Միացյալ Նահանգների կառավարության Եվրոպայում անվտանգության և համագործակցության հարցերով հանձնաժողովը, որը հայտնի է նաև որպես Հելսինկյան հանձնաժողով, Ավստրիայի արտգործնախարարությանը կոչ է արել վիզաներ չտրամադրել Ռուսաստանի պատվիրակությանը ԵԱՀԿ Խորհրդարանական վեհաժողովի նստաշրջանին մասնակցելու համար, որն անցկացվելու է հաջորդ շաբաթ Վիեննայում։
Հելսինկյան հանձնաժողովի նախագահ, ԱՄՆ կոնգրեսական Ջո Ուիլսոնը, նրա տեղակալ, սենատոր Բեն Քարդինը և կոնգրեսական Սթիվ Քոենը նամակ են ուղարկել Ավստրիայի արտգործնախարար Ալեքսանդր Շալենբերգին՝ խնդրելով վերանայել ռուսական պատվիրակությանը վիզաների տրամադրման հարցը։
ԵԱՀԿ ԽՎ ձմեռային նստաշրջանը համընկնում է Ուկրաինա Ռուսաստանի լայնամասշտաբ ներխուժման տարեդարձին և լինելու է պատերազմի սկզբից ի վեր Խորհրդարանական վեհաժողովի առաջին դեմ առ դեմ հանդիպումը Ռուսաստանի և Բելառուսի մասնակցությամբ:
Միացյալ Նահանգների պաշտպանության նախարարն այսօր կայցելի Էստոնիա։
Լլոյդ Օսթինը հանդիպումներ կունենա իր էստոնացի գործընկերոջ և երկրի վարչապետի հետ: Կողմերը կքննարկեն Ուկրաինային աջակցության, երկկողմ պաշտպանական համագործակցության և ՆԱՏՕ-ի գործունեության հետ կապված հարցեր:
Նախատեսվում է, որ պաշտպանության նախարարները հանդես կգան համատեղ մամուլի ասուլիսով։
Այսօր Բրյուսելում Հյուսիսատլանտյան դաշինքի կենտրոնակայանում տեղի ունեցած բրիֆինգում ՆԱՏՕ-ի գլխավոր քարտուղար Յենս Ստոլտենբերգը ողջունել է դաշնակիցների կողմից Ուկրաինային նոր աջակցություն ցուցաբերելու պատրաստակամությունը, ընդգծելով, որ ժամանակը էական նշանակություն ունի։
«Ողջունում եմ ՆԱՏՕ-ի դաշնակիցների աջակցության խոստումները, ներառյալ ավելի ծանր սպառազինություններն ու ռազմական ուսուցումը։ Դա շատ կարևոր է։ Ուկրաինան կշեռքի նժարը թեքելու հնարավորության պատուհան ունի, և ժամանակn էական է»,- ասել է Ստոլտենբերգը։
Բրյուսելում ՆԱՏՕ-ի անդամ երկրների պաշտպանության նախարարների երկօրյա հանդիպմանը քննարկվել են Ուկրաինային ցուցաբերվող աջակցությունը շարունակելու հարցերը և դաշինքի ռազմական ծախսերը։
Ռուսական ուժերը հրթիռակոծել են ուկրաինական Պոկրովսկը, Դոնեցկի մարզի ռազմական վարչակազմի ղեկավար Պավել Կիրիլենկոն հայտնել է, որ առնվազն 12 մարդ է վիրավորվել, երկու մարդ դեռևս գտնվում է փլատակների տակ։
Տելեգրամի իր էջում նա գրել է, որ այսօր առավոտյան ժամը 10-ի սահմաններում Պոկրովկսի «Սոլնեչնի» բնակելի միկոշրջանը ռուսական ուժերը հրթիռակոծել են «Սմերչ» համակարգով։
«Ռոյթերսի» տեսանյութում փրկարարները հրշեջ մեքենայի սանդուղքով հրետակոծված շենքի վերջին հարկից տարհանում են տուժածներին։
Ոստիկանության խոսնակ Օլեքսանդրա Հավրիլկոն ասել է, որ փրկարարները բնակելի շենքի հինգերորդ հարկից փլատակների տակից դուրս են բերել մի տղամարդու։
«Փառք Աստծո, նա ողջ է, նույնիսկ կարողացել է ինքնուրյուն իջնել սանդուղքով։ Մեր բուժաշխատողները նրան արդեն տեղափոխել են հիվանդանոց»,-ասել է նա։
Ուկրաինայի խորհրդարանում՝ Գերագույն ռադայում շրջանառության մեջ է դրվել օրինագիծ, որով պետք է չեղյալ հայտարարվեն մարտի 8-ի, մայիսի 1-ի և մայիսի 9-ի տոները:
Օրինագիծը հեղինակել են տարբեր խմբակցություններից մի խումբ պատգամավորներ: Նրանք առաջարկում են մարտի 8-ի Կանանց միջազգային օրվա փոխարեն փետրվարի 25-ին՝ բանաստեղծուհի Լեսյա Ուկրաինկայի ծննդյան օրը, նշել Ուկրաինուհու օրը, իսկ մարտի 9-ին նշել բանաստեղծ Տարաս Շևչենկոյի ծննդյան օրը:
Առաջարկվում է նաև չեղարկել մայիսի 1-ի Աշխատավորների օրը և մայիսի 9-ի Հաղթանակի օրը: Փոխարենը, օրինագծի հեղինակների համոզմամբ, պետք է մայիսի 8-ը սահմանել որպես Հիշատակի և հաշտության օր, իսկ մայիսի երկրորդ կիրակին դարձնել Մոր օր:
Կրեմլը հայտարարել է, թե Միացյալ Նահանգների առաջնորդած ՆԱՏՕ-ն թշնամական կառույց է, որը հետզհետե ավելի է ներգրավվում ռուս-ուկրաինական հակամարտությանը:
«Նախևառաջ ՆԱՏՕ-ն մի կազմակերպություն է, որը թշնամաբար է տրամադրված մեր նկատմամբ և դա ամեն օր է ապացուցում: Բնականաբար, մենք անհրաժեշտ միջոցներ ենք ձեռնարկում»,- ասել է նախագահ Վլադիմիր Պուտինի խոսնակ Դմիտրի Պեսկովը:
Այդ մեկնաբանությամբ նա արձագանքել է Ուկրաինային արևմտյան արդիական սպառազենի նոր խմբաքանակ տրամադրելու մասին ՆԱՏՕ-ի ղեկավարների հայտարարություններին:
«Գաղտնիք չէ, որ մեր զինծառայողներն առաջնագծում օտարերկրացի վարձկանների լեզուներ են լսում: Արդյոք սա կփոխի՞ իրադարձությունների ընթացքը: Ոչ, չի՛ փոխի: Կրկնում ենք՝ սա կարող է միայն երկարաձգել հակամարտությունը և ուկրաինացի ժողովրդի տառապանքները, բայց իրադարձությունների ընթացքը փոխել չի կարող»,- ասել է Պեսկովը:
Ուկրաինային հրատապ կարգով նոր սպառազեն է անհրաժեշտ, այսօր Բրյուսելում ասել է Միացյալ Նահանգների պաշտպանության նախարար Լոյդ Օսթինը: Նա հավաստիացրել է, որ Միացյալ Նահանգները և ՆԱՏՕ-ի մյուս երկրները կօգնեն Ուկրաինային:
«Շփման խումբը վերահաստատել է, որ կօգնի Ուկրաինային գարնանային հակահարձակման ընթացքում առաջ գնալ: Միասնական ջանքերով և հրատապ կարգով մենք կտրամադրենք այն աջակցությունը, որը խոստացել ենք»,- ասել է Օսթինը:
Նրա խոսքով, Կրեմլը տակավին հուսով է, որ Արևմուտքը կհոգնի այդ պատերազմից, իսկ մատակարարումները կսպառվեն:
«Բայց արդեն մեկ տարի է մենք միասնական ենք առավել, քան երբևէ: Մենք միավորվել ենք պաշտպանելու աշխարհը, որը ղեկավարվում է օրենքներով, որտեղ հարգում են ինքնիշխանությունը և պաշտպանում են խաղաղ բնակիչներին»,- ասել է Պենտագոնի ղեկավարը:
ՀԱՊԿ պատասխանատվության գոտում իրավիճակը մնում է լարված: Այդ մասին այսօր մամլո ասուլիսում հայտարարել է ՀԱՊԿ միացյալ շտաբի պետ, Ռուսաստանի զինված ուժերի գեներալ-գնդապետ Անատոլի Սիդորովը:
«Իրավիճակը, դժբախտաբար, լարված է, հիմնական մարտահրավերը ՀԱՊԿ-ի և դրա առանձին անդամ երկրների ներքին կացության քայքայմանն ուղղված արևմտյան որոշ էլիտաների ապակայունացնող գործունեությունն է», - ասել է գեներալ-գնդապետը:
Նրա փոխանցմամբ` ուշադրության կենտրոնում են մնում ընդհուպ Բելառուսի և Ռուսաստանի սահմաններին ՆԱՏՕ-ի հարձակողական ենթակառուցվածքի մոտեցումը և ուկրաինական ճգնաժամի պայմաններում Բալթյան երկրների ագրեսիվ հռետորաբանությունը:
«Այդ պայմաններում՝ հաշվի առնելով հայ-ադրբեջանական հակամարտության վտանգի բարձր աստիճանը, Կովկասում Հավաքական անվտանգության շրջանում ճգնաժամի սրմանը նպաստում են այդ տարածքում ամրապնդվելու, Կասպյան պաշարներին հասնելու և Կենտրոնական Ասիա ուղիղ մուտք ապահովելու առանձին երկրների փորձերը», - հայտարարել է Սիդորովը:
ԱՄՆ-ը կարող է Ուկրաինային փոխանցել ժամանակակից F-16 կործանիչներ կամ թույլտվություն տալ դրանց վերաարտահանման համար, գրում է Financial Times-ը՝ վկայակոչելով աղբյուրները Վաշինգտոնում։
Ըստ պարբերականի՝ Միացյալ Նահանգների պաշտոնյաները խոստովանում են, որ հավանաբար Կիևին կտրամադրեն «ավելի առաջադեմ ավիացիան, քանի որ պատերազմը ձգձգվում է, կամ գոնե կանաչ լույս կտան այլ երկրներից F-16-երի տեղափոխմանը»:
Հրատարակության տվյալներով՝ ինքնաթիռների տրամադրման հարցը կքննարկվի ՆԱՏՕ-ի պաշտպանության նախարարների այսօր Բրյուսելում կայանալիք հանդիպմանը։
Կիևի համար կործանիչների մատակարարման հարցը «ոչ պակաս կարևոր» է, քան զինամթերքի մատակարարման հարցը, նշել են FT-ի զրուցակիցները։
«Ուկրաինայի կողմից զինամթերքի ծախսման ներկայիս տեմպերը մի քանի անգամ գերազանցում են դրանց արտադրության առկա տեմպերը», - այսօր Բրյուսելում կայացած ասուլիսի ժամանակ հայտարարել է ՆԱՏՕ-ի Գլխավոր քարտուղար Յենս Ստոլտենբերգը։
Նրա խոսքով՝ սպառազինության ծախսման նման ծավալների հետևանքով՝ «ՆԱՏՕ-ի անդամ պետությունների ռազմարդյունաբերական համալիրները լուրջ ճնշման ներքո են հայտնվել»։
Չնայած դրան, Ստոլտենբերգը պնդում է, որ դաշինքը շարունակելու է աջակցել Ուկրաինային։
«Սպառազինությունը, վառելիքը, պահեստամասերը պետք է Ուկրաինա հասնեն մինչև այն պահը, երբ նախաձեռնությունը ռազմի դաշտում կանցնի Ռուսաստանին», - Ստելտենբերգի խոսքերն է մեջբերում AFP գործակալությունը։