Ուկրաինայի Խերսոնի և Սումիի շրջանները կիրակի օրը հրետակոծվել են ռուսական զորքերի կողմից, հաղորդում են տեղական իշխանությունները:
Խերսոնի քաղաքային խորհրդի տվյալներով՝ օրվա ընթացքում ռուսական բանակը 20 անգամ հրետակոծել է քաղաքը, մեկ մարդ վիրավորվել է և ծանր վիճակում տեղափոխվել հիվանդանոց։
Սումիի շրջանի վարչակազմը հաղորդում է Ռուսաստանին սահմանակից շրջանների վրա մի քանի հրետանային և ականանետային հարձակումների մասին: Տուժածների մասին տվյալներ չկան։
«Եթե ես վարչապետ լինեի, երբեք չէի հանդիպի Ուկրաինայի նախագահ Վլադիմիր Զելենսկու հետ», - կիրակի օրը երեկոյան Միլանում հայտարարել է Իտալիայի նախկին վարչապետ, երկրի իշխող կոալիցիայի անդամ «Ֆորցա Իտալիա» կուսակցության առաջնորդ Սիլվիո Բերլուսկոնին։
«Մենք տեսնում ենք այն ավերածությունները, որ կան Ուկրաինայում, այն զոհերը, որ արձանագրվում են ուկրաինացի զինվորականների և քաղաքացիական բնակչության շրջանում։ Այս ամենը տեղի չէր ունենա, եթե դադարեցվեին Դոնբասի երկու ինքնավար հանրապետությունների դեմ հարձակումները։ Այնպես որ, ես Զելենսկու պահվածքը շատ-շատ բացասական եմ գնահատում», - հայտարարում էր Բերլուսկոնին։
Իտալիայի նախկին վարչապետը նաև կոչ է արել պաշտոնական Վաշինգտոնին դադարեցնել սպառազինության առաքումները Ուկրաինա։
«Կարծում եմ, որ ԱՄՆ նախագահը պետք է մի կողմ քաշի Զելենսկուն և ասի՝ «ես մտադիր եմ պատերազմի ավարտից հետո Ուկրաինայի վերականգնման նպատակով «Մարշալի պլան» նախաձեռնել։ Պատրաստ եմ 6, 7, 8, 9 միլիարդ դոլար տրամադրել, բայց մի պայմանով՝ եթե վաղը հրադադար հայտարարեք։ Հակառակ դեպքում մենք ձեզ այլևս ոչ գումար կտրամադրենք, ոչ էլ զենք»։ Միայն նման պահվածքն է, որ կստիպի [Զելենսկուն] համաձայնել հրադադարի կնքմանը», - համոզված է Բերլուսկոնին։
ՀԱՊԿ անդամները պետք է ի վերջո հստակեցնեն իրենց դիրքորոշումը ռուս-ուկրաինական պատերազմի հարցում, այսօր Մինսկում, ՀԱՊԿ Գլխավոր քարտուղար Իմանգալի Տասմագամբետովի հետ զրույցում, նշել է Բելառուսի նախագահ Ալեքսանդր Լուկաշենկոն։
«Եթե որևէ մեկին թվում է, որ Ռուսաստանի և Ուկրաինայի հակամարտությունը մեր հակամարտությունը չէ և կարելի է հանգիստ ինչ-որ տեղ նստել և սպասել, թե ինչ կլինի, ապա այդ մարդիկ սխալվում են, նման բան չի լինի», - հայտարարել է Լուկաշենկոն։
Նրա խոսքով՝ հնարավոր է, որ ՀԱՊԿ անդամ երկրները այդ ընտրությունը ստիպված լինեն կատարել արդեն մոտ ապագայում՝ «բառացիորեն վաղը»։ Դիմելով ՀԱՊԿ Գլխավոր քարտուղարին՝ Բելառուսի նախագահը նաև կոչ է արել ջանքեր գործադրել դաշինքի սահմանների երկայնքով առկա հակամարտությունները լուծելու ուղղությամբ։
«Դուք լավ գիտեք Կովկասը և Կենտրոնական Ասիան։ Այնտեղ մենք խնդիրներ ունենք։ Եկեք փորձենք լուծել դրանք և հնարավորության սահմաններում միավորենք կազմակերպությունը», - ՀԱՊԿ գլխավոր քարտուղարի հետ զրույցում նշում էր Բելառուսի նախագահը։
Ուկրաինայում գերեվարված երկու ռուսներ, ովքեր պնդում են, թե հավաքագրվել էին «Վագներ» ռազմական մասնավոր ընկերության կողմից կալանավայրում, ամերիկյան CNN հեռուստաընկերությանը պատմել են մարտերում ռուսական զորքերի զանգվածային կորուստների մասին:
Ռուսները գերի էին ընկել անցյալ տարվա վերջին։ Երկուսն էլ նախկինում կրել են երկարաժամկետ ազատազրկում, մեկը դատապարտված էր 20 տարվա բանտարկության՝ սպանության համար:
Բանտարկյալները նկարագրել են Լուգանսկի շրջանում Բելոգորիվկայի վրա կատարված հարձակումը։ Ըստ նրանց՝ իրենց ջոկատում գտնվող 90 հոգուց 60-ը զոհվել են հրետանային կրակի տակ: «Վագներ»-ի մարտիկները պնդել են, թե ծանր կորուստները չեն խանգարում հարձակման շարունակությանը։
Գերի ընկած վարձկաններն ասում են, որ նրանք, ովքեր նահանջում են առանց առաջադրանքը կատարելու, գնդակահարվում են տեղում։ CNN-ի զրուցակիցներից մեկը պատմել է մի դեպքի մասին, երբ հարձակման գնալուց հրաժարված մարտիկին գնդակահարել են. նրան ստիպել են փորել սեփական գերեզմանը։ Միաժամանակ, ըստ բանտարկյալների, մարտադաշտից վիրավորների տարհանումն ապահովված չէ:
Բանտարկյալները պատմել են, որ իրենց գաղութում հավաքագրումն իրականացրել է անձամբ «Վագներ»-ի հիմնադիր Եվգենի Պրիգոժինը` խոստանալով ներում վեց ամիս ռազմաճակատում գտնվելուց հետո, ինչպես նաև դրամական պարգևներ և վարկերի մարում:
Ուկրաինայի նախագահ Վլադիմիր Զելենսկու հրամանագրով ուժի մեջ է մտել Ուկրաինայի ազգային անվտանգության և պաշտպանության խորհրդի որոշումը՝ պատժամիջոցներ կիրառելու Ռուսաստանի հետ կապված 200 անձանց նկատմամբ։ Նրանց թվում են ՌԴ նախագահի օգնականներ Յուրի Ուշակովը և Լարիսա Բրիչևայան, «Ռոսատոմի» բարձրագույն ղեկավարությունը։
Հրամանագիրն ուժի մեջ է մտնում հրապարակման օրվանից։ Պատժամիջոցները կիրառվում են ֆիզիկական անձանց, ներառյալ՝ որոշ ռուս քաղաքական գործիչների, քաղաքագետների, պետական ձեռնարկությունների ղեկավարների և աշխատակիցների նկատմամբ 50 տարի ժամկետով։
Ցուցակում ընդգրկված են նաև ՌԴ կառավարության ռազմաարդյունաբերական հանձնաժողովի կոլեգիայի նախկին ղեկավարը՝ նախարարների կաբինետի աշխատակազմի ղեկավարի տեղակալ Իգոր Բորովկովը, «Ռոստեխնաձորի» ղեկավարի տեղակալ Ալեքսեյ Ֆերապոնտովը։
Պատժամիջոցների ենթարկված անձանց մի զգալի մասը «Ռոսատոմի» ներկայացուցիչներ են։
Վրաստանի վարչապետ Իրակլի Ղարիբաշվիլին կարծում է, որ Վրաստանին պատերազմի մեջ ներքաշելու փորձերը չեն դադարում։
«Մենք ուղղակիորեն լսել ենք Ուկրաինայի իշխանությունների ներկայացուցիչների հայտարարությունները այս թեմայով: Նրանց նպատակն էր բացել «երկրորդ ճակատը», - ասել է Ղարիբաշվիլին:
Նրա խոսքով՝ այդ նպատակով Ուկրաինայից Վրաստան է ուղարկվել նախկին նախագահ Միխեիլ Սաակաշվիլին։
«Եվ բազմաթիվ սադրանքներ կան, որոնք, ցավոք, հիմա էլ չեն դադարում»,- հավելել է վարչապետը։
Մինչդեռ Ղարիբաշվիլին կարծում է, որ, չնայած մարտահրավերներին, Վրաստանի իշխանություններին հաջողվել է խուսափել պատերազմից։
«Մեր հիմնական խնդիրը եղել է, կա և կլինի պաշտպանել մեր ժողովրդի շահերը: Մենք կկայացնենք միայն այն որոշումները և կանենք այն աշխատանքը, որն անհրաժեշտ է մեր երկրին և մեր ժողովրդին», - ընդգծել է Ղարիբաշվիլին:
ԱՄՆ պաշտպանության նախարար Լլոյդ Օսթինը և Ուկրաինայի պաշտպանության նախարար Ալեքսեյ Ռեզնիկովը հեռախոսով քննարկել են Արևմուտքի կողմից Կիևին հրետանու և հակաօդային պաշտպանության համակարգերի մատակարարման հետ կապված հարցեր, հայտնում են Պենտագոնից։
Այդ հարցերն, իրենց հերթին, կբարձրացվեն հաջորդ շաբաթ Բրյուսելում կայանալիք Ուկրաինայի պաշտպանության կոնտակտային խմբի հետ քննարկման ժամանակ։
Նշվում է նաև, որ Ռեզնիկովը տեղեկացրել է Ուկրաինայում տիրող իրավիճակի մասին:
Ռուսաստանի կողմից Ուկրաինա ներխուժման առաջին տարելիցի շեմին Միացյալ Նահանգների նախագահ Ջոզեֆ Բայդենը կժամանի Լեհաստան, տեղեկացրել է Սպիտակ տան մամուլի ծառայությունը։
Հաղորդագրության համաձայն` Բայդենը պաշտոնական այցով Լեհաստանում կգտնվի փետրվարի 20-ից 22-ը։ Այցի ընթացքում Բայդենը կհանդիպի Լեհաստանի նախագահ Անջեյ Դուդայի հետ, բանակցություններ կանցկացնի ՆԱՏՕ-ի «Արևելյան թևը» ներկայացնող պետությունների, այսպես կոչված, «Բուխարեստյան իննյակի» ղեկավարների հետ։ Վերջին անգամ Բայդենը Լեհաստան էր ժամանել ռուս-ուկրաինական պատերազմի մեկնարկից մոտ մեկ ամիս անց՝ 2022 թվականի մարտին։
Փետրվարի 10-ի առավոտյան Ուկրաինան ենթարկվել է զանգվածային հրթիռակոծության ռուսական ուժերի կողմից։ Երկրի գրեթե ողջ տարածքում տագնապի ազդանշաններ են հնչել։
Հրթիռակոծվել են մայրաքաղաք Կիևը և մյուս խոշոր քաղաքները։ Պայթյուններ են լսվել Խարկովում, Կրիվոյ Ռոգում, Խմելնիցկում, Վինիցայում, Իվանո-Ֆրանկովսկում, ինչպես նաև Լվովի, Օդեսայի, Դնեպրոպետրովսկի, Զապորոժիեի ու Պոլտավայի մարզերում։
Ուկրաինական կողմը պնդում է, որ թևավոր հրթիռները արձակվել են Ռուսաստանի խորքից, դրանց մի մասը հաջողվել է ոչնչացնել Ուկրաինայի օդային տարածքում։
Եվրախորհրդարանի նախագահ Ռոբերտա Մեցոլան հայտարարել է, որ Եվրամիությունը պետք է շարունակի էական ռազմական աջակցություն ցուցաբերել Ուկրաինային։
«Ուկրաինան զենքի, ավելի շատ ծանր զրահատեխնիկայի կարիք ունի: Պետք է հաշվի առնել տանկերի, ինքնաթիռների և հեռահար պաշտպանության համակարգերի անհրաժեշտությունը», - ասել է նա` հինգշաբթի երեկոյան Բրյուսելում ելույթ ունենալով Եվրամիության գագաթնաժողովին: Մեցոլայի խոսքով՝ դա կօգնի «խաղաղության հասնել»։
Եվրախորհրդարանի նախագահը նաև գագաթնաժողովի մասնակիցների ուշադրությունն է հրավիրել Եվրամիությանը Ուկրաինայի անդամակցության հեռանկարի վրա։
«Ուկրաինայի տեղը Եվրամիությունում է: Մենք պետք է պատրաստ լինենք տեր կանգնել մեր խոսքին: Ուկրաինան զգալի առաջընթաց է գրանցել իր բարեփոխումների տեմպերում: Հուսով եմ, որ անդամակցության բանակցությունները կարող են սկսվել որքան հնարավոր է շուտ, պայմանով, որ Ուկրաինան կատարի բոլոր անհրաժեշտ չափանիշները», - ասել է Մեցոլան:
Ավելի վաղ Բրյուսելում կայացած ասուլիսի ժամանակ Եվրահանձնաժողովի նախագահ Ուրսուլա ֆոն դեր Լայենը դրական է գնահատել Ուկրաինայի ջանքերը ԵՄ-ին անդամակցության նախապատրաստման գործընթացում, սակայն ևս մեկ անգամ նշել է, որ Եվրամիությանը Ուկրաինայի անդամակցության ժամկետներ նշել հնարավոր չէ։
Իր հերթին, ասուլիսին մասնակցած Եվրոպական խորհրդի նախագահ Շառլ Միշելն ասել է, որ Ուկրաինան «արագ ցույց տվեց չափազանց կարևոր բարեփոխումներ իրականացնելու և դրանում հաջողությունների հասնելու իր ընդունակությունը»։ Միաժամանակ, նա ասել է, որ Եվրահանձնաժողովի զեկույցից հետո Եվրոպական խորհուրդը մինչև տարեվերջ կորոշի այդ աշխատանքի հետագա փուլերը։