Ռուսները Սև ծովից «Կալիբր» հրթիռներով գիշերը հարձակում են իրականացրել Նիկոլաև քաղաքի վրա։ Ուկրաինական կողմը հաղորդում է մեկ զոհվածի և 23 վիրավորի մասին:
Ուկրաինայի նախագահ Վլադիմիր Զելենսկին տեսանյութ է հրապարակել՝ ցուցադրելով Նիկոլաևի գիշերային հրետակոծության հետևանքները: «Գիշերվա ընթացքում Ռուսաստանը Սև ծովից արձակված չորս «Կալիբր» հրթիռներով գնդակոծել է Նիկոլաևը, բարձր ճշգրտության զենքերն ուղղված են եղել առանձնատների, պատմական շենքի և բարձրահարկ շենքի վրա», - ասել է նա՝ կատարվածն անվանելով մարդկության դեմ հանցագործություն։
Ուկրաինացի լրագրող Բոգդան Բիտիկը, ով օգնել է իտալական La Repubblica թերթի թղթակից Կորադո Զունինոյին լուսաբանել Ուկրաինայի պատերազմը, մահացել է դիպուկահարի կրակոցից Խերսոնի մատույցներում: Իտալացի լրագրողն ուսի շրջանում վիրավորում է ստացել։
Սպանված լրագրողի դին դեռ չի հաջողվում տարհանել։
Երկու լրագրողներն էլ կրել են «Մամուլ» գրությամբ շերտավոր բաճկոններ։
Ուկրաինայի արտաքին գործերի նախարար Դմիտրի Կուլեբան իտալական լրատվամիջոցներին ասել է, որ սպանության համար պատասխանատու են ռուսները։ «Ռուսներին չի հետաքրքրում՝ դու ռո՞ւս ես, իտալացի՞, թե՞ ուկրաինացի, նրանք ուղղակի կրակում են», - ասել է նա։
Իտալիայի արտաքին գործերի նախարար Անտոնիո Տայանին հայտնել է, որ իր գրասենյակը և Կիևում Իտալիայի դեսպանատունն աշխատում են Ուկրաինայի իշխանությունների հետ՝ Զունինոյին Իտալիա վերադարձնելու ուղղությամբ։
Ռուսական ուժերի կողմից գրավված Մելիտոպոլ քաղաքում այսօր իրականացրած պայթյունի հետևանքով սպանվել է ոստիկանության շրջանային բաժնի պետ Ալեքսանդր Միշչենկոն։ Մինչ Ռուսաստանի Ուկրաինա ներխուժելը նա նշանակվել էր Պրիազովսկիի շրջանի ոստիկանության պետ և շարունակել էր աշխատել քաղաքը ռուսների կողմից գրավելուց հետո։
Մելիտոպոլի քաղաքային վարչակազմը հայտնում, որ այսօր առավոտյան բազմաբնակարան շենքի մուտքի մոտ պայթյունի հետևանքով երկու ոստիկան է վիրավորվել, որոնցից մեկը հիվանդանոցում մահացել է։
Ռուսաստանը և Ուկրաինան այսօր ռազմագերիների փոխանակում են կատարել: Տուն են վերադարձել 44 ուկրաինացի և 40 ռուսաստանցի գերեվարված զինծառայողներ:
Ուկրաինայի նախագահի աշխատակազմի ղեկավար Անդրեյ Երմակն ասել է, որ Ուկրաինա են վերադարձել 36 շարքայիններ և 6 սպաներ՝ սահմանապահներ, գվարդիականներ և նավաստիներ: Ազատվել է նաև երկու քաղաքացիական անձ:
Ռուսաստանի պաշտպանության նախարարությունը հայտնել է, որ 40 ռուսաստանցի ռազմագերիներին օդանավով փոխադրել են Մոսկվա, որտեղ նրանք բժշկական ստուգումների կենթարկվեն, ինչից հետո ապաքինման համար կուղարկվեն գերատեսչությանը պատկանող հիվանդանոցներ:
«Վագներ» մասնավոր ռազմական ընկերության հիմնադիր, Ռուսաստանի նախագահ Վլադիմիր Պուտինի մերձավոր դաշնակիցներից մեկի համբավն ունեցող մեծահարուստ Եվգենի Պրիգոժինն ասել է, թե ուկրաինական բանակն, ամենայն հավանականությամբ, մայիսի 2-ից հետո կանցնի հզոր հակագրոհի:
«Ի՞նչ է հիմա կատարվում: Անձրևներ են, վերջինն, ըստ օդերևութաբանների, կտեղա մայիսի 2-ին, ապա մի քանի օր է պետք, որ քամին հողը չորացնի: Դրանից հետո նրանք [ուկրաինացի զինծառայողները] կարող են առաջ շարժվել», - ասել է Պրիգոժինը:
Նա չի բացառել, որ ուկրաինացիները կարող են խոշոր հակագրոհի մեկնարկը հարմարեցնել մայիսի 9-ին, որ «փչացնեն ռուսների տոնը»:
«Ուկրաինացիների գրոհն անխուսափելի է», - ասել է Պրիգոժինը և ավելացրել է, որ հենց այս օրերին Բախմուտի շրջանում արյունալի ծանրագույն մարտեր են ընթանում:
«Վագներ» մասնավոր ռազմական ընկերության հիմնադիրը նաև վերստին դատապարտել է Ռուսաստանի բանակի ղեկավարներին, ասելով, թե վագներականները հարկ եղած չափով զինամթերք չեն ստանում:
Այսօր տեղի է ունեցել Չինաստանի և Ուկրաինայի նախագահներ Սի Ծինպինի և Վլադիմիր Զելենսկու հեռախոսազրույցը: Տեղեկությունը հայտնել է Չինաստանի կենտրոնական հեռուստատեսությունը:
Չինաստանի ղեկավարը հավաստիացրել է, որ Պեկինն ամեն ինչ կանի Ուկրաինայում պատերազմի դադարեցման համար:
Զելենսկին, իր հերթին, Twitter-ում գրել է, որ երկար և բովանդակալից զրույց է անցկացրել Սիի հետ: Նախագահները քննարկել են նաև մի շարք երկկողմ հարցեր:
«Երկար և բովանդակալից զրույց եմ անցկացրել Չինաստանի ղեկավար Սի Ծինպինի հետ: Հուսով եմ, որ այս զրույցը և Ուկրաինայում Չինաստանի դեսպանի նշանակումը մեր երկկողմ հարաբերությունները զարգացնելու հզոր խթան կդառնան», - գրել է Զելենսկին:
Վերջին անգամ երկու ղեկավարները զրուցել էին ռուս - ուկրաինական պատերազմի մեկնարկից առաջ՝ 2022 թվականի հունվարին, դիվանագիտական կապերի հաստատման 30-ամյակի կապակցությամբ:
Չինաստանը միանշանակ չի դատապարտել Ռուսաստանի հարձակումն Ուկրաինայի վրա և նկատել է տվել, թե Արևմուտքը բորբոքում է այդ հակամարտությունը:
Միաժամանակ, Պեկինը չի ճանաչել Մոսկվայի կողմից ուկրաինական տարածքների բռնակցումը և ամենաբարձր մակարդակով մի քանի անգամ ընդգծել է, որ անհրաժեշտ է հարգել երկրների ինքնիշխանությունը և տարածքային ամբողջականությունը:
Մինչ ուկրաինական և ռուսական բանակները պատրաստվում են վճռական ճակատամարտի, Մոսկվան կրկին սպառնում է միջուկային զենքով:
Անվտանգության խորհրդի փոխնախագահ Դմիտրի Մեդվեդևը հայտարարել է, որ Ռուսաստանի հնարավոր հակառակորդները չպետք է այդ հարցում ռուսաստանի հնարավորությունները թերագնահատեն։ «Դուք ասացիք, որ Ռուսաստանը երբեք առաջինը չի օգտագործի միջուկային զենք։ Իմացեք, որ սա այնքան էլ այդպես չէ», - հայտարարել է Մեդվեդևը՝ հավելելով, թե Ռուսաստանը կարող է միջուկային զենք կիրառել, եթե այլ պետությունների ագրեսիան սպառնա իր գոյությանը. - «Եթե ձեր ձեռքերում ինչ-որ զենք կա, իսկ ես որպես նախկին նախագահ գիտեմ, թե դա ինչ է, դուք պետք է պատրաստ լինեք, որ որոշակի իրավիճակում ձեր ձեռքը չի տատանվի այն օգտագործելու համար, որքան էլ հրեշավոր ու դաժան է սա հնչում։ Այս բոլոր գործոնները չպետք է թերագնահատվեն մեր պոտենցիալ հակառակորդների կողմից»։
Իր հերթին, Ռուսաստանի արտգործնախարարության միջուկային զենքի չտարածման բաժնի ղեկավար Վլադիմիր Երմակովը ռուսական պետական ТАСС գործակալությանը հայտնել է, որ Վաշինգտոնի պահվածքը մեծացնում է Ռուսաստանի հետ ուղիղ բախման վտանգը։ Ավելին, նա սպառնացել է, որ Մոսկվան կարող է դուրս գալ Ռազմավարական սպառազինությունների կրճատման պայմանագրից։
Լարված վիճակը Դոնբասում չի խանգարում Կիևին պատրաստվել հակահարձակման, որը պետք է սկսվի արդեն առաջիկա շաբաթներին։ Երեկ այս մասին հայտարարել է Ուկրաինայի հետախուզական վարչության ղեկավար Կիրիլ Բուդանովը՝ շեշտելով, թե հակահարձակումը սկսվելու է մինչև ամառ։ Կոնկրետ ժամկետ պաշտոնյաները չեն հայտնում։
New York Times-ը սակայն, հղում անելով իր աղբյուրներին, գրում է, թե ուկրաինական հակահարձակումը կսկսվի արդեն «հաջորդ ամսվա սկզբին»։ Ըստ հրապարակման, ուկրաինացի զինվորականները Վաշինգտոնի հետ չեն կիսում հակահարձակման իրենց ծրագրերը, սակայն հոդվածի հեղինակները գրում են, թե դա կլինի երկրի հարավում, բռնակցված Ղրիմից ոչ հեռու։
Առանց վճռական հաղթանակի, Արևմուտքի աջակցությունը Ուկրաինային կարող է թուլանալ, և Կիևին կարող են ճնշել բանակցություններ սկսելու հարցում։ Բացի այդ, ռուսական կողմը կարող է վերակազմավորվել ու անցնել նոր հարձակման: Նախօրեին այս մասին հայտարարել է ԱՄՆ Ազգային անվտանգության խորհրդի խոսնակ Ջոն Քիրբին. - «Մենք խորացնում ենք մեր օգնությունը Ուկրաինային համաձյան նրանց պահանջների։ Մենք, օրինակ, գիտենք, որ գարնանը, երբ եղանակն արդեն սկսել է բարելավվել, կարող ենք ակնկալել, որ ռուսներն էլ կցանկանան հարձակման անցնել որոշ տարածքներում։ Մենք հստակ չգիտենք, թե որտեղ և ինչպես դա կանեն»:
Բախմուտում իրավիճակը մնում է չափազանց լարված, քաղաքի արևմտյան թաղամասերը պահող ուկրաինացի զինծառայողները պատմում են, թե ռուսները շատ են ուզում նաև այդ մասը գրավել. - «Նրանք մեծ ջանք են գործադրում, սակայն դեռ չի ստացվում։ Վերջին օրերին նրանք ռմբակոծու են մեր դիրքերն բոլոր զենքերով, S-300-ով»։
Այսօր Ռուսաստանի պաշտպանության նախարարությունը նույնպես հայտնել է, թե մարտերը Բախմուտ քաղաքի արևմտյան թաղամասերում շարունակվում են։ Երեկ Ուկրաինայի զինված ուժերի ցամաքային զորքերի գլխավոր հրամանատար, գեներալ-գնդապետ Ալեքսանդր Սիրսկին հերթական անգամ անձամբ էր այցելել ռազմաճակատի այդ հատվածը, և խոստովանել, որ իրավիճակը «տագնապալի» է, և քաղաքում ընթանում են ամենադժվար մարտերը։
Մյուս կողմից, իսպանական El Mundo-ն, որի թղթակիցները նոր են այցելել Բախմուտ, գրել է, թե Ուկրաինայի զինված ուժերի զինտեխնիկան այժմ Բախմուտից հեռանում է միակ մնացած «կյանքի ճանապարհով»: Սակայն քաղաքում մնում է մոտ 6-7 հազար ուկրաինացի զինվորական։
Պատերազմի ուսումնասիրման ինստիտուտի ամենօրյա զեկույցի համաձայն, ուկրաինացի զինվորականները նաև որոշակի հաջողություններ ունեն և առաջ են շարժվել Լուգանսկի շրջանի Կրեմեննայա քաղաքից հարավ՝ Վերխնեկամենսկոյե գյուղի մոտ։ Զեկույցում միաժամանակ ասվում է, որ Ռուսաստանը չի դադարում Լուգանսկի շրջանի մնացած մասը գրավելու և Դոնեցկի շրջանի հյուսիսային հատվածը շրջափակելու փորձերը, սակայն դրանք անհաջող են։
Առնվազն մեկ մարդ է զոհվել, մի քանիսը վիրավորվել ռուսական ուժերի կողմից Ուկրաինայի արևելքում Կուպյանսկ քաղաքի թանգարանը հրթիռակոծելու հետևանքով։
Խարկովի մարզի ռազմական վարչակազմի ղեկավար Օլեգ Սինեգուբովը «Ազատությանն» ասել է, որ ապրիլի 25-ին ռուսական ուժերը S-300 հրթիռներով ռմբակոծել են Կուպյանսկի կենտրոնը, հրթիռներից մեկն ընկնել է երկրագիտական թանգարանի վրա։