Թուրքիայի արտաքին գործերի նախարար Մևլութ Չավուշօղլուն ասել է, որ Թուրքիան հրաժարվել է Ուկրաինա ուղարկել S-400 (C-400) զենիթահրթիռային համակարգերը:
Նախարարի խոսքով՝ Վաշինգտոնն Անկարային առաջարկել է իր հակահրթիռային պաշտպանության համակարգերն ուղարկել Կիև, սակայն մերժում է ստացել։
«Մեզ նույնիսկ առաջարկել են ուղարկել Ուկրաինա, մենք «ոչ» ենք ասել, նման առաջարկներ եղել են»,- ասել է Թուրքիայի ԱԳՆ ղեկավարը։
Ավելի վաղ Թուրքիայի պաշտպանության նախարար Հուլուսի Աքարը հայտարարել էր, որ Անկարայի կողմից Մոսկվայից S-400 զենիթահրթիռային համակարգերի ձեռքբերման վտանգ չկա։ Աքարը հավելել էր, որ Թուրքիան գնել է S-400 հակաօդային պաշտպանության համակարգը այն բանից հետո, երբ Վաշինգտոնը չի վաճառել Patriot հակաօդային պաշտպանության համակարգը Անկարային։
Չեչնիայի ղեկավար Ռամզան Կադիրովը նամակով դիմել է Ռուսաստանի նախագահ Վլադիմիր Պուտինին՝ խնդրելով Բախմուտում ռուսական «Վագների» դիրքերը հանձնել չեչենական «Ախմատ» գումարտակին: Տեքստը հրապարակվել է նրա Տելեգրամ ալիքում։
Կադիրովը նշում է, որ դիմումն արդեն ուղարկվել է։ Նա Պուտինին խնդրել է հանձնարարել պաշտպանության նախարարին և Ազգային գվարդիայի տնօրենին հրամաններ տալ՝ «Ախմատի»-ի ստորաբաժանումները դուրս բերելու այլ ուղղություններից և դրանք վերատեղակայել Բախմուտում՝ ստանձնելու «Վագների» դիրքերը։
Ռուսական «Վագներ» մասնավոր ռազմական ընկերության հիմնադիր Եվգենի Պրիգոժինը երեկ հայտարարել է, որ իր զինյալները պատրաստ են Բախմուտում զբաղեցրած դիրքերը հանձնել Չեչնիայի ղեկավարի անմիջական ենթակայության տակ գործող «Ախմատ» գումարտակին։
Պրիգոժինը նման առաջարկով պաշտոնական նամակ է ուղարկել Ռուսաստանի նախարար Սերգեյ Շոյգուին։
«Ուկրաինայի զինված ուժերը Բախմուտում ընդամենը երկու քառակուսի կիլոմետր են վերահսկում, և ես վստահ եմ, որ «Ախմատին» կհաջողվի գրավել քաղաքը», - գրել է Պրիգոժինը։
«Վագների» հիմնադիրը նախօրեին հայտարարել էր, որ իր ենթակայության տակ գործող ստորաբաժանումները մայիսի 10-ին լքելու են Բախմուտը՝ «ծանր կորուստների և սպառազինության պակասի պատճառով»։
Ուկրաինայի նախագահ Վլադիմիր Զելենսկին ուրբաթ երեկոյան հեռարձակված ուղերձում հայտարարել է, որ եվրոպական մայրաքաղաքներ կատարած իր վերջին շրջագայության ընթացքում արևմտյան պետությունների հետ սպառազինության մատակարարման շուրջ նոր պայմանավորվածություններ են ձեռք բերվել։
«Ուրախությամբ պետք է տեղեկացնեմ, որ Հելսինկիում և Հաագայում տեղի ունեցած բանակցությունների արդյունքում մեր զինվորների համար սպառազինության լուրջ համալրում ենք ստացել՝ ցամաքում, օդում և ջրում։ Խոսքն իրոք լուրջ համալրման մասին է։ Բացի այդ, մենք կարողացել ենք լուրջ առաջընթացի հասնել ՆԱՏՕ-ի և ԵՄ հետ հարաբերություններում», - մեկնաբանելով իր այցի արդյունքները՝ հայտարարում էր Զելենսկին։
Ուկրաինայի նախագահը Ֆինլանդիա և Նիդերլանդներ էր այցելել մայիսի 3-ին և 4-ին։
Ռուսաստանի Նիժնի Նովգորոդ քաղաքում այսօր պայթեցվել է ազգայնական հայացքներով հայտնի արձակագիր Զախար Պրիլեպինի ավտոմեքենան, հաղորդում է Ռուսաստանի պետական ՏԱՍՍ գործակալությունը՝ տեղեկացնելով, որ պայթյունի հետևանքով Պրիլեպինը վիրավորվել է սակայն, նրա օգնականների պնդմամբ, «գրողի վիճակն այժմ բարվոք է»։
Ռուսական մի շարք տելեգրամ-ալիքների պնդմամբ, հարձակման հետևանքով զոհվել է Պրիլեպինի վարորդը։
48-ամյա Զախար Պրիլեպինը մի շարք լայն ճանաչում ստացած վեպերի հեղինակ է, 2016-ից 2018 թվականներին մասնակցել է Դոնբասում ծավալված ռազմական գործողություններին՝ հանդիսանալով Դոնեցկի ինքնահռչակ հանրապետության զինված կազմավորումներից մեկի հրամանատրի տեղակալ։
Ուկրաինայի թվային տեխնոլոգիաների նախարար Միխայիլ Ֆեդորովը հայտնել է, որ «Դրոնների բանակ» կառավարական ծրագրի շրջանակում արդեն պատրաստվել են ԱԹՍ-ների կառավարման 10 հազար օպերատորներ։
Անձնակազմի ուսուցումը տարվում է 20 մասնագիտացված դպրոցներում։
Տարբեր երկրներից «Դրոնների բանակ» ծրագրին փոխանցվել է շուրջ 325 միլիոն դոլար։
«Վագներ» մասնավոր ռազմական ընկերության հիմնադիր Եվգենի Պրիգոժինը հայտարարել է, որ մայիսի 10-ին «Վագները» կհեռանա Բախմուտից՝ դիրքերը հանձնելով Ռուսաստանի պաշտպանության նախարարության ստորաբաժանումներին։
Բախմուտից հեռանում են, որովհետև բավարար զինամթերք չեն ստանում, իսկ մինչև մայիսի 10-ը մնալու որոշում են ընդունել, որպեզի չփչացնեն մայիսի 9-ի հաղթանակի օրը։
Երեկ երեկոյան հրապարակված տեսանյութում Եվգենի Պրիգոժինը, ցուցադրելով «Վագների» տասնյակ սպանված գրոհայինների մարմինները, նրանց մահվան համար մեղադրել է Ռուսաստանի պաշտպանության նախարար Սերգեյ Շոյգուին և Գլխավոր շտաբի պետ Վալերի Գերասիմովին։
Նա պնդել է, որ «Վագներին» անհրաժեշտ զինամթերքի անբավարարությունը 70 տոկոս է կազմում, և եթե գոնե իրենց «նորման» ստանային, ապա զոհերը հինգ անգամ քիչ կլինեին։
«Նրանք կամավոր այստեղ են եկել և մահանում են, որպեսզի դուք ճարպակալեք կարմիր փայտից պատրաստված ձեր կաբինետներում»,- ասել է Պրիգոժինն՝ օգտագործելով նաև վիրավորական բառեր։
Միացյալ Նահանգների ազգային անվտանգության խորհրդի ռազմավարական հաղորդակցությունների համակարգող Ջոն Քիրբին ասել է, թե Վաշինգտոնը գնահատականներ չի տալիս Կրեմլի վրա անօդաչուների գրոհի միջադեպի վերաբերյալ։
«Մենք դեռ չգիտենք, թե ինչ է պատահել և գնահատական չենք տալիս։ Ես առավոտյան տեսել եմ [Ռուսաստանի նախագահ Վլադիմիր Պուտինի խոսնակ Դմիտրի] Պեսկովի մեկնաբանությունը, թե մենք, իբր, ինչ-որ առնչություն ունենք դրան։ Կարող եմ հավատացնել, որ Միացյալ Նահանգները որևէ առնչություն չունի, ինչ էլ որ տեղի է ունեցել՝ ԱՄՆ-ը դրան չի մասնակցել», - հայտարարել է Քիրբին։
Նրա փոխանցմամբ, Ամերիկան այդօրինակ բաներ չի անում և կապ չունեն միջադեպի հետ։
Մայիսի 9-ի Հաղթանակի զորահանդեսը տեղի կունենա առանց կրճատումների, հայտնել է Կրեմլի խոսնակ Դմիտրի Պեսկովը։
Նրա փոխանցմամբ, զորահանդեսի ընթացքում ելույթ կունենա երկրի ղեկավարը։ Խոսնակն այդպես պատասխանել է լրագրողների այն հարցին, թե արդյո՞ք անօդաչուներով Կրեմլը հարվածների ենթարկելու վերջին միջադեպը կարող է զորահանդեսի ծրագրի փոփոխություններ ենթադրել։
«Ո՛չ, նախապատրաստվում է սովորական զորահանդես, այլ բան չունեմ ասելու։ Ինչպես և ընդունված է, նախագահը ելույթ կունենա»,- ասել է Պեսկովը:
Այսօր, մեկնաբանելով Կրեմլի վրա անօդաչուների գրոհը, Պեսկովն ասել է, թե Մոսկվան գիտի, որ հարվածներ հասցնելու միջոցները և թիրախները թելադրում է Վաշինգտոնը։
«Մենք լավ գիտենք, որ այսօրինակ ահաբեկչական գործողությունների մասին որոշումներն ընդունվում են ոչ թե Կիևում, այլ Վաշինգտոնում։ Կիևը պարզապես կատարում է այն, ինչ հրամայում են», - ասել է Պեսկովը։
Ռուսաստանը երբ հարմար կգտնի՝ այն ժամանակ էլ կպատասխանի անօդաչու թռչող սարքերով Կրեմլը թիրախավորելու Ուկրաինայի ահաբեկչական գործողությանը, նախօրեին հայտարարել է ԱՄՆ-ում ՌԴ դեսպան Անատոլի Անտոնովը:
«Ինչպե՞ս կարձագանքեին ամերիկացիները, եթե ինչ-որ անօդաչու թռչող սարքով հարվածի ենթարկվեին Սպիտակ տունը, Կապիտոլիումը կամ Պենտագոնը: Պատասխանն ակնհայտ է թե՛ քաղաքական գործչի և թե՛ շարքային քաղաքացու համար՝ պատիժը կլինի կոշտ և անխուսափելի։ Ռուսաստանն էլ կպատասխանի, երբ նպատակահարմար կգտնի։ Կպատասխանի՝ ելնելով այն սպառնալիքներից, որոնք Կիևը ստեղծել է մեր երկրի ղեկավարության համար», - ասել է Անտոնովը։
Պաշտոնական Կիևը հայտարարել է, որ չունի որևէ առնչություն անօդաչուներով Կրեմլի վրա կատարված հարձակման հետ։
Ուկրաինային վերագրվող այդ գրոհը տեղի է ունեցել երեքշաբթի լույս չորեքշաբթի գիշերը, տուժածներ և ավերածություններ չկան։
Ուկրաինայի նապագահ Վլադիմիր Զելենսկին այսօր Հաագայում կհանդիպի Միջազգային քրեական դատարանի ղեկավարության հետ։ Այդ մասին France-Presse լրատվական գործակալությանը հայտնել է նախագահի մամլո քարտուղար Սերգեյ Նիկիֆորովը։
«Մենք Հաագայում ենք, մտադիր ենք հանդիպել Միջազգային քրեական դատարանի ղեկավարների հետ», - ասել է խոսնակը։
Զելենսկին երեկ երեկոյան է ժամանել Հաագա: Այսօր նախատեսված է նրա հանդիպումը վարչապետ Մարկ Ռյուտեի, արտաքին գործերի նախարար Վոլե Խուկստրայի և պաշտպանության նախարար Կայսա Օլոնգրենի հետ։