Ընթացիկ տարվա օգոստոսի վերջին ուկրաինական զորքերը կկարողանան ազատագրել Ռուսաստանի կողմից բռնակցված Ղրիմ թերակղզին՝ պայմանով, որ Արևմուտքը Կիևին կտրամադրի հեռահար ճշգրիտ զենք։ Նման կարծիք է հայտնել Եվրոպայում ԱՄՆ ուժերի նախկին հրամանատար, պաշտոնաթող գեներալ-լեյտենանտ Բեն Հոջեսը Deutsche Welle-ին տված հարցազրույցում։
«Կարծում եմ, որ Ուկրաինայի գլխավոր շտաբը շատ լավ նախապատրաստվել է հակահարձակման: Կարծում եմ, մենք կտեսնենք շատ պրոֆեսիոնալ հարձակողական գործողություններ, շատ արդյունավետ, և դրա նպատակը կլինի մեկուսացնել Ղրիմը և պայմաններ ստեղծել թերակղզու հնարավոր ազատման համար այս տարվա վերջին», - ասել է Հոջեսը։
Պատասխանելով DW-ի պարզաբանող հարցին, թե արդյոք նա այսօր էլ պնդում է իր նախկին կանխատեսումը, որ Ուկրաինայի զինված ուժերը կկարողանան Ղրիմ հասնել ամռանը, Եվրոպայում ԱՄՆ ուժերի նախկին հրամանատարը նշել է. - «Այո, բայց մինչև օգոստոսի վերջ։ Նրանք կկարողանան ազատագրել Ղրիմը, եթե, և ես միշտ այդ վերապահումն արել եմ, եթե մենք նրանց տրամադրենք հեռահար ճշգրիտ զենքեր, որոնք անհրաժեշտ են դա անելու համար, այո, նրանք, անշուշտ, կարող են դա անել»:
Ուկրաինական գերությունից հայրենիք են վերադարձել 106 ռուսաստանցի ռազմագերիներ:
Այդ մասին հայտնել է Ռուսաստանի պաշտպանության նախարարությունը, որի փոխանցմամբ, «106 զինծառայողների կյանքը գերության պայմաններում վտանգված է եղել»:
Ռազմագերիներին օդանավերով փոխադրում են Ռուսաստան, որտեղ նախ Մոսկվայում ստուգումների կենթարկվեն, ապա բուժման նպատակով կտեղափոխեն Պաշտպանության նախարարության բուժհիմնարկներ:
«Ազատություն ստացած բոլոր զինծառայողներին տրվում է անհրաժեշտ բժշկական և հոգեբանական օգնություն»,- ասվում է նախարարության հաղորդագրությունում:
Ուկրաինայի նախագահ Վլադիմիր Զելենսկին խստորեն դատապարտել է երեկ՝ ուղղափառ հավատացյալների աշխարհում նշվող Ծաղկազարդի տոնական օրվա ընթացքում, ռուսների օդային հարվածներն ուկրաինական բնակավայրերին:
Նա ասել է, թե ապրիլի 9-ին՝ կիրակի օրը, թշնամին ավելի քան 40 օդային հարված է հասցրել:
«Քրիստոնեական ամեն լուսավոր տոն մեզ մի բան է սովորեցնում՝ մենք գուցե չգիտենք, թե ինչպես, բայց թշնամին միևնույն է կպարտվի», - ասել է Զելենսկին` դիմելով հայրենակիցներին:
Նա հայտնել է, որ Զապորոժիեում ռուսների հարվածից սպանվել են մի 50-ամյա հայր և նրա 11-ամյա դուստրը:
Արտակարգ իրավիճակի նախարարության փրկարարները շենքի ավերակներից ողջ վիճակում դուրս են հանել սպանված տղամարդու կնոջը և մորը:
«Այդպես է ահաբեկիչ պետությունը նշում Ծաղկազարդի օրը: Դրանով Ռուսաստանն իրեն էլ ավելի է մեկուսացնում աշխարհից ու մարդկությունից»,- ասել է Զելենսկին:
Ռուսաստանի Դաշնության նախագահ Վլադիմիր Պուտինի մամլո խոսնակ Դմիտրի Պեսկովի փոխանցմամբ, Ֆրանսիան չի կարող հանդես գալ իբրև անաչառ միջնորդ ռուս-ուկրաինական հակամարտության կարգավորման խնդրում:
Այդպես նա արձագանքել է Պեկինում Չինաստանի և Ֆրանսիայի նախագահներ Սի Ծինպինի և Էմանյուել Մակրոնի վերջերս տեղի ունեցած հանդիպման ընթացքում ռուս-ուկրաինական պատերազմի թեման արծարծելու փաստին:
«Փարիզն այս կոնֆլիկտում գործնականում կողմերից մեկին է պաշտպանում: Ավելին, ուղղակի և անուղղակի ներգրավված է Ուկրաինայի կողմից: Հետևաբար, դժվար է պատկերացնել Ֆրանսիան միջնորդի դերում», - ասել է Պեսկովը:
Էմանյուել Մակրոնը Պեկինում Սի Ծինպինին կոչ է արել օգտագործել Չինաստանի ազդեցությունը Ռուսաստանի վրա և Ուկրաինայի հարցում «սթափեցնել ռուսներին»:
Բելառուսի նախագահ Ալեքսանդր Լուկաշենկոն այսօր Մինսկում ընդունել է Ռուսաստանի պաշտպանության նախարար Սերգեյ Շոյգուին:
Ըստ BelTa բելառուսական լրատվական գործակալության, նախագահը և նախարարը քննարկում են ռազմական բնագավառում երկու երկրների համագործակցության հարցերը և այդ առումով վերջերս Մոսկվայի ու Մինսկի միջև ձեռք բերված համաձայնությունների իրականացման ընթացքը:
«Ռուսաստանի նախագահ Վլադիմիր Պուտինի հետ մեր վերջին հանդիպման ավարտին մենք պայմանավորվել ենք, որ Դուք ձեր մասնագետների հետ կժամանեք Բելառուս, որտեղ էլ կնստենք ու միասին կքննարկենք Բելառուսի անվտանգության հետ կապված հարցերը», - հայտնել է Լուկաշենկոն:
Նրա խոսքով, Շոյգուի հետ քննարկվում է ագրեսիայի դեպքում Մինսկին Մոսկվայի կողմից անվտանգության երաշխիքներ տրամադրելու հնարավորությունը:
«Մեր բանակցությունների ընթացքում նշել ենք, որ Բելառուսի դեմ ագրեսիայի պարագայում Ռուսաստանն իր սեփական տարածքի նման է պաշտպանելու Բելառուսը, մեզ եղբայրական Ռուսաստանից անհրաժեշտ են անվտանգության լիարժեք երաշխիքներ», - ասել է Լուկաշենկոն Շոյգուին:
Նա ռուսաստանցի նախարարին շնորհակալություն է հայտնել Բելառուսի տարածքում մի քանի տասնյակ հազար ռուսաստանցի զինծառայողներ տեղակայելու համար:
Կուրսկի շրջանի նահանգապետ Ռոման Ստարովոյտը տեղեկացրել է, որ հաշվի առնելով անվտանգության ապահովման խնդիրները| տեղական իշխանությունները որոշել են չեղարկել Կուրսկ քաղաքում մայիսի 9-ի տոնական զորահանդեսը:
Նահանգապետի փոխանցմամբ, օպերատիվ շտաբը որոշել է Հաղթանակի օրը խստացնել հակաահաբեկչական միջոցները:
Անցած շաբաթ Հաղթանակի զորահանդեսը չեղարկելու մասին է հայտնել նաև Բրյանսկի նահանգապետ Վյաչեսլավ Գլադկովը: Նա ասել է, թե իշխանությունները չեն ցանկանում «կենտրոնում մեծ թվով զինտեխնիկայով և զինծառայողներով սադրել թշնամուն»:
Ուկրաինայի հետ սահմանակցող Կուրսկի, Բելգորոդի և Բրյանսկի շրջաններում որոշ բնակավայրեր ռուս-ուկրաինական պատերազմի ընթացքում պարբերաբար հայտնվում են կրակի տակ, կան զոհեր և ավերածություններ:
Կրեմլի խոսնակ Դմիտրի Պեսկովը վերջերս հավաստիացրել է, որ Մոսկվայում Հաղթանակի օրվա զորահանդեսը չեղարկելու կամ դրա ձևաչափը փոխելու խնդիր չկա:
Կուրսկի շրջանի նահանգապետ Ռոման Ստարովոյտը տեղեկացրել է, որ հաշվի առնելով անվտանգության ապահովման խնդիրները| տեղական իշխանությունները որոշել են չեղարկել Կուրսկ քաղաքում մայիսի 9-ի տոնական զորահանդեսը:
Նահանգապետի փոխանցմամբ, օպերատիվ շտաբը որոշել է Հաղթանակի օրը խստացնել հակաահաբեկչական միջոցները:
Անցած շաբաթ Հաղթանակի զորահանդեսը չեղարկելու մասին է հայտնել նաև Բրյանսկի նահանգապետ Վյաչեսլավ Գլադկովը: Նա ասել է, թե իշխանությունները չեն ցանկանում «կենտրոնում մեծ թվով զինտեխնիկայով և զինծառայողներով սադրել թշնամուն»:
Ուկրաինայի հետ սահմանակցող Կուրսկի, Բելգորոդի և Բրյանսկի շրջաններում որոշ բնակավայրեր ռուս-ուկրաինական պատերազմի ընթացքում պարբերաբար հայտնվում են կրակի տակ, կան զոհեր և ավերածություններ:
Կրեմլի խոսնակ Դմիտրի Պեսկովը վերջերս հավաստիացրել է, որ Մոսկվայում Հաղթանակի օրվա զորահանդեսը չեղարկելու կամ դրա ձևաչափը փոխելու խնդիր չկա:
Ռուսաստանի ներքին գործերի նախարարությունը հայտնել է, որ ծանուցելով այլ երկրներում քաղաքացիության կամ բնակության իրավունքի մասին՝ ռուսաստանցիներն ի շարս այլոց նշել են նաև Հայաստանը:
«Առավել հաճախ Ռուսաստանի քաղաքացիները հայտնել են Իսրայելում, Ուկրաինայում, Հայաստանում, Թուրքիայում, Գերմանիայում, Վրաստանում, Միացյալ Նահանգներում, Մոլդովայում, Իսպանիայում, Իտաիայում և Ֆրանսիայում քաղաքացիություն կամ բնակության թույլտվություն ունենալու մասին», - ՏԱՍՍ լրատվական գործակալությանը հայտնել է Ռուսաստանի ներքին գործերի նախարարության մամլո վարչության ներկայացուցիչը:
Անցյալ տարվա ընթացքում ռուսաստանցիներն ընդհանուր հաշվով ներկայացրել են ավելի քան 50 հազար նմանօրինակ ծանուցումներ, որոնցից 31 հազար՝ այլ երկրում քաղաքացիություն ունենալու, և 19 հազարը՝ այլ երկրում օրինական կարգով բնակվելու իրավունքի մասին են:
Ռուս զինվորականները սկսել են մշակել հյուսիսարևմտյան սահմանների պաշտպանությունը՝ կապված ՆԱՏՕ-ին Ֆինլանդիայի միանալուց հետո սպառնալիքների բարձր մակարդակի հետ, ասել է Ռուսաստանի օդատիեզերական ուժերի գլխավոր հրամանատարի տեղակալ Անդրեյ Դյոմինը։
«Ֆինլանդիան մաս կազմեց ՆԱՏՕ-ի բլոկին: Շվեդիան պատրաստվում է միանալ դաշինքին: Այս պայմաններում հակաօդային պաշտպանության ուժերը մշակում են երկրի հյուսիս-արևմուտքում պետական սահմանի պաշտպանության հետ կախված հարցեր՝ սպառնալիքների բարձր մակարդակին համապատասխան», - ասել է Դյոմինը:
Ճապոնիայի կառավարությունը կշարունակի ավելացնել պատժամիջոցների միջոցով ճնշումը Ռուսաստանի վրա՝ միաժամանակ մեծացնելով աջակցությունն Ուկրաինային, այսօր հայտարարել է Ճապոնիայի նախարարների կաբինետի գլխավոր քարտուղար Հիրոկաձու Մացունոն։
«Միջազգային կարգը պաշտպանելու համար, որպես Մեծ յոթնյակի նախագահող և ՄԱԿ-ի Անվտանգության խորհրդի ոչ-մշտական անդամ, Ճապոնիան, սերտ համագործակցելով միջազգային հանրության, առաջին հերթին՝ Մեծ յոթնյակի հետ, կշարունակի ուժեղացնել Ռուսաստանի Դաշնության դեմ կոշտ պատժամիջոցները և աջակցությունն Ուկրաինային», - ասել է նա։