Ուկրաինայի արտաքին գործերի նախարար Դմիտրո Կուլեբան Լոնդոնում անցկացվող Փափուկ ուժի համաշխարհային գագաթնաժողովի մասնակիցներին հասցեագրված տեսաուղերձում խոսել է սոցիալական ցանցերում հաղթանակի տեսլականն առաջ տանելու կարևորության մասին:
Նրա համոզմամբ` Ուկրաինայի հստակ հաղթանակի հայեցակարգի հաստատումը սոցիալական ցանցերում կօգնի բարձր մակարդակի վրա պահել դաշնակիցների աջակցությունը և վնասազերծել բացասական ազդեցությունը, որ կարող են հանրային կարծիքի վրա գործել ռազմաճակատից ստացվող լուրերը:
«Ե՛վ շարքային մարդիկ, և՛ քաղաքական գործիչները ներկա են սոցցանցերում: Հենց այդ պատճառով էլ սոցցանցերն ունեն շատ մեծ նշանակություն: Սոցիալական մեդիան մի յուրօրինակ առանձին ռազմաճակատ է, որտեղ պարտավոր ես շատ լուրջ կռվել: Ընդ որում Facebook-ը, Instagram-ը և TikTok-ը միմյանցից տարբերվում են: Սա շատ կարևոր հարց է», - ասել է Կուլեբան:
«Մեծ քսանի» արտաքին գերատեսչությունների ղեկավարները Նյու Դելիում գումարված համաժողովում չեն համաձայնեցրել ամփոփիչ հայտարարությունը, քանի որ իրարամերժ մոտեցումներ են դրսևորվել Ուկրաինայի խնդրում:
«Մեծ քսանի» համաժողովի մասնակիցների գերիշխող մեծամասնությունը դատապարտել է Ռուսաստանի հարձակումն Ուկրաինայի վրա, սակայն, ըստ Հնդկաստանի արտաքին գործերի նախարար Սուբրամանյամ Ջայշանկարի, Ռուսաստանի և Չինաստանի կողմից առարկություններ են ներկայացվել:
«Կային հարցեր, որոնք, անկեղծ կասեմ, առնչվում էին Ուկրաինային, դրանց շուրջ եղել են տարաձայնություններ, որոնք մենք չկարողացանք հաղթահարել», - ասել է Ջայշանկարը:
Նյու Դելիում «Մեծ քսանի» արտաքին գերատեսչությունների ղեկավարների հավաքին մասնակցող Միացյալ Նահանգների պետական քարտուղար Էնթոնի Բլինքենը և Ռուսաստանի արտաքին գործերի նախարար Սերգեյ Լավրովըկարճ զրույց են ունեցել: Այդ մասին հայտնել է ՌԴ ԱԳՆ մամլո խոսնակ Մարիա Զախարովան:
«Բլինքենը խնդրել է շփման մասին, նրանք ոտքի վրա են շփվել, բանակցություններ կամ հանդիպում չի եղել», - ասել է Զախարովան:
Ըստ անանուն բարձրաստիճան ամերիկացի պաշտոնյայի՝ կարճ զրույցի ընթացքում Բլինքենն անդրադարձել է երեք թեմաների:
Նա ռուսաստանցի պաշտոնակցին ասել է, որ Միացյալ Նահանգները շարունակելու է աջակցությունն Ուկրաինային:
Պետքարտուղարը հորդորել է Մոսկվային վերանայել ռազմավարական հարձակողական սպառազենի պայմանագրին Ռուսաստանի մասնակցությունը սառեցնելու որոշումը:
Բացի այդ, Բլինքենը կոչ է ռուսական կողմին ազատ արձակել Ռուսաստանում լրտեսության մեղադրանքով դատապարտված ամերիկացի Փոլ Ուիլանին:
Նյու Դելիում «Մեծ քսանի» արտաքին գերատեսչությունների ղեկավարների հավաքին մասնակցող Միացյալ Նահանգների պետական քարտուղար Էնթոնի Բլինքենը և Ռուսաստանի արտաքին գործերի նախարար Սերգեյ Լավրովըկարճ զրույց են ունեցել: Այդ մասին հայտնել է ՌԴ ԱԳՆ մամլո խոսնակ Մարիա Զախարովան:
«Բլինքենը խնդրել է շփման մասին, նրանք ոտքի վրա են շփվել, բանակցություններ կամ հանդիպում չի եղել», - ասել է Զախարովան:
Ըստ անանուն բարձրաստիճան ամերիկացի պաշտոնյայի՝ կարճ զրույցի ընթացքում Բլինքենն անդրադարձել է երեք թեմաների:
Նա ռուսաստանցի պաշտոնակցին ասել է, որ Միացյալ Նահանգները շարունակելու է աջակցությունն Ուկրաինային:
Պետքարտուղարը հորդորել է Մոսկվային վերանայել ռազմավարական հարձակողական սպառազենի պայմանագրին Ռուսաստանի մասնակցությունը սառեցնելու որոշումը:
Բացի այդ, Բլինքենը կոչ է ռուսական կողմին ազատ արձակել Ռուսաստանում լրտեսության մեղադրանքով դատապարտված ամերիկացի Փոլ Ուիլանին:
Ռուսաստանի արտաքին գործերի նախարար Սերգեյ Լավրովն ասել է, թե Ուկրաինայում խաղաղություն հաստատելու հարցով որևէ լուրջ առաջարկ մեկ տարի է՝ չի ստացվել:
Այդ մասին Լավրովն այսօր ասել է Հնդկաստանի մայրաքաղաք Նյու Դելիում գումարված «Մեծ քսանի» երկրների արտաքին գերատեսչությունների ղեկավարների համաժողովում:
«Պարկեշտ չէ մեզ ուղղել բանակցելու կոչեր: Մենք երբեք լուրջ բանակցություններից չենք հրաժարվել: Լուրջ առաջարկներ անցյալ տարվա մարտ ամսից չենք ստացել»,- ասել է Լավրովը:
ԱՄՆ պետքարտուղար Էնթոնի Բլինքենը, իր հերթին, հայտարարել է. - «Մենք պետք է շարունակենք կոչ անել Ռուսաստանին՝ վերջ տալ ագրեսիայի իր պատերազմին և դուրս գալ Ուկրաինայից՝ հանուն միջազգային խաղաղության և տնտեսական կայունության»:
Ռուսաստանի Դաշնության նախագահ Վլադիմիր Պուտինն «ահաբեկչական հարձակում» է անվանել Բրյանսկի շրջանում ուկրաինացիներին վերագրվող այսօրվա զինված հարձակումը:
«Դա հերթական հանցագործությունն է, տեսել են, որ քաղաքացիական մեքենա է, սովորական «Նիվա», որում քաղաքացիական անձինք են, երեխաներ, և կրակ են բացել», - ասել է Պուտինը:
Այդ մեկնաբանությամբ նա հանդես է եկել «Դաստիարակների դպրոց» պիլոտային կրթական ծրագրի մասնակիցների հետ առցանց հանդիպման ընթացքում:
Մոսկվան ուկրաինացիներին է վերագրում գրոհը: Մինչդեռ Ուկրաինայի նախագահի աշխատակազմի խորհրդական Միխայիլ Պոդոլյակը Բրյանսկի շրջանում հարձակմանն ուկրաինացիների առնչության մասին Մոսկվայի լուրն անվանել է «կեղծիք»:
«Ռուսաստանում ուկրաինացի դիվերսանտների մասին պատմությունը դասական միտումնավոր սադրանք է: Դուք ձեր պարտիզաններից վախեցեք», - Թվիթերում գրել է Պոդոլյակը:
«Ազատություն»-ը և այլ միջազգային լրատվամիջոցներ կողմերից որևէ մեկի պնդումները հաստատող տեղեկություններ դեռ չունեն։
Ուկրաինայի հետ սահմանակցող Ռուսաստանի Դաշնության Բրյանսկի շրջանի նահանգապետ Ալեքսանդր Բոգոմազն ասել է, որ այսօր առավոտյան ուկրաինացի դիվերսանտները ներխուժել են շրջան:
Անվտանգության դաշնային ծառայությունը փոխանցել է, որ «այս պահին սահմանամերձ շրջանում ընթանում է սահմանախախտներին վնասազերծելու գործողությունը»:
Բոգոմազի փոխանցմամբ, «դիվերսանտները հայտնվել են Բրյանսկի շրջանի Կլիմովսկի ենթաշրջանի Լյուբեչանե գյուղի տարածքում»:
Նահանգապետն ասել է, որ ուկրաինացիները կրակ են բացել մի ավտոմեքենայի վրա, մեկ մարդ զոհվել է, մի երեխա վիրավորվել է: Սուշանի գյուղն էլ ԱԹՍ-ի գրոհի է ենթարկվել:
Այլ մանրամասներ Բրյանսկի շրջանից դեռ չկան:
«Ազատություն»-ը և այլ միջազգային լրատվամիջոցներ այս պնդումները հաստատող տեղեկություններ դեռ չունեն։
Ռուսաստանի Դաշնության նախագահ Վլադիմիր Պուտինը վաղը՝ մարտի 3-ին, Անվտանգության խորհրդի արտահերթ նիստ կանցկացնի: Այդ մասին ասել է Կրեմլի խոսնակ Դմիտրի Պեսկովը:
Այսօր ավելի վաղ մի անանուն աղբյուր խորհրդարանի ստորին պալատից՝ Պետական դումայից, ռուսական մամուլին փոխանցել է, որ այս նիստը կգումարվի այսօր և, հավանաբար, կանցկացվի առցանց ձևաչափով:
Օրակարգի մասին պաշտոնական տեղեկություններ հայտնի չեն, սակայն ենթադրվում է, որ կքննարկվեն «ուկրաինական անօդաչուների գրոհները ռուսական բնակավայրերի վրա և Բրյանսկի շրջանում ուկրաինացի զինվորականների իրագործած հարձակումը»:
Գերմանիայի կանցլեր Օլաֆ Շոլցն այսօր ասել է, որ ռուս-ուկրաինական պատերազմի մեկնարկից ի վեր գերմանական ռազմական կենտրոններում վարժական հավաքների են մասնակցել ավելի քան 3 հազար ուկրաինացի զինծառայողներ:
Նրա խոսքով՝ առաջիկայում այդ թիվը կավելանա: Այդ մասին կանցլերը հաղորդել է Բունդեսթագում:
«Ուկրաինացի զինծառայողների ուսուցման ծրագիրը սերտորեն կապված է Միացյալ Նահանգների և Մեծ Բրիտանիայի նմանօրինակ նախաձեռնությունների հետ, մեր երկիրը դառնում է Եվրոպայում ուկրաինացի զինծառայողների ուսուցման կենտրոնական հարթակը», - խորհրդարանի նիստում ասել է Շոլցը:
Նա վստահեցրել է, որ Գերմանիան շարունակում է ռազմական օգնություն տրամադրել Ուկրաինային և, մասնավորապես, Marder տեսակի զրահամեքենաներ ու Leopard 1 և Leopard 2 տեսակների հրասայլեր, ինչպես նաև այլ տեխնիկա է ուղարկում ռուսական հարձակումից պաշտպանվող երկիր:
Շոլցի խոսքով, Գերմանիան 2022 թվականի փետրվարից սկսած ավելի քան 14 միլիարդ եվրոյի աջակցություն է տրամադրել Ուկրաինային: Խոսքը ոչ միայն ռազմական, այլև մարդասիրական և ֆինասական օգնության մասին է:
Մարտի 1-ի լույս 2-ի գիշերը ռուսները հրթիռակոծել են Զապորոժիեն: Հրթիռներից մեկը հարվածել է 5-հարկանի շենքին: Զոհվել է առնվազն 3 մարդ, ևս 6 բնակիչներ վիրավորվել են:
Ըստ Ուկրաինայի իշխանությունների՝ ռուսները С-300 համակարգի հրթիռով են հարվածել շենքին: Փլատակներից դուրս է հանվել 11 բնակիչ, որոնողական աշխատանքները շարունակվում են:
Ուկրաինայի ոստիկանությունը քրեական գործ է հարուցել «Պատերազմի օրենքները և սովորույթները խախտելու» հոդվածով:
Երեկ երեկոյան ռուսական ուժերը հարվածներ են հասցրել Պոլտավայի շրջանի Կրեմենչուգ ավանի քաղաքացիական ենթակառուցվածքներին:
Խարկովի շրջանի ուղղությամբ ռուսները երեք հրթիռ են արձակել, կան վիրավորներ: Եվս 16 հարված նրանք հասցրել են «Շահեդ» տեսակի իրանական արտադրության անօդաչուներով: Ուկրաինացիների փոխանցմամբ, ՀՕՊ-ը խոցել է անօդաչուներից մի քանիսը: