Ուկրաինայի պաշտպանության նախարարության գլխավոր հետախուզական վարչության ղեկավար Կիրիլ Բուդանովն այսօր հայտարարել է, թե մինչև տարվա վերջ ուկրաինական կողմը կվերադարձնի ռուսներին անցած բոլոր տարածքները, վճռական մարտերն էլ կսկսվեն մինչև ամառ, այսինքն՝ առաջիկա շաբաթներին։
«Այս պատերազմին վերջ դնելու միայն մեկ ճանապարհ կա՝ սա ցանկացած ձևով 1991թ. սահմանների վերադարձն է։ Այս պատերազմն առանց տարածքային խնդիրների լուծման անհնար է, անիրատեսական։ Ուկրաինան երբեք չի համաձայնի հանձնել իր տարածքների որևէ մաս», - ասել է նա։
Սպասվող հակահարձակման հստակ ժամկետ Բուդանովը չի նշել, շեշտելով, թե դա գաղտնիք է։
Պաշտոնապես հակահարձակումը դեռ չի սկսվել։ BBC-ի աղբյուրները, սակայն, այսօր հաստատել են Ուկրաինայի զինված ուժերի առաջխաղացումը Խերսոնի մոտակայքում։
Զինվորականները «որոշակի տեղաշարժ են իրականացնում Դնեպր գետով Խերսոնի շրջանում», - BBC-ին հաստատել են Ուկրաինայի զինված ուժերի աղբյուրները։
Հանգստյան օրերին այս մասին գրել էին ռուս բլոգերները։ Խերսոնի շրջանի օկուպացիոն վարչակազմը հերքել էր տեղեկությունը։
Ուկրաինական ուժերի առաջխաղացումը հաստատել է նաև Պատերազմի ուսումնասիրման ամերիկյան ինստիտուտը։
Ամերիկացի փորձագետները, բացի այդ, մանրամասն վերլուծելով ռազմաճակատի տարբեր հատվածներում ռուսական ուժերի կազմն ու վիճակը, պնդում են, որ նրանք վատ են պատրաստված ուկրաինական սպասվող հարձակմանը՝ ստորաբաժանումները հյուծված են, մոբիլիզացվածների ուժերը բավականաչափ պատրաստված չեն, ստորաբաժանումների միջև գործողությունների համակարգումն էլ վատն է:
Ռուսական կողմը, սակայն, շարունակում է խոսել հաջողությունների մասին, պնդելով, թե արդեն հսկում է Բախմուտ քաղաքի մեծ մասը, այդ թվում՝ ամբողջ կենտրոնը։ Կիևն, իր հերթին, հայտարարում է, թե բանակը կշարունակի պայքարել մինչև վերջ։
«Ուկրաինան չի կարող Բախմուտը հանձնել ռուսներին»,- երեկ ասել է նախագահ Զելենսկին։
«Մենք չենք կարող հրաժարվել Բախմուտից, քանի որ դա կօգնի ընդլայնել ռազմական գործողությունների ճակատը և հնարավորություն կտա ռուսական զորքերին և «Վագներին» գրավել շատ հողեր», - հավելել է նա։
Կատաղի մարտերը թե՛ Բախմուտում, թե՛ Դոնբասի այլ հատվածներում շարունակվում են։
Միաժամանակ, ինչպես այսօր հայտնել է Ռուսաստանի պաշտպանության նախարարությունը, գիշերը հարձակման է ենթարկվել բռնակցված Սևաստոպոլը. - «Այսօր՝ Մոսկվայի ժամանակով մոտավորապես ժամը 03:30-ին, Կիևի ռեժիմը երեք առանց անձնակազմի արագաշարժերով փորձել է գրոհել Սևաստոպոլում գտնվող Սևծովյան նավատորմի բազան: Սևաստոպոլի ծովածոցի մոտակայքում գտնվող ուժերը ոչնչացրել են հակառակորդի բոլոր առանց անձնակազմի արագընթաց նավերը։ Ոչ մի կորուստ»։
Կիևը պատրաստվում էր անցած փետրվարի 24-ին՝ պատերազմի մեկնարկի տարելիցին, հարվածներ հասցնել Մոսկվային, բայց հրաժարվել է այդ մտադրությունից Վաշինգտոնի խնդրանքով, գրել է Washington Post-ը՝ հղում անելով Պենտագոնի գաղտնի փաստաթղթերին, որոնք շաբաթներ առաջ արտահոսքի արդյունքում հայտնվել են համացանցում։ Ըստ լրատվամիջոցի՝ փաստաթղթերում չի նշվում, թե կոնկրետ ով է դեմ եղել հարվածներին, կամ ինչու են ուկրաինացի պաշտոնյաները փոխել իրենց կարծիքը։
Պաշտոնական Կիևն այս հրապարակումներն առայժմ ո՛չ հերքել է, ո՛չ էլ հաստատել։
Ռուսաստանի կողմից բռնակցված Սևաստոպոլի նահանգապետ Միխայիլ Ռազվոզժաևը հաստատել է ծովային անօդաչու սարքերով քաղաքին հարվածներ հասցնելու փորձերի մասին տեղեկությունները։
«Թշնամական ծովային անօդաչուների ոչնչացման ընթացքում որոտացած պայթյունների հետևանքով Սևաստոպոլի չորս շենքեր զրկվել են ապակիներից», - իր տելեգրամ-ալիքում գրել է ռուսաստանցի պաշտոնյան՝ նշելով, որ հարձակումը տեղի է ունեցել կեսգիշերից քիչ անց։
Ռազվոզժաևի խոսքով՝ անօդաչուները ոչնչացվել են քաղաքի արտաքին ծովային սահմանագծին՝ մինչև Սևաստոպոլի կենտրոնին հարող Ստրելեցկի ծովածոց մուտք գործելը։
Եվրամիությունը պատժամիջոցների նոր փաթեթով կընդլայնի Ռուսաստանի տարածքով ապրանքների տարանցման արգելքը։ Այս մասին գրում է Bloomberg-ը՝ վկայակոչելով անանուն աղբյուրներին, որոնք ծանոթ են պատժամիջոցների նոր միջոցների առաջարկներին։
Ենթադրվում է, որ Ռուսաստանի տարածքով երրորդ երկրներ փոխադրումն ամբողջությամբ չի արգելվելու, սահմանափակումները կարող են տարածվել մի շարք տեխնոլոգիաների և սարքավորումների տեսակների վրա։
Գործակալության տվյալներով՝ Լեհաստանը, Էստոնիան և Լիտվան ԵՄ-ից պահանջում են ամբողջությամբ արգելել Ռուսաստանի տարածքով ապրանքների տարանցումը, որոնք կարող են օգտագործվել ռուսական ռազմարդյունաբերական համալիրի, ավիացիայի և տիեզերական արդյունաբերության համար։
Ուկրաինայի նախագահ Վլադիմիր Զելենսկին հաստատել է երկրի Պաշտպանության և ազգային անվտանգության խորհրդի որոշումը, որով անհատական պատժամիջոցներ են սահմանվում Ուկրաինա ներխուժմանն աջակցած մի շարք ռուսաստանցիների և երրորդ երկրների քաղաքացիների դեմ։
«Ինտերֆաքս Ուկրաինա» գործակալության փոխանցմամբ՝ ցուցակում ընդգրկված են ռուսաստանցի մեծահարուստ Վլադիմիր Պոտանինի ընտանիքի անդամները։
Պոտանինի ընտանիքին պատկանող «Ինտերռոս» կոնցերնի և մի շարք բանկերի գործունեությունը երկրի տարածքում արգելվել է։ Պատժամիջոցների ցուցակում ընդգրկվել են նաև Իրանի մեկ և Մալիի ութ քաղաքացիներ։
Գերմանիայի իշխանությունները որոշել են երկրի տարածքում աշխատող ռուսաստանցի դիվանագետների զանգվածային արտաքսում իրականացնել։ Այս մասին ТАСС գործակալությանը հաղորդել են Ռուսաստանի ԱԳՆ-ից՝ պնդելով, որ պաշտոնական Բեռլինը նախապես խոստացել էր մեծ աղմուկ չբարձրացնել այդ առթիվ։
«Հետագայում, սակայն, գերմանական կողմը խախտել է տրված խոստումը`դիվանագետների արտաքսման մասին տեղեկացնելով այն լրատվամիջոցներին, որոնք «պարբերաբար օգտագործվում են տեղեկատվության վերահսկելի արտահոսքերի համար», - ռուսական գործակալությանը փոխանցել է ԱԳՆ աղբյուրը։
Ռուսաստանի դիվանագիտական գերատեսչությունից նաև հաղորդել են, որ Մոսկվան Բեռլինի այս քայլին «հայելային պատասխան կտա», ինչպես նաև զգալիորեն կկրճատի Ռուսաստանի տարածքում հավատարմագրված գերմանացի դիվանագետների առավելագույն թիվը։
Ռուսական Росатом ընկերությունը պնդում է, որ ուկրաինական անօդաչու թռչող սարքերը հարվածել են Զապորոժիեի ԱԷԿ-ին։ Այս մասին հայտարարել է ընկերության ղեկավարի խորհրդական Ռենատ Կարչաան՝ նշելով, որ հարվածների հետևանքով կոտրվել են ԱԷԿ-ի չորորդ էներգաբլոկի տուրբինային դահլիճի ապակիները։
Կարչաան, սակայն, չի հստակեցրել, թե հայտկապես երբ են արձանագրվել ուկրաինական ԱԹՍ-ների հարվածները։ Նախօրեին Զապորոժիեի ատոմակայանի շուրջ ստեղծված իրավիճակի առթիվ իր մտահոգությունն էր հայտնել Ատոմային էներգիայի միջազգային գործակալության տնօրեն Ռաֆայել Գրոսին՝ նշելով, որ կայանի մերձակայքում պարբերաբար հուժկու հրետանային հարվածներ են արձանագրվում։
Կուրսկի նահանգապետ Ռոման Ստարովոյտն այսօր հայտնել է մարզի տարածքում ԱԹՍ-ի ոչնչացման մասին։
«Սունջայի շրջանում մեր սահմանապահները թշնամական անօդաչու թռչող սարք են խոցել», -իր Տելեգրամ ալիքում գրել է նահանգապետը։
Ավելի վաղ հայտնի էր դարձել, որ ուկրաինական անօդաչու սարքը Սունջայի շրջանում գնդակոծել էր պաշտպանական կառույցների շինարարության մեջ ներգրավված ինժեներական տեխնիկան։
Զոհերի և վիրավորների մասին ռուսական կողմը չի հաղորդում։
Ալբանիան չեղարկեց Ռուսաստանի քաղաքացիների համար ազատ վիզային ռեժիմը, ասվում է ՌԴ-ում Ալբանիայի դեսպանատան կայքէջում հրապարակված հաղորդագրությունում։
Նախկինում ռուսաստանցիները կարող էին մայիսի 1-ից մինչև սեպտեմբերի 30-ը առանց վիզայի այդ երկիր մտնել, այժմ Ալբանիա այցելելու համար Տիրանան պահանջում է մուտքի թույլտվություն ստանալ։
Գերմանիայում մեկնարկել է այսպես կոչված Ռամշտայնի ձևաչափով հերթական հանդիպումը, որի մասնակիցները քննարկում են Ուկրաինային ռազմական աջակցությունը։
Նիստի մեկնարկից առաջ բանակցություններ են վարել Ուկրաինայի և ԱՄՆ-ի պաշտպանության նախարարները։ Ալեքսեյ Ռեզնիկովի խոսքով՝ Լլոյդ Օսթինի հետ քննարկել են Կիևին սպառազինության առաջիկա մատակարարումները։
Ռամշտայնի ձևաչափով հանդիպմանը մասնակցում է նաև ՆԱՏՕ-ի գլխավոր քարտուղար Յենս Ստոլտենբերգը, ով նախօրեին այցելել էր Կիև: Ստոլտենբերգի խոսքով՝ դաշինքի «բոլոր անդամները կողմ են, որ Ուկրաինան ընդգրկվի ՆԱՏՕ-ի կազմում»։ Հյուսաստլանտյան դաշինքի ղեկավարը, սակայն, խուսափել է հստակեցնել՝ արդյոք կոնկրետ քայլեր կձեռնարկվեն ՆԱՏՕ-ի առաջիկա գագաթնաժողովում՝ հուլիսին, Կիևի անդամակցության հարցով: Ստոլտենբերգը նշել է, որ այժմ գլխավոր անելիքը Պուտինի բանակի դեմ պատերազմում Կիևին աջակցելն է: