комсомолская правда" թերթը, մինչդեռ, գրել է, որ պատկերասրահի ղեկավարությունը դեմ է արտահայտվել Դոնեցկի և Լուգանսկի արվեստագետների հայրենասիրական բնույթի աշխատանքների ցուցադրությանը:
Ռուսաստանի պաշտպանության նախարարությունը հայտարարել է, որ ռուսական ուժերը շարունակում են հարձակողական գործողությունները Ուկրաինայի Դոնեցկի մարզում և ոչնչացրել են հրետանու չորս պահեստ:
Իր ամենօրյա ճեպազրույցում նախարարության պաշտոնական ներկայացուցիչ Իգոր Կոնաշենկովը հայտնել է, որ ռուսական բանակը նաև ոչնչացրել է ամերիկյան արտադրության ռադիոտեղորոշման համակարգ և M109 Paladin հրետանային համակարգ:
Պաշտոնական Կիևն առայժմ չի մեկնաբանել ռուսական կողմի այս պնդումները:
Ճապոնական հետախուզության տվյալներով՝ Ուկրաինայում ռազմական գործողությունների ընթացքում սպանվել է երկու տասնյակից ավելի ռուսաստանցի գեներալ։
«Նիկկեյ» ճապոնական թերթի համաձայն՝ այդ տվյալները Տոկիոն ստացել է ԱՄՆ-ի և Եվրոպայի հետախուզական ծառայությունների հետ համագործակցության արդյունքում։ Հրապարակման մեջ կորուստների ցանկ, մահացածների անուններ չեն նշվում:
Երեկ երեկոյան Վլադիմիր Զելենսկին Փարիզում Էմանյուել Մակրոնի և Օլաֆ Շոլցի հետ հանդիպման ժամանակ խնդրել է «որքան հնարավոր է արագ» մատակարարել ծանր սպառազինություն և ռազմական ինքնաթիռներ։ Փարիզից առաջ Զելենսկին Լոնդոնում էր, որտեղ ևս ռազմական աջակցություն է խնդրել։
«Որքան արագ Ուկրաինան ստանա ծանր սպառազինություն, ինքնաթիռներ, այնքան շուտ կավարտվի ռուսական ագրեսիան, և մենք կկարողանանք վերադարձնել խաղաղությունը Եվրոպային», - հայտարարել է Ուկրաինայի նախագահը:
«Մենք աջակցում ենք Ուկրաինային և մտադիր ենք հասցնել հաղթանակի», - ի պատասխան՝ հայտարարել է Մակրոնը և հավելել, որ Ուկրաինան այդ հարցում կարող է վստահել Ֆրանսիային և դաշնակիցներին, ու Ռուսաստանը չպետք է հաղթի այս պատերազմում:
Գերմանիայի կանցլերն իր հերթին է պատրաստակամություն հայտնել աջակցելու Ուկրաինային՝ «այնքան, որքան անհրաժեշտ կլինի»։
Միացյալ Նահանգների պետքարտուղարը և ՆԱՏՕ-ի գլխավոր քարտուղարը չորեքշաբթի օրը խոստացել են «առավելագույն հնարավոր» օգնություն ցուցաբերել Ուկրաինային։ Էնթոնի Բլինքենը և Յենս Ստոլտենբերգը հայտարարությունն արել են Վաշինգտոնում բանակցություններին հաջորդած համատեղ ասուլիսի ժամանակ։
Ստոլտենբերգը նշել է, որ ՆԱՏՕ-ի գործընկերները «ինչպես նախկինում երբեք» հանդես են գալիս միասին՝ կապված Ուկրաինայում ռուսական ագրեսիայի հետ։
Հյուսիսատլանտյան դաշինքի գլխավոր քարտուղարն ընդգծել է, որ Ռուսաստանի նախագահ Վլադիմիր Պուտինի կողմից անօրինական ռազմական ագրեսիան սկսելուց ի վեր ՆԱՏՕ-ի դաշնակիցներն աննախադեպ աջակցություն են ցուցաբերել Ուկրաինային՝ երկրին տրամադրելով մոտ 120 միլիարդ դոլարի ռազմական, հումանիտար և ֆինանսական օգնություն:
Դաշինքը պետք է համոզվի, որ ուկրաինացիներն ունեն այն ամենը, ինչ անհրաժեշտ է այս ագրեսիան զսպելու համար, ասել է Ստոլտենբերգը:
Եվրամիության արտաքին քաղաքականության ծառայությունը հրապարակել է համաշխարհային տեղեկատվական տարածքում ապատեղեկատվության և փաստերի մանիպուլյացիայի 2022 թվականի զեկույցը, որտեղ Ռուսաստանը ճանաչված է «տարվա երկիր» ապատեղեկատվություն տարածելու ասպարեզում:
Ռուսական տեղեկատվական գրոհների գլխավոր թեման Ռուսաստանի պատերազմն է Ուկրաինայի դեմ: Ինֆորմացիայի մեծ մասը նպատակ ունի արդարացնել Ռուսաստանի ներխուժումը: Տեղեկատվական գրոհների երկրորդ նպատակը Եվրամիությանը և նրա անդամ երկրներին վարկաբեկելն է, նշված է զեկույցում:
Բրիտանական արտադրության Challenger 2 տեսակի հրասայլերն այս տարվա մարտին կհասնեն Ուկրաինա:
Այդ մասին Դորսեթի կոմսությունում տեղակայված ռազմակայանում Ուկրաինայի նախագահ Վլադիմիր Զելենսկու հետ համատեղ ասուլիսում հայտնել է Մեծ Բրիտանիայի վարչապետ Ռիշի Սունակը:
«Մենք և մեր դաշնակիցներն արագացնում ենք տեխնիկայի փոխադրումն Ուկրաինա: Այն առաջնագիծ կհասնի ոչ թե շաբաթներ, ամիսներ կամ տարիներ անց, այլ արդեն մի քանի շաբաթից։ Բրիտանիայում պատրաստություն անցնելու համար նախորդ շաբաթ ժամանած ուկրաիինական անձնակազմերը հաջորդ ամսվանից Challenger 2 տանկերով կպաշտպանեն Ուկրաինայի ինքնիշխան տարածքը»,- հայտարարել է Սունակը:
Ռուսաստանի Դաշնության արտաքին գործերի նախարարությունն այսօր հաղորդել է, թե «ի պատասխան Վաշինգտոնի կողմից ռուսաստանցիների նկատմամբ պատժամիջոցների ցանկի ընդարձակման, Ռուսաստանը մշտական կարգով արգելում է 77 ամերիկացիների մուտքը Դաշնություն»:
Այդ ցանկում են ոչ միայն ամերիկացի պետական և քաղաքական գործիչներ, այլև նրանց ընտանիքների անդամները:
Պատժամիջոցների են ենթարկվել, մասնավորապես, Վաշինգտոնի, Նյու Մեքսիկոյի նահանգապետերը, Կենտուկի նահանգի նահանգապետի դուստրը, Կալիֆորնիայի նահանգապետի կինը և այլ անձինք:
«Եվս մեկ անգամ կրկնում ենք, որ Մոսկվայի նկատմամբ Վաշինգտոնի սանկցիաները բումերանգի վերադարձի օրենքով կհարվածեն ԱՄՆ-ին»,- ասվում է ՌԴ ԱԳՆ հայտարարությունում:
Ռուսաստանի պաշտպանության նախարարության խոսնակ Իգոր Կոոնաշենկովն այսօր զեկուցել է ուկրաինական թիրախներին հասցված հարվածների մասին:
Նրա հավաստիացմամբ՝ Դոնեցկի ուղղությամբ ռուսներն անցած մեկ օրում ոչնչացրել են 180 ուկրաինացի զինծառայողների, մեկ հրասայլ, մեկ մեքենա և «Մստա-Բ» տեսակի մեկ հաուբից:
Սլավյանսկի և Ավդեևկայի շրջաններում ոչնչացվել է Ուկրաինայի բանակի զինապահեստ:
«Ռուսական ուժերը Խարկովում ոչնչացրել են ԱԹՍ-ների և այդ թվում «կամիկաձե» տեսակի անօդաչուների արդիականացման և սպասարկման գործարանը»,- ասել է Կոնաշենկովը:
Մեծ Բրիտանիայի վարչապետ Ռիշի Սունակն այսօր Լոնդոն այցելած Ուկրաինայի նախագահ Վլադիմիր Զելենսկուն ասել է, որ ցանկանում է այս տարի տեսնել պատերազմում Ուկրաինայի վճռական հաղթանակը:
«Պարոն նախագահող, մեր նպատակն է նպաստել այս կոնֆլիկտում Ուկրաինայի հաղթանակին, չի կարելի որևէ կերպ թույլ տալ Վլադիմիր Պուտինի ագրեսիայի հաջողությունը: Դրա համար էլ մենք ավելացնում ենք մեր աջակցությունն Ուկրաինային»,- ասել է Սունակը:
Նա նշել է, որ Զելենսկու հետ քննարկել է Լոնդոնի աջակցությունը Միջազգային քրեական դատարանում Ռուսաստանի հանցանքները քննելու գործում:
Նախագահ Զելենսկին շնորհակալություն է հայտնել Ուկրաինային տրամադրվող օգնության համար: Լոնդոնից Զելենսկին կմեկնի Բրյուսել: