Ռուս զինվորականների հսկողության տակ գտնվող Մելիտոպոլում մի քանի պայթյուն է որոտացել։ Չորս մարդ վիրավորվել է, տներ են վնասվել, հայտնել է Զապորոժիեի շրջանի Ռուսաստանի կողմից նշանակված վարչակազմի անդամ Վլադիմիր Ռոգովը։ Նա նաև հրապարակել է լուսանկարներ, որոնք ցույց են տալիս հրետակոծության հետևանքները:
Մելիտոպոլի ուկրաինացի քաղաքապետ Իվան Ֆեդորովը հայտնել է, որ հրթիռակոծված շենքերից մեկում տեղակայված են «թշնամի ուժային կառույցները»։
Ֆրանսիան Ռուսաստանին կոչ է անում վերանայել Բելառուսում մարտավարական միջուկային զենք տեղակայելու որոշումը:
Ֆրանսիայի ԱԳՆ հայտարարությունում նշվում է, որ «այս համաձայնությունը Եվրոպայում սպառազինությունների վերահսկման և ռազմավարական կայունության միջազգային ճարտարապետության էրոզիայի լրացուցիչ տարր է»։
ՆԱՏՕ-ն կիրակի օրը քննադատել է Բելառուսում միջուկային զենք տեղակայելու մասին Մոսկվայի որոշումը՝ այն անվանելով վտանգավոր և անպատասխանատու:
Միևնույն ժամանակ, Հյուսիսատլանտյան դաշինքի հայտարարությունում նշվում է, որ մինչ այժմ որևէ նախանշան չկա, որ Ռուսաստանը պատրաստվում է կիրառել միջուկային զենք: ՆԱՏՕ-ի դաշնակիցների մարտունակության մակարդակը նույնպես չի փոխվում:
Ուկրաինան պահանջել է շտապ ՄԱԿ-ի Անվտանգության խորհրդի նիստ գումարել՝ կապված Բելառուսում ռուսական միջուկային զենքի տեղակայման մասին ՌԴ նախագահ Վլադիմիր Պուտինի հայտարարության հետ։ Այս մասին ասվում է Ուկրաինայի արտաքին գործերի նախարարության հայտարարության մեջ։
Կիևը վճռական քայլեր է ակնկալում Անվտանգության խորհրդի մշտական անդամներից՝ Ֆրանսիայից, Մեծ Բրիտանիայից, ԱՄՆ-ից և Չինաստանից։
Ռուսաստանը նույնպես այս կազմակերպության մշտական անդամ է և դրանում վետոյի իրավունք ունի։
Բելառուսում մարտավարական միջուկային զենք տեղակայելու Ռուսաստանի մտադրությունները Ուկրաինան «հերթական սադրիչ քայլն» է անվանում։
ԱՄՆ-ն արձագանքել է Բելառուսում ռուսական մարտավարական միջուկային զենքի հնարավոր տեղակայման մասին ՌԴ նախագահ Վլադիմիր Պուտինի երեկվա հայտարարությանը։ Պետքարտուղարության խոսնակ Վեդանտ Պատելը CNN-ին ասել է, որ գերատեսչությունը կշարունակի վերահսկել իրավիճակը։ Սակայն, ընդգծել է նա, ԱՄՆ Պետդեպարտամենտը որևէ նշան չի տեսնում, որ Ռուսաստանը պատրաստվում է միջուկային զենք կիրառել Ուկրաինայում, և անհրաժեշտ չի համարում սեփական միջուկային ուժերը բարձր պատրաստության բերել։
Պատերազմի ուսումնասիրման ամերիկյան ինստիտուտը (ISW) Պուտինի հարցազրույցն անվանել է «այլ տեղեկատվական օպերացիա»։ Ինստիտուտի փորձագետները կարծում են, որ Պուտինը ուռճացնում է ռուսական ռազմարդյունաբերական համալիրը մոբիլիզացնելու հնարավորությունը՝ Ուկրաինայի արևմտյան դաշնակիցներին վախեցնելու համար։
Պուտինն ավելի վաղ հայտարարել է, որ Ռուսաստանը մտադիր է Բելառուսում տեղակայել իր մարտավարական միջուկային զենքը՝ երկրի ավտորիտար առաջնորդ Ալեքսանդր Լուկաշենկոյի խնդրանքով։ ՌԴ նախագահի խոսքով՝ Բելառուսում մարտավարական միջուկային զենքի պահեստավորման շինարարությունը պետք է ավարտվի մինչև հուլիսի 1-ը։ Բացի այդ, Պուտինի խոսքով, Բելառուսին է հանձնվել «Իսկանդեր» հրթիռային համակարգը, որը կարող է օգտագործել այս զենքը։
ՄԱԿ-ի տվյալներով՝ վերջին վեց ամսվա ընթացքում Ուկրաինայում 6 հազար խաղաղ բնակիչ է տուժել, որոնցից 1600-ը սպանվել է։ Կազմակերպության Մարդու իրավունքների գերագույն հանձնակատարի գրասենյակն ընդգծում է՝ իրականում կորուստները կարող են ավելի մեծ լինել:
Երեկ հրապարակված զեկույցի համաձայն՝ Ուկրաինայի քաղաքացիական ենթակառուցվածքների վրա ռուսական հարձակումների հետևանքով անցյալ տարվա հոկտեմբերից ի վեր ավելի քան 100 խաղաղ բնակիչ է զոհվել, մոտ 400-ը՝ վիրավորվել։
ՄԱԿ-ի պաշտոնյաները փաստագրել են ռուս զինվորականների կողմից 21 խաղաղ բնակիչների սպանություն, այդ թվում՝ արտադատական մահապատիժներ, քաղաքացիական անձանց վրա հարձակումներ:
ՄԱԿ-ի առաքելությունն արձանագրել է նաև ռուս ռազմագերիների սպանության առնվազն 25 դեպք, ևս 15 ուկրաինացի ռազմագերի էլ սպանվել է ռուսաստանցի զինվորականների կողմից։
ՄԱԿ-ի դիտորդական առաքելության ղեկավար Մաթիլդա Բոգների խոսքով՝ ուկրաինացի զինվորների 15 մահապատիժներից 11-ը իրականացրել են «Վագներ» մասնավոր ռազմական ընկերության վարձկանները։
Ուկրաինան Ռուսաստանին է հանձնել ծանր վիրավոր գերիների, հայտնել են ուկրաինական պաշտոնական աղբյուրները։
«Այս դեպքում խոսքը ոչ թե ռազմագերիների փոխանակման, այլ հայրենադարձության մասին է՝ ծանր վիրավոր գերիներին վերադարձնել առանց որևէ պայմանի, ինչպես նախատեսված է միջազգային մարդասիրական իրավունքով», - ասված է ուկրաինական կողմի պաշտոնական հաղորդագրությոնում։
Ռուսաստանին հանձնված ծանր վիրավորների ստույգ թիվը չի նշվում՝ Կիևը նրանց թիվը չի հայտնել, Մոսկվան առայժմ չի մեկնաբանել այս տեղեկատվությունը:
Ռուսական զորքերն այս գիշեր իրանական Shahed անօդաչու թռչող սարքերով հարձակվել են Կրիվոյ Ռոգի վրա, հաղորդում են Ուկրաինայի իշխանությունները:
Դնեպրոպետրովսկի շրջանային վարչակազմի ղեկավար Սերգեյ Լիսակի խոսքով՝ ոչնչացվել է մեկ անօդաչու թռչող սարք, 5-ը խոցել են թիրախները։ Ըստ նրա՝ զոհեր և վիրավորներ չկան։
«Հարձակման հետևանքները պարզվում են», - գրել է Լիսակը Տելեգրամում։
Եվրահանձնաժողովի ղեկավար Ուրսուլա ֆոն դեր Լայենը հայտարարել է պատերազմի ընթացքում Ռուսաստան տեղափոխված ուկրաինացի երեխաների վերադարձի վերաբերյալ համաժողով կազմակերպելու մտադրության մասին։
«Սա սարսափելի հիշեցում է մեր պատմության ամենամութ ժամանակների մասին: {…} Սա ռազմական հանցագործություն է», - ասել է նա Եվրամիության գագաթնաժողովից հետո:
Ռուսաստանի Անվտանգության խորհրդի նախագահի տեղակալ Դմիտրի Մեդվեդևը ռուսական լրատվամիջոցներին տված հարցազրույցում ասել է, որ Միջազգային քրեական դատարանի օրդերով Ռուսաստանի նախագահի ձերբակալությունը «հասկանալի է՝ երբեք իրականություն չի դառնա»: «Բայց պատկերացրեք դա կատարվել է՝ միջուկային տերության գործող ղեկավարը ժամանել է, ենթադրենք, Գերմանիա և նրան ձերբակալել են։ Ի՞նչ է դա։ Ռուսաստանի Դաշնությանը պատերազմ հայտարարել», - ընդգծել է Մեդվեդևը:
Նրա խոսքերով՝ Ուկրաինան Ռուսաստանի մաս է. - «Մենք երկար ժամանակ հաշտվել ենք, որ ապրում ենք տարբեր բնակարաններում։ Ստիպված հաշտվել ենք դրա հետ, հորինած սահմանների, տարածքների հետ, որոնք միշտ Ռուսական կայսրություն են եղել»։
Մեդվեդևի կարծիքով՝ միջուկային հակամարտության վտանգը մեծանում է, բայց ԱՄՆ-ի և նրա դաշնակիցների նկատմամբ Ռուսաստանի միջուկային հավասարակշռությունը և նույնիսկ գերազանցությունը երաշխավորում է Ռուսաստանի ամբողջականությունը, և «եթե դա չլիներ, մեզ պատառների կբաժանեին»։ Նրա պատկերացումներով՝ Արևմուտքը չի սիրում Ռուսաստանի և Չինաստանի անկախությունը, առաջիկա տասնամյակները հանգիստ չեն լինի, քանի որ Արևմուտքը ցանկանում է Ռուսաստանը տրոհել փոքր ու թույլ պետությունների։