Լեհաստանն արդեն Ուկրաինա է փոխադրել Leopard տեսակի գերմանական հրասայլերից մի քանիսը:
Այդ մասին Վարշավայում՝ ազգային անվտանգության խորհրդի նիստում ասել է նախագահ Անջեյ Դուդան: Պարզաբանումները ներկայացրել է պաշտպանության նախարար Մարիուշ Բլաշչակը:
«Լեհական Leopard-ներից առաջիններն արդեն հասել են Ուկրաինա: Ուկրաինացի զինծառայողներն ուսումնավարժական հավաքների են մասնակցում, նրանց հետ Սվիետոշովի հրաձգարանում աշխատում են լեհ, կանադացի և նորվեգացի հրահանգիչները»,- հայտնել է նախարարը:
Գերմանիան վերջերս ոչ միայն խոստացել է Leopard-ներ ուղարկել Ուկրաինա, այլև դաշնակից երկրներին թույլ է տվել Ուկրաինային տրամադրել այդ հրասայլերը:
Առաջ և հետո. Արբանյակից արված լուսանկարները ցույց են տալիս ավերը Ուկրաինայում Ռուսաստանի ներխուժումից հետո
«Մեկ տարի առաջ առավոտյան ժամը 5-ին զանգ եմ ստանում՝ «Կիևը ռմբակոծում են»: Հասկացա, որ պատմության էջը շրջվում է, և մենք մտնում ենք դրամատիկ իրավիճակ», - Եվրամիության դիվանագիտության ղեկավար Ժոզեպ Բորելը պատմեց «Ազատ Եվրոպա/Ազատություն» ռադիոկայանին տված բացառիկ հարցազրույցում:
Ռուս - ուկրաինական պատերազմի լույսի ներքո վերլուծելով անցած մեկ տարին՝ Եվրամիության պաշտոնյան փաստեց՝ զոհվում են ուկրաինացիներն ու ռուսները, բայց նաև եվրոպացիներն են տառապում գնաճի հետեւանքով: Երբ է ավարտվելու պատերազմը՝ Բորելը չգիտի, բայց վստահ է՝ պատերազմի ավարտից հետո էլ Ռուսաստանը չի վերանա, և Եվրոպան պետք է մտածի՝ ինչպես կառուցել հարաբերություններն այդ երկրի հետ:
Վերահաստատելով, որ Եվրամիությունը երրորդ համաշխարհային պատերազմ չի ուզում, Ժոզեպ Բորելն ընդգծեց. - «Մենք պատերազմող կողմ չենք, մենք աջակցում ենք մեկ կողմին, բայց չենք մասնակցում պատերազմին»։
Իսպանացի դիվանագետի կարծիքով՝ բացի տնտեսական կորուստներից, փոքր չեն նաև պատերազմի դաշտում Մոսկվայի կորուստները՝ այդ թվում 1600 ոչնչացված տանկ․ - «Սա Պուտինը երբեք չէր էլ կարող պատկերացնել ։Բայց, դժբախտաբար, երևում է՝ նրանք պատրաստ են շարունակել այս պատերազմը, 300 հազար զինվոր են կենտրոնացրել շփման գծում, ինչը կրկնակի ավելի է այն անձնակազմից, որը սահմանին էր մեկ տարի առաջ՝ պատերազմի մեկնարկի նախաշեմին»:
Եվրոպական միության դիվանագիտության ղեկավարը դժվարացավ կանխատեսել պատերազմի ավարտի ժամկետները և այն, թե ինչպիսին կլինեն Ռուսաստանի հետ հարաբերությունները պատերազմի ավարտից հետո:
«Դե, Ռուսաստանը չի վերանա», - շեշտեց դիվանագետը՝ հավելելով, որ Եվրոպան պետք է սկսի մտածել, թե ինչպես կարելի է վերականգնել խաղաղությունն ու անվտանգությունը Եվրոպայում։
«Մեկ տարվա՞, թե՞ առաջիկա տասնամյակների մասին է խոսքը», - լրագրողի այս հարցին Բորելն արձագանքեց. - «Անկեղծ ասած չգիտեմ: Ձեր հարցին ես չեմ կարող պատասխանել»։
Ուկրաինայի դեմ մեկ տարի տևող պատերազմի ընթացքում ռուսները կորցրել են ավելի շատ զինծառայող, քան խորհրդային բանակն Աֆղանստանի իննամյա պատերազմում: Այդ մասին ասվում է զեկույցում, որը համատեղ հետաքննության արդյունքում հրապարակել են «Մեդիազոնա» կայքը և BBC բրիտանական ռադիոկայանի ռուսական ծառայությունը:
Զեկույցը կազմվել է միայն բաց աղբյուրներում հրապարակված տեղեկություններով, որոնցում նշված են զոհվածների անուն-ազգանունները և հասցեները: «Մեդիազոնան» և BBC-ին նշում են, որ զոհերի իրական թիվը կարող է անգամներով ավելի մեծ լինել:
Մոսկվան և Կիևը չեն հրապարակում զոհերի թիվը: 2022-ի նոյեմբերին Պենտագոնը հայտնել է, որ Ռուսաստանը և Ուկրաինան, սպանվածներով և ծանր վիրավորներով, կոցրել են հավանաբար հարյուր հազարական զինծառայող:
Արևմտյան որոշ հետախուզական կենտրոնների կարծիքով, ռուսների սպանվածների և ծանր վիրավորների թիվը կարող է հասնել 200 հազարի, իսկ միայն սպանվածներինը՝ մոտ 60 հազարի:
Ուկրաինայի դատախազության պատերազմի վարչության ղեկավար Յուրի Բելոուսվը The Independent բրիտանական օրաթերթին տված հարցազրույցում ասել է, որ Ուկրաինայում զոհված խաղաղ բնակիչների թիվը կարող է հասնել 100 հազարի:
ՄԱԿ-ի պաշտոնական տվյալներով, որոնք հաշվի են առնում միայն պատկան գրասենյակների կողմից փաստագրված մահվան դեպքերը, Ուկրաինայում 2023 թվականի փետրվարի սկզբի դրությամբ զոհվել է մոտ 8 հազար խաղաղ բնակիչ, ևս մի քանի խաղաղ քաղաքացի պատերազմի ընթացքում սպանվել է Ռուսաստանի տարածքում:
Թուրքիայի նախագահ Ռեջեփ Թայիփ Էրդողանն այսօր հեռախոսով զրուցել է ուկրաինացի պաշտոնակից Վլադիմիր Զելենսկու հետ:
Ըստ Էրդողանի աշխատակազմի, երկու նախագահները քննարկել են Ուկրաինայում մեկ տարի տևող պատերազմին, ինչպես նաև Թուրքիայում փետրվարի 6-ին տեղի ունեցած հուժկու երկրաշարժին առնչվող հարցեր:
Էրդողանը շնորհակալություն է հայտնել բնական աղետի կապակցությամբ Ուկրաինայի ցոււցաբերած աջակցության և համերաշխության համար:
Նա հավաստիացրել է, որ Թուրքիան պատրաստ է իր ուժերի սահմաններում նպաստել խաղաղության հաստատմանը, «որը պետք է հիմնվի հրադադարի և երկխոսության վրա»:
Ամերիկայի Միացյալ Նահանգների նախագահ Ջո Բայդենի վարչակազմը փետրվարի 24-ին հայտնել է Ուկրաինային ևս 2 միլիարդ դոլարի ռազմական օգնություն տրամադրելու որոշման մասին:
Այս նոր փաթեթով ուկրաինական բանակը կստանա HIMARS տեսակի ամերիկյան արտադրության համազարկային կրակի ռեակտիվ համակարգերի հրթիռներ և մարտական անօդաչուներ: Դրանք Վաշինգտոնի պատվերով պետք է արտադրեն ամերիկյան ռազմարդյունաբերական համալիրի գործարանները:
Անօդաչուներից Ուկրաինա կուղարկվեն CyberLux K8, Switchblade 600, Altius-600 և Jump 20 տեսակի սարքեր, որոնք կարող են պայքարել թշնամու ԱԹՍ-ների դեմ, հզորացնել հակաօդային պաշտպանությունը և նպաստել քաղաքացիական բնակչության պաշտպանությանը:
Ամերիկացիները Կիևին կտրամադրեն թշնամու ռադիոէլեկտրոնային պայքարի միջոցների հայտնաբերման սարքեր:
Բացի այդ, նոր փաթեթով Ուկրաինան կստանա 155 միլիմետր տրամաչափի հրետանային համակարգերի մեծ թվով արկեր, ինչպես նաև ականազերծման սարքավորումներ և հուսալի կապի միջոցներ:
Ուկրաինայի նախագահ Վլադիմիր Զելենսկին փետրվարի 24-ի վաղ առավոտյան հանդես է եկել Ռուսաստանի սանձազերծած պատերազմի առաջին տարվան նվիրված հատուկ ուղերձով:
«Փետրվարի 24-ին մեզանից միլիոնավորներն ընտրեցին ոչ թե սպիտակ, այլ կապույտ-դեղին դրոշը, ոչ թե փախուստը, այլ դիմավորումը՝ թշնամու դիմավորումը, գիտենք, որ այս տարին կլինի մեր հաղթանակի տարին», - հայտարարել է Զելենսկին ուղերձում, որը տեղադրվել է նրա տելեգրամ-ալիքում:
Նախագահ Վլադիմիր Զելենսկին նշել է, որ «դա ցավի, հույսի, արցունքների և միասնության տարի էր:
«Եվ այս տարին կլինի մեր անպարտելիության տարին, մեր հաղթանակի տարին», - հավաստիացրել է Ուկրաինայի ղեկավարը:
Ռուսաստանյան տասնյակ քաղաքներում փետրվարի 24-ին հայտնվել են պատերազմի դեմ բողոքի բովանդակությամբ հուշատախտակներ, լուսանկարներ, գրություններ ու պաստառներ: Դրանք նվիրված են ռուս - ուկրաինական պատերազմի առաջին տարվան:
Կազանում հայտնաբերվել է հուշատախտակ՝ Լենինյան այգում Քաղաքական հալածանքների զոհերի արձանի մոտ տեղադրվել են Բուչայի, Մարիուպոլի և Դնեպրի (նախկին անունը՝ Դնեպրոպետրովսկ) իրադարձությունների մասին վկայող լուսանկարներ և պաստառ՝ «Ո՛չ պուտինյան պատերազմին» գրությամբ:
Հակապատերազմական բովանդակությամբ հուշատախտակներ են հայտնվել նաև Տոմսկում, Նովոսիբիրսկում, Մուրմանսկում և այլ մեծ ու փոքր բնակավայրերում:
Խաբարովսկում բերման են ենթարկել պատերազմի դեմ բողոքող տեղացի ակտիվիստին, Վլադիվոստոկում ձերբակալել են «Մի՛ պատերազմեք» պաստառով պիկետի դուրս եկած բնակիչներից մեկին: Այդ երկու քաղաքացիներին ոստիկանները հետագայում ազատ են թողել առանց արձանագրություն կազմելու:
Իրավապահները հերթապահում են տեղերում և անմիջապես հեռացնում են հուշատախտակներն ու գրությունները:
ՆԱՏՕ-ի գլխավոր քարտուղար Յենս Ստոլտենբերգը հայտնել է, որ Ուկրաինայի նախագահ Վլադիմրի Զելենսկուն առաջարկել է մասնակցել ՆԱՏՕ-ի գալիք գագաթնաժողովին, որը նախատեսված է Վիլնյուսում:
«Զելենսկուն հրավիրել եմ Վիլնյուսում հուլիսին գումարվելիք ՆԱՏՕ-ի գագաթնաժողովին»,- այսօր տեղեկացրել է Հյուսիսատլանտյան դաշինքի ղեկավարը:
Նա հույս է հայտնել, որ Ուկրաինայի նախագահն ի զորու կլինի ոչ թե առցանց, այլ առկա մասնակցել հավաքին, միաժամանակ նշելով, թե, իհարկե, ընդունում է, որ կախված կլինի կոնկրետ իրավիճակից:
Լիտվայի մայրաքաղաք Վիլնյուսում ՆԱՏՕ-ի 30 անդամ պետությունների ղեկավարների գագաթնաժողովը պետք է տեղի ունենա այս տարվա հուլիսի 11-ից 12-ը:
Լեհաստանն այսօր Ուկրաինա կուղարկի Leopard 2 տեսակի գերմանական արտադրության հրասայլերից մի քանիսը: Վարշավան խոստացել է ընդհանուր հաշվով 14 այդօրինակ տանկ տրամադրել Կիևին:
Ենթադրվում է, որ տանկերի առաքումը սկսելու լուրը կհրապարակի Կիև մեկնած Լեհաստանի վարչապետ Մատեուշ Մորավեցկին:
Հունվարի 25-ին Գերմանիայի կառավարությունը հաստատել է, որ Ուկրաինա կուղարկի 14 հրասայլ և մյուս երկրներին թույլ կտա դա անել:
Ուկրաինային արևմտյան արտադրության հրասայլեր տրամադրելու խոստումներ են տվել Բրիտանիան, Նորգվեգիան, Սլովակիան, Միացյալ Նահանգները և Ֆրանսիան:
Կիևը հուսով է առաջին խմբաքանակով ստանալ արևմտյան արտադրության մոտ 140 հրասայլ 12 երկրներից: