Հունգարիայի վարչապետ Վիկտոր Օրբանի համոզմամբ՝ Ուկրաինային չի հաջողվի ռազմական ճանապարհով առավելության հասնել Ռուսաստանի նկատմամբ։
АP գործակալության փոխանցմամբ՝ Օրբանն այս մասին հայտարարել է Քաթարում ընթացող միջազգային տնտեսական համաժողովի ընթացքում։ «Ակնհայտ է, որ այս խնդիրը ռազմական լուծում չունի։ Հարկավոր է առերեսվել իրականությանը՝ ՆԱՏՕ-ն չի պատրաստվում զորք ուղարկել [Ուկրաինա], և խեղճ ուկրաինացիները ռազմի դաշտում հաղթելու հնարավորություն չունեն», - ասել է Օրբանը՝ պնդելով, որ ռազմական գործողությունները հնարավոր կլինի դադարեցնել այն ժամանակ, երբ Ռուսաստանն ու Միացյալ Նահանգները կարողանան ընդհանուր հայտարարի գալ։
«Այս պատերազմը կանգ չի առնի, քանի դեռ ռուսները համաձայնության չեն եկել Միացյալ Նահանգների հետ», - համոզված է Հունգարիայի վարչապետը։
Ռուսաստանի Բելգորոդի մարզի առնվազն 9 բնակավայրեր տարհանվել են նախօրեին այստեղ սկիզբ առած մարտական գործողությունների պատճառով։
Բելգորոդի նահանգապետ Վյաչեսլավ Գլադկովի խոսքով՝ ավելի քան 24 ժամ շարունակվող բախումների հետևանքով առնվազն 12 խաղաղ բնակիչ վիրավորվել է, մեկ մարդ մահացել է տարհանման ընթացքում։ 82-ամյա կնոջ մահվան հանգամանքներն առայժմ չեն հստակեցվում։
Ռուսական կողմը հայտարարում է, որ երեկ առավոտյան Բելգորոդի մարզ են ներխուժել Ուկրաինայի զինված ուժերի դիվերսիոն խմբերը։ Պաշտոնական Կիևը պնդում է, որ Բելգորոդի գործողությունն իրականացնում են ռուսաստանցի տարագիրներից կազմված «Ռուսական կամավորական կորպուսի» և «Ռուսաստանի ազատություն» լեգեոնի մարտիկները։
Ուկրաինայի նախագահ Վլադիմիր Զելենսկին այսօր ժամանել է Դոնեցկի մարզում գտնվող մարտական դիրքեր։
«Ինտերֆաքս-Ուկրաինա» գործակալության փոխանցմամբ՝ Զելենսկին ժամանել է Դոնեցկի մարզի Ուգլեդար և Մարյինկա բնակավայրերի մերձակայքում գտնվող պաշտպանական դիրքեր։ Այցի պաշտոնական առիթն այսօր Ուկրաինայում նշվող Ծովային հետևակայինի օրն է։
«Պատերազմի յուրաքանչյուր օր Ծովային հետևակի կորպուսը, ոչնչացնելով թշնամուն, ազատագրելով ուկրաինական հողերն ու ամենադժվարին հատվածներում ամենադժվարին առաջադրանքները կատարելով՝ ապացուցում է, որ հզոր և կարող ուժ է», - դիմելով զինծառայողներին հայտարարել է Զելենսկին։
Նախնական տվյալներով՝ գիշերը ռուսական բանակը չորս կամիկաձե անօդաչու թռչող սարք է ուղարկել Ուկրաինայի թիրախների ուղղությամբ, և բոլորը խոցվել են, առավոտյան հաղորդել է ուկրաինական բանակի գլխավոր շտաբը:
Գիշերվա ընթացքում լակոնիկ տեղեկություններ եղան Ուկրաինայի հարավային և կենտրոնական շրջանների վրայով կամիկաձե անօդաչուների թռիչքների մասին: Այս տարածքներում օդային տագնապ է հայտարարվել:
Ուկրաինայի գլխավոր շտաբը ռազմաճակատում իրավիճակի լուրջ փոփոխության մասին չի հայտնում: Ռուսները, ըստ հաղորդագրության, շարունակում են հարձակման փորձերը Կուպյանսկի և Լիմանի ուղղություններով և Ավդեևկայի, Մարյինկայի ու Բախմուտի շրջաններում։
Այս գիշեր Բելգորոդի մարզի Բորիսովկա գյուղում անօդաչու թռչող սարքը պայթուցիկ է նետել վարչական շենքերից մեկի վրա, տանիքը վնասվել է, տուժածներ չկան, հայտնել է նահանգապետ Վյաչեսլավ Գլադկովը։ Ավելի ուշ, նրա խոսքով, Բորիսովկայում անօդաչու թռչող սարքի երկրորդ հարվածի արդյունքում վնասվել է բնակելի տան տանիք։
Գրայվորոնում, ըստ տեղական իշխանությունների, անօդաչու թռչող սարքերն ուղղվել են երկու բնակելի շենքերի վրա, պայթուցիկ սարքերի արձակման արդյունքում դրանք բռնկվել են։
Գլադկովի խոսքով՝ Գրայվորոնսկի շրջանի բնակիչները դեռ չպետք է վերադառնան իրենց տները: Երեկ իշխանություններն այնտեղից տարհանել էին մարդկանց, խաղաղ բնակիչների մեջ զոհեր չկան։
Միաժամանակ, նահանգապետն ասել է, որ Գրայվորոնում տարհանման միջոցառումների ժամանակ մահացել է 1941 թվականին ծնված մի կին։
Գլադկովի խոսքով՝ Գրայվորոնսկի սահմանային շրջանում, ուր նախօրեին մուտք է գործել «Ռուս կամավորական կորպուսի» ջոկատը, «պաշտպանության նախարարությունը շարունակում է տարածքի մաքրումը՝ ուժային կառույցների հետ միասին»։
Բացի այդ, Բելգորոդ քաղաքի բնակիչները հաղորդում են քաղաքում պայթյունի ձայնի և այն փողոցի արգելափակման մասին, որտեղ գտնվում է տեղի Անվտանգության դաշնային ծառայության շենքը: Այս տեղեկատվության պաշտոնական հաստատում առայժմ չկա։
Ռուսաստանյան իշխանությունները հայտնում են, որ Բելգորոդի շրջանում տեղի ունեցած գնդակոծության հետևանքով վեց մարդ է վիրավորվել։ Նահանգապետ Վյաչեսլավ Գլադկովի խոսքերով՝ Գլոտովո գյուղի գնդակոծության հետևանքով երկու մարդ հոսպիտալացվել է, Գրեյվորոն քաղաքում ևս չորս հոգի, այդ թվում՝ մեկ կին, բեկորային վնասվածքներ են ստացել։
Այսօր առավոտից հաղորդվում է Ուկրաինային սահմանակից ռուսաստանյան Բելգորոդում ընթացող մարտերի, գնդակոծությունների մասին։ Կրեմլի խոսնակ Դմիտրի Պեսկովը, մեկնաբանելով այդ իրադարձությունները, պնդել է, որ Կիևի նպատակը Բախմուտից ուշադրությունը շեղելն է։
Պեսկովը նաև հայտարարել է, որ աշխատանքներ են տարվում Ռուսաստանի տարածքից «ուկրաինացի դիվերսանտներին դուրս մղելու և ոչնչացնելու ուղղությամբ, տեղում կան բավարար ուժեր և միջոցներ»։
Ռուսաստանյան և ուկրաինական աղբյուրների տվյալներով՝ թեժ մարտեր են ընթանում ռուս-ուկրաինական սահմանին՝ Բելգորոդի և Խարկովի շրջանների միջև։
Ըստ որոշ տեղեկությունների՝ ուկրաինական կողմից մեկ կամ մի քանի զինված խմբավորումներ են ներխուժել ռուսական տարածք, տեսանյութեր են հրապարակվել Բելգորոդի շրջանի սահմանային անցակետի վրա ենթադրյալ հարձակումների վերաբերյալ, որոնց իսկությունը, սակայն, դեռևս չի ստուգվել։ Հաղորդվել է նաև Ուկրաինային սահմանամերձ ռուսական բնակավայրերի հրթիռակոծության մասին։
Բելգորոդի շրջանի նահանգապետ Վյաչեսլավ Գլադկովը տարածած հայտարարությամբ Ուկրաինային մեղադրել է «Բելգորոդի շրջանի դեմ տեղեկատվական հարձակման մեջ», ռուսաստանցի պաշտոնյան միաժամանակ հաստատել է Գրայվորոնովսկի շրջանի հրետակոծությունը, սակայն ասել է, որ դրա հետևանքով վիրավորներ, զոհեր չկան։ Գլադկովի խոսքով՝ «հակառակորդի դիվերսիոն-հետախուզական խումբը ներխուժել է Գրայվորոնովսկի շրջանի տարածք», և քայլեր են ձեռնարկվում նրանց «չեզոքացնելու համար»։
Կիևը չի մեկնաբանել ռուսական կողմի հայտարարությունները։
Հիրոսիմայում երեկ ավարտվեց Մեծ յոթնյակի եռօրյա գագաթնաժողովը, որին մասնակցեց նաև Ուկրաինայի նախագահը։ Հիմնական արդյունքներից է Արևմուտքի աջակցությունը Կիևին նաև F-16 կործանիչներ մատակարարելու միջոցով։
Միացյալ Նահանգների նախագահ Ջո Բայդենը հայտարարել է, թե Վլադիմիր Զելենսկիից երաշխիքներ է ստացել, որ ուկրաինական կողմը F-16-եր ստանալու դեպքում դրանք չի օգտագործի ռուսական տարածքի դեմ: «Նա վստահեցրեց, որ իրենք նման ինքնաթիռներ չեն օգտագործի ռուսական տարածքի դեմ», - ասել է Բայդենը կիրակի օրը Հիրոսիմայում G7-ի գագաթնաժողովից հետո կայացած մամուլի ասուլիսում։
ԱՄՆ նախագահն այսպես է պատասխանել լրագրողի հարցին, թե արդյոք Վաշինգտոնը վստահ է, որ Կիևին F-16-երը տրամադրելու ծրագրերը չեն հանգեցնի Ռուսաստանի և Արևմուտքի միջև կտրուկ էսկալացիայի։
Ուկրաինայի նախագահ Վլադիմիր Զելենսկին, ըստ էության, հաստատել է Բախմուտ քաղաքի անցումը Ռուսաստանի վերահսկողությանը։
ԱՄՆ նախագահ Ջո Բայդենի հետ հանդիպումից առաջ պատասխանելով հարցին, թե արդյոք Բախմուտը մնո՞ւմ է Կիևի վերահսկողության տակ, Զելենսկին ասել է. - «Կարծում եմ՝ ոչ։ Այսօր Բախմուտը միայն մեր սրտերում է»։
Մոսկվան երեկ հայտարարեց, որ ամբողջությամբ գրավել է արևելյան ուկրաինական քաղաքը։ Նախագահ Վլադիմիր Պուտինն արդեն շնորհավորել է «Վագներ» մասնավոր ընկերությանը և ռուսական բանակին քաղաքի «ազատագրման» համար։ Պուտինը նշել է, որ 15-ամսյա պատերազմի ամենաերկար և արյունալի ճակատամարտն ավարտվել է Ռուսաստանի հաղթանակով։
Զելենսկին, իր հերթին, հայտարարել է, որ քաղաքում ամեն ինչ ոչնչացված է։ «Դա ողբերգություն է։ Այնտեղ ոչինչ չկա», - նկատել է նա։
Ռուսաստանի նախագահ Վլադիմիր Պուտինը շնորհավորել է «Վագներ» մասնավոր ընկերությանը և ռուսական բանակին արևելյան ուկրաինական Բախմուտ քաղաքի «ազատագրման» համար։
Կրեմլի կայքում հրապարակված հայտարարության մեջ Պուտինը նշել է, որ 15-ամսյա պատերազմի ամենաերկար և արյունալի ճակատամարտն ավարտվել է Ռուսաստանի հաղթանակով, և որ բոլոր նրանք, ովքեր դրանում հաջողել են, կպարգևատրվեն։
Ռուսական «Վագներ»-ը երեկ հայտարարեց, թե ամիսներ շարունակված արյունալի մարտերից հետո ամբողջովին գրավել է Բախմուտը։
Վարձկանների ղեկավար Եվգենի Պրիգոժինը ասել է, թե իր ուժերը հաջորդ շաբաթ դուրս են գալու քաղաքից հանգստանալու և հանձնելու են այն ռուսական կանոնավոր բանակին։