Մատչելիության հղումներ

Պատերազմ Ուկրաինայում (լայվ բլոգ, թարմացվող)

2022 թվականի փետրվարի 24-ի վաղ առավոտյան սկսվել է Ռուսաստանի հարձակումը Ուկրաինայի վրա, հրթիռներ են արձակվել ուկրաինական առնվազն 25 քաղաքների օդանավակայանների և ռազմական ենթակառուցվածքների վրա։ Հարձակումը հետևել է Ուկրաինան «ապառազմականացնելու» «հատուկ գործողության» մասին ՌԴ նախագահ Վլադիմիր Պուտինի հայտարարությանը։

Պուտինը ստորագրել է օրենք, որով սեպտեմբերի 30-ը սահմանվում է «Ռուսաստանի հետ նոր շրջանների վերամիավորման օր»:

Վլադիմիր Զելենսկին հայտնել է, որ ամերիկյան Abrams տանկերը հասել են Ուկրաինա։

Ուկրաինական կողմի հարվածների հետևանքով Դոնեցում մեկ մարդ է զոհվել, հայտնում են տեղի իշխանությունները:

Օդեսան կրկին ենթարկվել է օդային զանգվածային հարձակման:

Ուկրաինական կողմը պնդում է, որ ծանր վիրավորվել են Զապորոժիեի՝ ռուսական զորքերի հրամանատարն ու շտաբի ղեկավարը։

Ուկրաինացիները հարվածել են Ռուսաստանի Սևծովյան նավատորմի կենտրոնակայանին:

Ռուսաստանը և Բելառուսը ստեղծում են անվտանգության համատեղ հայեցակարգ:

16:15 9.5.2023

Կիև է ժամանել Եվրահանձնաժողովի նախագահ Ուրսուլա ֆոն դեր Լայենը:

Այցի նախաշեմին՝ անցած գիշեր, ռուսական ուժերը կրկին թիրախավորել են Ուկրաինայի մայրաքաղաքը, ըստ պաշտոնական աղբյուրների՝ Կիևի վրա արձակված բոլոր հրթիռները խոցվել են:

Ուկրաինայի նախագահ Վլադիմիր Զելենսկին նախօրեին Գերագույն Ռադա է ներկայացրել օրինագիծ, որով մայիսի 8-ը պաշտոնապես հայտարարվում է Հիշատակի և նացիզմի դեմ հաղթանակի օր, իսկ մայիսի 9-ը, երբ Ռուսաստանը նշում է Հաղթանակի օրը, ուկրաինացիների համար կդառնա Եվրոպայի օր։

Ուկրաինա Ռուսաստանի ռազմական ներխուժումից ի վեր Եվրահանձնաժողովի նախագահն արդեն հինգերորդ անգամ է այցելում այդ երկիր: Ֆոն դեր Լայենի խոսնակի փոխանցմամբ՝ Եվրամիության գործադիր իշխանության ղեկավարն այցի ընթացքում «վերահաստատելու է Եվրամիության անսասան աջակցությունն Ուկրաինային»:


16:13 9.5.2023

Մոսկվայի Կարմիր հրապարակում այսօր ռազմական շքերթ է անցկացվել ֆաշիստական Գերմանիայի դեմ հաղթանակի 78-րդ տարեդարձի կապակցությամբ։

Միջոցառմանը ներկա էին ԱՊՀ 7 երկրների ղեկավարներ՝ Հայաստանի վարչապետը, Բելառուսի, Ղազախստանի, Ղրղըզստանի, Տաջիկստանի, Ուզբեկստանի, Թուրքմենստանի նախագահները։

Միջոցառմանը ելույթ է ունեցել ՌԴ նախագահ Վլադիմիր Պուտինը՝ հայտարարելով, որ Ռուսաստանի դեմ պատերազմ է «սանձազերծվել», դրա համար մեղադրելով «արևմտյան գլոբալիստական էլիտաներին», նրանց համեմատել նացիստների հետ։

Պուտինի համոզմամբ՝ Արևմուտքի նպատակը Ռուսաստանի «քայքայումն ու կործանումն» է։

Մոսկովյան ռազմական շքերթը տևել է ընդամենը 45 րոպե՝ ներառյալ զորքի քայլերթը և Պուտինի ելույթը, մինչդեռ անցած տարիներին այս միջոցառման տևողությունը հասնում էր մեկուկես ժամի:

16:11 9.5.2023

Այս գիշեր Կիևի վրա ռուսական զորքերի կողմից արձակված բոլոր հրթիռները խոցվել են, հայտնել է քաղաքային ռազմական վարչակազմի ղեկավար Սերգեյ Պոպկոն։

Նրա տվյալներով՝ գիշերային հարձակումն իրականացվել է Կասպից ծովի տարածքից Տու-95ՄՍ չորս ռազմավարական ռմբակոծիչներից: Ուկրաինայի մայրաքաղաքի ուղղությամբ արձակված X-101 հրթիռները չեն հասել իրենց թիրախներին:

Ըստ նույն աղբյուրի՝ մայիսի սկզբից ի վեր սա արդեն հինգերորդ օդային հարձակումն էր Կիևի վրա։

Այսօր առավոտյան Կիևում, ինչպես նաև Ուկրաինայի տարածքի մեծ մասում՝ բացառությամբ արևմտյան մի քանի շրջանների, օդային տագնապ է հայտարարվել ռուսական հրթիռակոծության վտանգի պատճառով։

16:10 9.5.2023

Այսօր Միացյալ Նահանգները կհայտարարի Ուկրաինային անվտանգության ոլորտում 1,2 միլիարդ դոլարի երկարաժամկետ օգնություն տրամադրելու մասին, հաղորդում են ամերիկյան լրատվամիջոցները՝ վկայակոչելով հարցին ծանոթ պաշտոնյաների:

Ինչպես հայտնում է CNN-ը, փաթեթը ներառում է անօդաչու թռչող սարքեր, հրետանային արկեր և հրթիռներ հակաօդային պաշտպանության համակարգերի համար, ինչպես նաև այլ զինատեսակներ։

Աջակցությունը Ուկրաինային անվտանգության օգնության նախաձեռնության (USAI) մաս կկազմի: Զենքը ձեռք է բերվելու անմիջապես արտադրողներից, այլ ոչ թե Պենտագոնի պահեստներից:

Հաշվի առնելով նաև այս փաթեթը, ԱՄՆ-ը, ըստ ամերիկացի պաշտոնյաների, Ուկրաինային ռուսական լայնածավալ ներխուժման սկզբից ի վեր արդեն տրամադրել է գրեթե 37 միլիարդ դոլարի ռազմական օգնություն:

18:32 8.5.2023

Նացիզմի դեմ հաղթանակի օրվա նախորդ գիշերը Ուկրաինայի մայրաքաղաքը ռուսական ուժերի կողմից ենթարկվել է անօդաչու թռչող սարքերի զանգվածային հարձակման, որի հետևանքով առնվազն 5 մարդ է վիրավորվել։

Կիևի քաղաքապետ Վիտալի Կլիչկոն ասել է, որ իրանական արտադրության 60 կամիկաձե դրոններ են արձակվել ուկրաինական թիրախների ուղղությամբ, այդ թվում՝ 36-ը՝ Կիևի վրա։ Դրոնները ոչնչացվել են, սակայն բեկորներն ընկել են շենքերի ու տների վրա։

«Հիմա մենք գտնվում ենք շենքի բնակարաններից մեկում։ Այսօր ամենազանգվածային գրոհներից մեկն էր մեր հայրենի քաղաքի վրա։ Մեր հայրենի քաղաքի ուղղությամբ իրանական 36 կամիկաձե դրոններ են արձակվել, և շնորհիվ հակահրթիռային համակարգերի դրանք բոլորը ոչնչացվել են։ Հինգ մարդ է տուժել, երկուսը հիմա գտնվում են հիվանդանոցում։ Բայց ոչ մեկը չի զոհվել, ինչը շատ կարևոր է»,- նշել է Կիևի քաղաքապետը։

18:30 8.5.2023

«Վագներ» մասնավոր ռազմականացված խմբավորման ղեկավար Եվգենի Պրիգոժինն այսօր ասել է, թե իր զինյալները Բախմուտում առաջ են շարժվել։

«Այսօր «Վագների» ստորաբաժանումների առաջխաղացումը տարբեր ուղղություններով կազմել է մինչև 280 մետր։ Շարժվում ենք առաջ՝ սպասելով զինամթերքի մատակարարմանը», - ասել է նա՝ հրապարակված տեսանյութում։

Անցած շաբաթավերջին Պրիգոժինը հայտարարել էր, որ մայիսի 10-ին «Վագները» հեռանալու է Բախմուտից, քանի որ անհրաժեշտ քանակի զինամթերք չեն ստանում, որի համար նա մեղադրել էր Ռուսաստանի ՊՆ նախարարին և ԳՇ պետին։

16:15 8.5.2023

Ուկրաինայի նախագահ Վլադիմիր Զելենսկին առաջարկել է Հաղթանակի օրվա տոնը մայիսի 9-ի փոխարեն նշել մայիսի 8-ին և համապատասխան օրինագիծ է ներկայացրել Գերագույն ռադա։

Եվրոպական երկրները Հաղթանակի օրը նշում են մայիսի 8-ին։

«Այժմ, ինչպես 80 տարի առաջ, Ուկրաինան կռվում է տոտալ չարիքի դեմ։ Ուկրաինան պայքարում է ամբողջ ազատ աշխարհի ապագայի համար», - ասել է Զելենսկին Հաղթանակի օրվա ուղերձում։

Նա հայտարարել է, որ Երկրորդ համաշխարհային պատերազմում նացիզմի դեմ հաղթանակում ուկրաինական ժողովրդի ներդրումը չի մոռացվի, և ասել է, թե Ուկրաինան թույլ չի տա յուրացնել հակահիտլերյան կոալիցիայի ժողովուրդների ընդհանուր հաղթանակը։

16:14 8.5.2023

Եվրամիությունը նախատեսում է առաջին անգամ պատժամիջոցներ կիրառել չինական ընկերությունների նկատմամբ, որոնց մեղադրում է ռուսական ռազմական մեքենային աջակցելու համար սարքավորումներ վաճառելու մեջ, հաղորդում է The Financial Times-ը։

Ըստ պարբերականի՝ չինական 7 ընկերություններ գտնվում են պատժամիջոցների նոր փաթեթում, որը ԵՄ անդամ երկրները կքննարկեն այս շաբաթ:

Ռուսաստանի Ուկրաինա ներխուժումից հետո ԵՄ-ը պատժամիջոցների 10 փաթեթ է ընդունել ռուս անհատների և կազմակերպությունների դեմ, որոնք տնտեսական դժվարություններ են առաջացրել՝ բարդացնելով պատերազմի ֆինանսավորումը:

16:12 8.5.2023

Առնվազն 5 մարդ է վիրավորվել այս գիշեր Ուկրաինայի մայրաքաղաքի վրա անօդաչու թռչող սարքի միջոցով հարձակման հետևանքով, հայտնում են տեղական իշխանությունները:

Կիևի քաղաքապետ Վիտալի Կլիչկոյի փոխանցմամբ՝ անօդաչուի բեկորներն ընկել են երկհարկանի շենքի վրա։

Գիշերը հարվածներ են հասցվել նաև Օդեսայի շրջանին։ X-22 հրթիռները խոցել են սննդի ձեռնարկություններից մեկի պահեստը և Սև ծովի ափին գտնվող հանգստի գոտին, տուժածներ չկան, հայտնում է «Հարավ» միացյալ հրամանատարությունը։

18:17 7.5.2023

Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսսին հայտարարել է, որ իրավիճակը Զապորոժիեի ատոմակայանի տարածքում գնալով ավելի անկանխատեսելի և «պոտենցիալ վտանգավոր» է դառնում։ Նրա խոսքերը մեջբերում է կառույցի մամուլի ծառայությունը։

«Ես չափազանց անհանգստացած եմ միջուկային անվտանգության իրական սպառնալիքներով, որոնց բախվում է կայանը», - ասել է Գրոսսին:

Նա պնդում է, որ անհրաժեշտ է «գործել հիմա», որպեսզի կանխվի վտանգավոր միջուկային վթարի վտանգը։

Հայտարարության մեջ նշվում է, որ ԱԷՄԳ-ի փորձագետները շարունակում են պարբերաբար լսել Զապորոժիեի շրջանում հրետակոծությունների մասին։

Բեռնել ավելին

XS
SM
MD
LG