Ռուսաստանի պաշտպանության նախարար Սերգեյ Շոյգուն այսօր այցելել է պայմանագրային զինծառայողների ուսումնական կենտրոն, որը գտնվում է Ռուսաստանի արևմտյան զինտարածքում:
Ռուսաստանի Ցամաքային զորքերի գլխավոր հրամանատար Օլեգ Սալյուկովը նախարարին զեկուցել է սպաների հսկողությամբ հրաձգարաններում անցկացվող դասընթացների մասին:
Նա ասել է, որ ուսումնական գործընթացը վարող բոլոր սպաներն ունեն մարտական փորձ, քանի որ մասնակցել են «հատուկ ռազմական օպերացիային»:
Պայմանագրային զինծառայողները մարտական պատրաստություն են անցնում, հրաձգային վարժանքներից և տակտիկական դասընթացներից զատ, նրանք նաև սովորում են ցույց տալ առաջին օգնությունը և աշխատել ռադիոկապի միջոցներով:
Դասընթացներում հաշվի է առնվում այն, որ հակառակորդը կիրառում է արևմտյան արտադրության զինատեսակներ:
Դասընթացներից հետո պայմանագրային զինծառայողներին ուղարկում են մշտական տեղակայման վայրեր՝ ուսումնական փուլը համապատասխան ստորաբաժանումներում և զորամասերում շարունակելու համար:
ԱՄՆ Կոնգրեսի Ներկայացուցիչների տան մի խումբ անդամներ նախագահ Ջո Բայդենին հասցեագրված նամակում կոչ են արել անհապաղ չեղարկել Ուկրաինային F-16 տեսակի կործանիչներ տրամադրելու արգելքը: Այդ մասին այսօր հայտնել է Նյու Յորքում լույս տեսնող The New York Times օրաթերթը:
«Հաշվի առնելով Ուկրաինային հրասայլեր փոխանցելու հարցում նախնական փուլում մեր դաշնակիցների ցուցաբերած անվճռականությունը, մենք գտնում ենք, որ լրացուցիչ ռեսուրսներ և հնարավորություններ Կիևին տալու գործում ԱՄՆ-ի առաջնորդությունը չափազանց կարևոր է: F-16 տեսակի մարտական օդանավերի տրամադրումն անհրաժեշտ է այս պատերազմն արդար պայմաններով ավարտելու համար»,- ասվում է նամակում:
Ըստ The New York Times-ի, նամակը ստորագրել են 14 կոնգրեսականներ՝ թե՛ դեմոկրատական և թե՛ հանրապետական: Խմբի աշխատանքը համակարգում է Մեն նահանգից ընտրված դեմոկրատական կոնգրեսական Ջարեդ Գոլդենը:
Երեկ՝ մայիսի 17-ին, ԱՄՆ նախագահի ազգային անվտանգության հարցերով խորհրդական Ջեյք Սալիվանն ասել է, որ կործանիչների հարցում Սպիտակ տան դիրքորոշումն անփոփոխ է՝ դրանք Ուկրաինային չեն փոխանցվի:
Երեկ The New York Times-ը հաղորդել է, որ ամերիկացիները չեն թույլատրում ուկրաինացի օդաչուներին մարտական պատրաստություն անցնել եվրոպական դաշնակիցների F-16 օդանավերով:
Մայիսի 9-ին Նիդերլանդների վարչապետ Մարկ Ռյուտեն ասել է, թե իր երկիրը Մեծ Բրիտանիայի, Դանիայի, եվրոպական մի շարք այլ պետությունների և ԱՄՆ-ի հետ քննարկում է Ուկրաինային F-16-ներ փոխանցելու հարցը:
«Դրա շուրջ ակտիվ բանակցություններ են»,- ասել է Նիդերլանդների կառավարության ղեկավարը:
Ուկրաինայի կառավարությունում ընդունում են, որ F-16 տեսակի կործանիչների խնդիրը ձգձգվում է և արագ չի լուծվի:
Մինչդեռ, Մեծ Բրիտանիայի վարչապետ Ռիշի Սունակի գրասենյակը հայտնել է, որ Լոնդոնը մտադիր է ուկրաինացի ռազմական օդաչուների համար բացել ուսումնական կենտրոն, որտեղ նրանք կսովորեն վարել արևմտյան մարտական ինքնաթիռներ:
Բելառուսը պատրաստ է պայմաններ ապահովել Ռուսաստանի և Ուկրաինայի բանակցությունների համար: Այդ մասին մամուլին տեղեկացրել է Բելառուսի Անվտանգության խորհրդի պետական քարտուղար Ալեքսանդր Վոլֆովիչը:
«Մինսկի հարթակը բաց է բոլոր սուր հարցերը քննարկելու համար: Եվրոպայի մայրցամաքում ամենագլխավոր խնդիրն Ուկրաինայի տարածքում այս պատերազմի դադարեցումն է», - ասել է Վոլֆովիչը:
Նա լրագրողներին հիշեցրել է, որ նախագահ Ալեքսանդր Լուկաշենկոն մշտապես է կոչ անում բանակցել:
«Նախագահն ասել է՝ Մինսկը բաց է, կգտնենք որոշման ուղիներ, փոխզիջումներ, դադարեցնենք այս արյունահեղությունը, որը ոչ մեկին պետք չէ: Կքննարկենք նաև այլ հարցեր: Գոնե դրանից է պետք սկսել», - հայտարարել է Վոլֆովիչը:
Եվրոպական միության արտաքին հարաբերությունների և անվտանգության հարցերով բարձր ներկայացուցիչ Ժոզեպ Բորելն առաջարկում է Խաղաղության եվրոպական հիմնադրամի միջոցներն ավելացնել ևս 3.5 միլիարդ եվրոյով:
Այդ հիմնադրամից է գումար փոխանցվում Ուկրաինային ռազմական օգնություն տրամադրելու համար: Բորելը խնդրել է լրացուցիչ գումար տրամադրել, քանի որ, նրա խոսքով, հիմնադրամի հաշվին եղած միջոցներն արդեն սպառման եզրին են:
Խաղաղության եվրոպական հիմնադրամն արտաբյուջետային կառույց է, որի հաշվին հիմա կա մոտ 8 միլիարդ եվրո:
Ուկրաինային ռազմական օգնություն փոխանցող եվրոպական պետությունները հենց այդ հիմնադրամից են հատուցում ստանում:
Այսօրվա դրությամբ հիմնադրամից վճարվել է մոտ 4 միլիարդ 600 եվրո Ուկրաինային ռազմական օգնություն տրամադրելու նպատակով:
Ռուսաստանի խորհրդարանի ստորին պալատում՝ Պետական դումայում, շրջանառության մեջ է դրվել օրինագիծ, որի նպատակն է լրացուցիչ միջոցներ հավաքել Ուկրաինայում «հատուկ ռազմական օպերացիան» ֆինանսավորելու համար:
Օրինագծի հեղինակները՝ կոմունիստական կուսակցությունից Պետական դումա ընտրված պատգամավորներ Միխայիլ Մատվեևը և Վյաչեսլավ Մարխաևն, առաջարկում են բոլոր ռեստորանների, սրճարանների և ակումբների չափահաս այցելուների ծախսած գումարի 1 տոկոսը գանձել հօգուտ պետության:
Այդ դրամական միջոցները պետական բյուջեից հետագայում կփոխանցվեն «հատուկ ռազմական օպերացիայի» մասնակիցներին սատարելու համար ստեղծված «Հայրենիքի պաշտպաններ» հիմնադրամի հաշվին:
Օրինագծին կից բացատրական նամակում պատգամավորները գրել են, որ այդ գումարով հնարավոր կլինի օգնել «հատուկ ռազմական օպերացիայի» մասնակիցներին և նրանց ընտանիքների անդամներին:
Պատգամավոր Մատվեևը դեռ մայիսի 12-ին է հայտարարել, որ անհրաժեշտ է սահմանել նոր գանձում, որը նա անվանել է «զվարճանքի հարկ»:
Նրա խոսքով, այդ նախաձեռնության հեղինակը ռուսական ռեստորաններից մեկի սեփականատերն է, որի անունը չի հայտնել: Սեփականատերը կարծիք է հայտնել, որ ռեստորաններում, սրճարաններում և ակումբներում «հաշիվը փակող անձի համար լրացուցիչ 1 տոկոսի վճարումը բարդ խնդիր չի լինի»:
«Հայրենիքի պաշտպանների» հիմնադրամը ստեղծվել է ապրիլի սկզբին նախագահ Վլադիմիր Պուտինի նախաձեռնությամբ:
Բռնակցված Ղրիմի Սիմֆերոպոլի մարզում հացահատիկով բեռնված վագոնները դուրս են եկել ռելսերից: Այս մասին նախ հայտնել էին Տելեգրամ ալիքները, ապա տեղեկությունը հաստատեց Ղրիմի՝ Ռուսաստանի կողմից նշանակված ղեկավար Սերգեյ Ակսյոնովը։
Նրա խոսքով՝ տուժածներ չկան: «Սիմֆերոպոլ-Սևաստոպոլ հատվածում էլեկտրագնացքների շարժումը դադարեցված է, ուղևորները կտեղափոխվեն ավտոբուսներով», - գրել է նա։
Ակսյոնովը ոչինչ չի ասել պայթյունի վերաբերյալ, ինչի մասին հայտնել են Baza, 112 և Mash Տելեգրամ ալիքները։ Դրանց փոխանցմամբ՝ միջադեպի հետևանքով հացահատիկով հինգ վագոն դուրս է եկել ռելսերից։ SHOT իշխանամետ հեռագրային ալիքը գրում է, որ Ղրիմում փնտրում են երկաթուղում դիվերսիա կատարելու մեջ կասկածվողի։
«Մենք Ռուսաստանի հետ ենք» շարժման նախագահ Վլադիմիր Ռոգովն ավելի ուշ գրել է, որ Չիստենկոյե գյուղի մոտ երկաթուղային գծերի տակ պայթուցիկ սարք է տեղադրվել, և պայթյունի հետևանքով վնասվել է ռելսերի 50 մետրը։
Ղրիմի երկաթուղին հայտարարել է, որ վագոնները գծերից դուրս են եկել «երկաթուղային տրանսպորտի աշխատանքին կողմնակի անձանց միջամտության պատճառով»։
Այս գիշեր ռուսական զորքերը հարձակվել են Ուկրաինայի տարածքի վրա 30 թևավոր հրթիռներով՝ ծովից, օդից և ցամաքից, ուկրաինական հակաօդային պաշտպանությունը խոցել է բոլորը՝ բացառությամբ մեկի, հաղորդում է Ուկրաինայի ռազմաօդային ուժերի մամուլի ծառայությունը։
Ռուսաստանը հրթիռներ է արձակել Կիևի, Օդեսայի և այլ քաղաքների ուղղությամբ։ Երեկոյան Օդեսայում տեղի ունեցած հարձակման հետևանքով մեկ մարդ զոհվել է, երկուսը վիրավորվել են:
Կիևում գիշերը հակաօդային պաշտպանության համակարգերը, ըստ նախնական տեղեկությունների, խոցել են բոլոր օդային թիրախները, որոնք ներգրավված են եղել զանգվածային հարվածի մեջ, պնդում է քաղաքային ռազմական վարչությունը։ Սա 9-րդ զանգվածային հրթիռային հարձակումն է այս ամսվա սկզբից։
Լրատվամիջոցները հաղորդում են նաև Վիննիցայի, Խմելնիցկիի և Խարկովի մարզերում պայթյունների մասին։
Ռուսաստանի խորհրդարանի ստորին պալատում՝ Պետական դումայում, շրջանառության մեջ է դրվել օրինագիծ, որի նպատակն է լրացուցիչ միջոցներ հավաքել Ուկրաինայում «հատուկ ռազմական օպերացիան» ֆինանսավորելու համար:
Օրինագծի հեղինակները՝ կոմունիստական կուսակցությունից Պետական դումա ընտրված պատգամավորներ Միխայիլ Մատվեևը և Վյաչեսլավ Մարխաևն, առաջարկում են բոլոր ռեստորանների, սրճարանների և ակումբների չափահաս այցելուների ծախսած գումարի 1 տոկոսը գանձել հօգուտ պետության:
Այդ դրամական միջոցները պետական բյուջեից հետագայում կփոխանցվեն «հատուկ ռազմական օպերացիայի» մասնակիցներին սատարելու համար ստեղծված «Հայրենիքի պաշտպաններ» հիմնադրամի հաշվին:
Օրինագծին կից բացատրական նամակում պատգամավորները գրել են, որ այդ գումարով հնարավոր կլինի օգնել «հատուկ ռազմական օպերացիայի» մասնակիցներին և նրանց ընտանիքների անդամներին:
Պատգամավոր Մատվեևը դեռ մայիսի 12-ին է հայտարարել, որ անհրաժեշտ է սահմանել նոր գանձում, որը նա անվանել է «զվարճանքի հարկ»:
Նրա խոսքով, այդ նախաձեռնության հեղինակը ռուսական ռեստորաններից մեկի սեփականատերն է, որի անունը չի հայտնել: Սեփականատերը կարծիք է հայտնել, որ ռեստորաններում, սրճարաններում և ակումբներում «հաշիվը փակող անձի համար լրացուցիչ 1 տոկոսի վճարումը բարդ խնդիր չի լինի»:
Ուկրաինայի բանակային հետախուզության ղեկավար Կիրիլ Բուդանովը հայտարարել է, որ պատերազմի ավարտի հիմնական պայմաններից մեկը Ռուսաստանի և Ուկրաինայի միջև ապառազմականացված գոտու ստեղծումն է՝ առնվազն 100 կիլոմետր լայնությամբ։
«Սա է մեր նպատակը», - ասել է Բուդանովը «Իսլանդիա» ուկրաինական հեռուստաալիքին տված հարցազրույցում՝ նկատի ունենալով, որ անվտանգության գոտին պետք է ստեղծվի Ռուսաստանի տարածքում։
«Հարյուր կիլոմետրանոց հեռավորությունը օպտիմալ է, քանի որ այդ դեպքում սովորական միջոցներով հնարավոր չի լինի արդյունավետ հարվածներ հասցնել Ուկրաինային», - ասել է ուկրաինացի պաշտոնյան։
Իսլանդիայում գումարված Եվրոպայի խորհրդի գագաթնաժողովում վեց երկրներ՝ Հայաստանը, Ադրբեջանը, Բոսնիա-Հերցեգովինան, Հունգարիան, Սերբիան և Թուրքիան, հրաժարվել են ստորագրել Ռուսաստանի կողմից ռազմական հարձակման ենթարկված Ուկրաինայի վնասների գրանցամատյան ստեղծելու հռչակագիրը:
Այդ մասին մայիսի 17-ին հայտնել է Ուկրաինայի արդարադատության փոխնախարար Իրինա Մուդրայան:
Փաստաթուղթը ստորագրած տասնյակ պետությունների թվում են Լատվիան, Լիտվան, Մոլդովան և Էստոնիան:
Գրանցամատյանը (ռեեստրը) տեղակայվելու է Հաագայում: Նիդերլանդների արտաքին գործերի նախարար Վոպկե Հոկստրան հայտնել է, որ գրանցամատյանի աշխատանքը սերտորեն համակարգվելու է Ուկրաինայի հետ:
«Ռեեստրը կընդունի, կմշակի և կպահի {Ուկրաինայի կրած} վնասների մասին դիմումները», - ասել է Հոկստրան։
Նրա խոսքով, այդ մեխանիզմին միացել է 43 պետություն: Ենթադրվում է, որ այն ամբողջ ծավալով կսկսի աշխատել 2024 թվականին: