Ուկրաինայի զինված ուժերը հաղորդում են անցած գիշեր ռուսական զանգվածային հարձակման հետևանքով տուժած խաղաղ բնակիչների մասին։
Ըստ հաղորդման՝ Օդեսայի մարզում տուժել է առնվազն 12 խաղաղ բնակիչ, այդ թվում՝ իննամյա երեխա, Խերսոնում մեկ խաղաղ բնակիչ է վիրավորվել։
«Օդեսայում երեք խաղաղ բնակիչ է վիրավորվել օկուպանտների կողմից քաղաքի հրթիռակոծության հետևանքով։ Վեց մարդ վիրավորվել է անօդաչու թռչող սարքերի և հրթիռների խոցման ժամանակ առաջացած պայթյունի ալիքներից, ևս երեքը՝ Օդեսայի շրջանի այլ բնակավայրերում, որտեղ հրդեհներ են սկսվել հարվածների և բեկորների ընկնելու հետևանքով», - ասվում է «Հարավ» օպերատիվ հրամանատարության ֆեյսբուքյան էջում։
Ղրիմում զինամթերքի մեծ պահեստ է բռնկվել, պայթյունները շարունակվում են արդեն մի քանի ժամ։ Իշխանությունները փակել են թերակղզու գլխավոր մայրուղին և տարհանում են շրջակա գյուղերի բնակիչներին։
Ղրիմի՝ ռուսական իշխանությունների կողմից նշանակված ղեկավար Սերգեյ Ակսյոնովն ասել է, որ ավելի քան երկու հազար մարդ է պլանավորվում տարհանել հրդեհին մոտ գտնվող բնակավայրերից։ «Պլանավորվում է չորս բնակավայրերի բնակիչների ժամանակավոր տարհանում», - գրել է նա իր Տելեգրամ ալիքում։
Ակսյոնովը նաև հայտնել է, որ հրդեհի բռնկման պատճառով փակվել է «Տավրիդա» մայրուղին։
Հարավաֆրիկյան Հանրապետության նախագահ Սիրիլ Ռամաֆոսան Միջազգային քրեական դատարանին խնդրում է թույլ տալ չձերբակալել Ռուսաստանի նախագահ Վլադիմիր Պուտինին այն դեպքում, եթե վերջինս այցելի Յոհանեսբուրգ՝ BRICS-ի ժողովին մասնակցելու համար:
«Հարավային Աֆրիկան ակնհայտ խնդիրներ ունի նախագահ Պուտինին ձերբակալելու և արտահանձնելու խնդրանքը կատարելու հարցում: Ռուսաստանը նկատել է տվել, որ իր նախագահի ձերբակալությունը կհամարի պատերազմի հայտարարություն», - ասվում է Ռամաֆոսայի ուղերձում:
Հարավաֆրիկյան Հանրապետության նախագահը, չմանրամասնելով, նշել է, որ այդ հարցի շուրջ քննարկումներ է անցկացնում ՄՔԴ-ի հետ:
BRICS-ի գագաթնաժողովը, որին հրավիրված է Վլադիմիր Պուտինը, պետք է տեղի ունենա օգոստոսին:
Ամերիկայի Միացյալ Նահանգները կշարունակի այլ երկրների հետ աշխատել Սև ծովով ուկրաինական հացահատիկի փոխադրումը շարունակելու համար: Այդ մասին ասել է ԱՄՆ-ի ազգային անվտանգության խորհրդի ներկայացուցիչ Ջոն Քիրբին:
«Մենք կոչ ենք անում Ռուսաստանի կառավարությանն անհապաղ վերանայել գործարքը չերկարաձգելու որոշումը և միաժամանակ հայտնում ենք, որ մենք շարունակելու ենք մյուս երկրների հետ ջանքեր գործադրել Սև ծովով թե՛ ուկրաինական և թե՛ ռուսական արտադրության հացահատիկն աշխարհի երկրներ հասցնելու ջանքերը», - ասել է Քիրբին:
Նրա փոխանցմամբ, ամերիկյան պատժամիջոցները երբևէ պարենի կամ պարարտանյութի վրա չեն տարածվել:
Քիրբիի խոսքով, ոչինչ, այդ թվում՝ Ղրիմի կամրջին հասցված հարվածը, չի կարող արդարացնել գործարքից հրաժարվելու ռուսների որոշումը:
Երեկ ՄԱԿ-ը հայտարարել է, որ այդ որոշումը մեծ ճգնաժամ կստեղծի աշխարհի աղքատ երկրներում:
Միացյալ Նահանգների պաշտպանության նախարար Լոյդ Օսթինը հայտարարել է, որ ԱՄՆ և դաշնակիցները հավատարիմ են Ռուսաստանի հարձակումից պաշտպանվող Ուկրաինային աջակցելու հանձնառությանը:
Օսթինն այդ մասին ասել է Ուկրաինային զենք տրամադրելու հարցով շփման խմբի առցանց հանդիպման ընթացքում: Այդ խմբին անդամակցել են ընդհանուր հաշվով 54 պետություններ:
«Ուկրաինայի հակագրոհը նշանակալից զարգացում է այս ողբերգական պատերազմի ընթացքում: Ուկրաինայի զինված ուժերը փորձում է վերահաստատել հսկողությունն իր ինքնիշխան տարածքի նկատմամբ: Ռուսաստանի ագրեսիան չափազանց անկայուն վիճակ է ստեղծել: Պուտինի սարսափելի և արյունալի պատերազմը շարունակում է կյանքեր խլել»,- ասել է Օսթինը:
Նրա խոսքով, ազատության համար Ուկրաինայի պայքարը ոչ թե արագավազք է, այլ մարաթոն:
ԱՄՆ պաշտպանության նախարարը հավաստիացրել է, որ դաշնակիցները կշարունակեն սատարել Ուկրաինային, քանի առաջնորդվում են ընդհանուր արժեքներով՝ ինքնիշխանություն, մարդու իրավունքներ և ազատություն, և դեմ են, որ որևէ հզոր երկիր հարձակվի խաղաղասեր հարևանի վրա ու փորձի ուժով փոխել սահմանները:
Ենթադրվում է, որ խումբը հերթական համաժողովում քննարկելու է Ուկրաինայի նախաձեռնած հակագրոհի, Ուկրաինային հակաօդային պաշտպանության համակարգեր, ինչպես նաև զինամթերք տրամադրելու հարցերը:
F-16 տեսակի ամերիկյան արտադրության կործանիչներով վարժանքներ կատարելու նպատակով ուկրաինացի օդաչուների առաջին խումբը մինչև ամռան վերջ կմեկնի արտասահման:
Այդ մասին հայտնել է Ուկրաինայի բանակի ռազմաօդային ուժերի հրամանատարության խոսնակ Յուրի Իգնատը:
ԱՄՆ նախագահի ազգային անվտանգության հարցերով խորհրդական Ջեյք Սալիվանի փոխանցմամբ, օդաչուների ուսուցումը կմեկնարկի առաջիկա շաբաթների ընթացքում:
Իգնատի փոխանցմամբ, ուսուցումը տեղի կունենա տարբեր երկրներում, քանի որ միայն մեկ երկրում հնարավոր չէ այդքան մեծ թվով օդաչուներ պատրաստել:
Վիլնյուսում ՆԱՏՕ-ի վերջին գագաթնաժողովում Ուկրաինան և 11 գործընկեր երկրներ կնքել են F-16 կործանիչներով աշխատելու համար ուկրաինացի օդաչուների ուսուցում իրականացնելու համաձայնագիր:
F-16 տեսակի ամերիկյան արտադրության կործանիչներով վարժանքներ կատարելու նպատակով ուկրաինացի օդաչուների առաջին խումբը մինչև ամռան վերջ կմեկնի արտասահման:
Այդ մասին հայտնել է Ուկրաինայի բանակի ռազմաօդային ուժերի հրամանատարության խոսնակ Յուրի Իգնատը:
ԱՄՆ նախագահի ազգային անվտանգության հարցերով խորհրդական Ջեյք Սալիվանի փոխանցմամբ, օդաչուների ուսուցումը կմեկնարկի առաջիկա շաբաթների ընթացքում:
Իգնատի փոխանցմամբ, ուսուցումը տեղի կունենա տարբեր երկրներում, քանի որ միայն մեկ երկրում հնարավոր չէ այդքան մեծ թվով օդաչուներ պատրաստել:
Վիլնյուսում ՆԱՏՕ-ի վերջին գագաթնաժողովում Ուկրաինան և 11 գործընկեր երկրներ կնքել են F-16 կործանիչներով աշխատելու համար ուկրաինացի օդաչուների ուսուցում իրականացնելու համաձայնագիր:
Կրեմլի խոսնակ Դմիտրի Պեսկովն ասել է, որ Ռուսաստանի նախագահ Վլադիմիր Պուտինի աշխատանքային օրակարգում Թուրքիայի նախագահ Ռեջեփ Թայիփ Էրդողանի հետ հանդիպում դեռևս նախատեսված չէ:
«Ոչ, նման բան դեռ չկա», - ասել է Պեսկովը՝ պատասխանելով այն հարցին, թե արդյո՞ք երկու երկրների ղեկավարները մտադիր են հանդիպել և քննարկել հացահատիկի գործարքի ժամկետը չերկարաձգելու Մոսկվայի որոշումը:
Էրդողանը երեկ ասել է, որ ցանկանում է հարցը քննարկել ռուս պաշտոնակցի հետ անմիջապես այն բանից հետո, երբ կավարտի Պարսից ծոցի երկրներ կատարած այցերը:
Հուլիսի 14-ին Էրդողանն ասել էր, որ Անկարան սկսում է նախապատրաստվել Ռուսաստանի նախագահի հնարավոր այցին, որը, ենթադրաբար, կարող է տեղի ունենալ այս տարվա օգոստոսին:
Ռուսաստանի և Թուրքիայի արտաքին գործերի նախարարներ Սերգեյ Լավրովը և Հաքան Ֆիդանը հեռախոսով քննարկել են հացահատիկի գործարքը շարունակելու հնարավորությունը:
Թուրքիայի արտաքին գերատեսչության մի անանուն աշխատակից ՏԱՍՍ լրատվական գործակալությանը փոխանցել է, որ նախարարների զրույցի ընթացքում անդրադարձ է եղել հացահատիկի փոխադրման ստամբուլյան գործարքին և անտառային հրդեհների դեմ պայքարում կիրառվող խոշոր ռուսական ինքնաթիռներ գնելու հնարավորությանը:
Ռուսաստանի զինված ուժերը բարձր ճշգրտության զենքով հատուցման լայնածավալ հարված են հասցրել Օդեսայի և Նիկոլաևի շրջանի օբյեկտներին, որտեղ «ուկրաինացիները ծովային անօդաչու թռչող սարքերով ահաբեկչություններ են ծրագրել»: Այդ մասին հայտարարել է Ռուսաստանի պաշտպանության նախարարության պաշտոնական ներկայացուցիչ, գեներալ-լեյտենանտ Իգոր Կոնաշենկովը։
«Այս գիշեր Ռուսաստանի զինված ուժերը հատուցման հարված են հասցրել բարձր ճշգրտության ծովային զինատեսակներով այն օբյեկտներին, որտեղ Ռուսաստանի դեմ ահաբեկչական գործողություններ են նախապատրաստվել», - ասել է Կոնաշենկովը։
Նրա փոխանցմամբ՝ Նիկոլաևի և Օդեսայի տարածքում ոչնչացվել են պահեստներ, որտեղ պաշարված էր Ուկրաինայի բանակի համար նախատեսված մոտ 70 հազար տոննա վառելիք:
Ռուսաստանը Կիևին է մեղադրել նախօրեին Ղրիմի կամրջին հասցված հարվածի համար, որի հետևանքով կամրջի մի հատվածն ավերվել է և երկու մարդ է զոհվել:
Նախագահ Վլադիմիր Պուտինը երեկ ասել է, որ ռուսական կողմն անպայման պատասխան կտա այդ գրոհին: