եթերում Թրամփն ու Պուտինը հանդիպեցին Ալյասկայում

Ալյասկայում շուրջ երեք ժամ շարունակված բանակցություններից հետո Թրամփն ու Պուտինը հայտարարեցին՝ որոշ հարցերի շուրջ եկել են համաձայնության, որոշները դեռ պետք է քննարկվեն։ Պուտինը հանդիպումը բնորոշեց որպես կառուցողական, հույս հայտնելով, որ «ձեռք բերված պայմանավորվածությունները կարող են մեկնարկային կետ լինել՝ Ուկրաինայի հակամարտության կարգավորման և Ռուսաստանի ու ԱՄՆ-ի միջև կապերի վերականգնման համար»։

Թրամփն, իր հերթին, ասաց, թե «շատ, շատ հարցերում համաձայնության են եկել», միաժամանակ նշեց՝«կան մի քանի կարևոր կետեր, որոնց մենք դեռ լիովին չենք հասել, բայց որոշակի առաջընթաց ենք գրանցել»։

Թե որոնք են համաձայնեցված ու դեռ վիճահարույց կետերը՝ նախագահներից որևէ մեկը չհստակեցրեց. Թրամփն ու Պուտինը հայտարարություններից հետո լրագրողներին հարցերին չպատասխանեցին՝ արագ հեռանալով մամուլի սրահից։

Մինչ այդ Պուտինը միայն նշեց, որ տևական ու կայուն կարգավորման հնարավոր է հասնել միայն հակամարտության սկզբնական պատճառները վերացնելուց հետո, միևնույն ժամանակ համաձայնեց, որ այն պետք է նաև Ուկրաինայի անվտանգությունը երաշխավորի։ Ավելի քան երեք տարի այդ երկրի դեմ պատերազմելուց հետո Պուտինը նաև վստահեցրեց, թե Ռուսաստանը ուկրաինացիներին «մշտապես համարել և համարում է եղբայրական ժողովուրդ, և այն, ինչ տեղի է ունենում հիմա՝ ողբերգություն է»։

Կարճ ելույթում Կրեմլի ղեկավարը հասցրեց նաև եվրոպացիներին զգուշացնել՝ հույս հայտնելով, որ Կիևում ու ԵՄ մայրաքաղաքներում «չեն տորպեդահարի այսօր ձեռք բերված համաձայնությունները»։

Թրամփը տեղեկացրեց, որ պատրաստվում է այսօրվա հանդիպման արդյունքները ներկայացնել Ուկրաինայի նախագահին ու եվրոպացի դաշնակիցներին։

«Հաջորդ հանդիպումը՝ Մոսկվայում», - առաջարկեց Պուտինը՝ անգլերենով, Թրամփը չմերժեց։

Պուտինը և Թրամփը դեռ ճաշի ընդմիջում չեն արել․ ի՞նչ է դա նշանակում

Սպիտակ տան պաշտոնյան հայտնել է, որ Դոնալդ Թրամփի և Վլադիմիր Պուտինի երկկողմ հանդիպումը շարունակվում է արդեն մոտ 90 րոպե և տեղական ժամանակով արդեն 13։30-ն անց է։ Ինչպես հաղորդում է CNN-ը, սա Թրամփին բավականաչափ ժամանակ է տվել՝ գնահատելու Պուտինի մտադրությունները, ինչը, ինչպես նա էր ասել այս շաբաթվա սկզբին, կտևի ընդամենը երկու րոպե։

Սպիտակ տունը միտումնավոր խուսափել էր այսօրվա գագաթնաժողովի ճշգրիտ ժամանակացույցի մասին կանխատեսումներից՝ գիտակցելով, որ ցանկացած շեղում կմեկնաբանվի որպես հաջողության կամ ձախողման նշան։ Սակայն Կրեմլն ավելի վաղ հայտարարել էր, որ հանդիպումը կարող է մի քանի ժամ տևել։

Այս տարի Թրամփի և Պուտինի հեռախոսազրույցների մեծ մասը տևել է մինչև 90 րոպե։ Երկու առաջնորդների զրույցներին հետևելիս կարևոր է նաև հաշվի առնել թարգմանության ժամանակը (չնայած Պուտինը խոսում է անգլերեն, նա սովորաբար իր հանդիպումներն անցկացնում է ռուսերենով)։

«Այն, որ Թրամփը և Պուտինը մեկուկես ժամ բանակցելուց հետո չեն անցել ընդլայնված երկկողմ ճաշին, նույնպես խոսում է այն մասին, որ Թրամփը, գոնե մինչ այժմ, ստիպված չի զգացել «լքել» բանակցությունների վայրը, ինչպես խոստացել էր անել այսօր ավելի վաղ, եթե զգա, որ հանդիպումը վատ է ընթանում», - գրում է աղբյուրը։

Ընդլայնված կազմով բանակցություններին կմասնակցի ՌԴ պաշտպանության նախարարը

ԱՄՆ-ի և Ռուսաստանի նախագահների բանակցությունների ընդլայնված կազմով հատվածին ռուսական կողմից կմասնակցի նաև Ռուսաստանի պաշտպանության նախարար Անդրեյ Բելոուսովը, հայտնել է Կրեմլի խոսնակ Դմիտրի Պեսկովը։

Այս պահին նախագահներից բացի ռուսական կողմից բանակցություններին մասնակցում են արտգործնախարար Սերգեյ Լավրովը և արտաքին քաղաքականության նախագահի խորհրդական Յուրի Ուշակովը, իսկ ամերիկյան կողմից՝ պետքարտուղար Մարկո Ռուբիոն և հատուկ դեսպանորդ Սթիվ Ուիթքոֆը։

Պուտին-Թրամփ բանակցություններն ընթանում են մեկ ժամից ավելի

Դոնալդ Թրամփն ու Վլադիմիր Պուտինը՝ իրենց պատվիրակությունների հետ, բանակցում են արդեն մեկ ժամից ավելի։ CNN-ը նշում է՝ սա կարևոր է, քանի որ այս շաբաթվա սկզբին Թրամփը հայտարարել էր, որ իրեն ընդամենը մի քանի րոպե է հարկավոր՝ հասկանալու համար, թե արդյոք Պուտինը իսկապես հետաքրքրված է խաղաղության հասնելու հարցում:

Նա նաև ասել էր, որ եթե գագաթնաժողովը վատ ընթանա, ինքը կլքի այն: «Ես կարող եմ հեռանալ և ասել՝ հաջողություն, և դա կլինի վերջը։ Ես կարող եմ ասել, որ այս հակամարտությունը չի կարգավորվելու», - հայտարարել էր Թրամփը գագաթնաժողովից առաջ։

Եվ փաստացի հանդիպումը շարունակվում է արդեն մեկ ժամից ավելի։

Մինչ Էլմենդորֆ-Ռիչարդսոն ավիաբազայում ընթանում է Պուտին-Թրամփ հանդիպումը, Ալյասկայի Անքորիջ քաղաքի փողոցներում մարդիկ ցույց են իրականացնում հաջակցություն Ուկրաինայի և պահանջում դադարեցնել պատերազմը։

Մինչ Ալյասկայում արդեն մոտ մեկ ժամ է, ինչ ընթանում է ԱՄՆ-ի և Ռուսաստանի նախագահների հանդիպումը, մամուլը համեմատություններ է անում այն մասին, թե ինչպես է Թրամփն ընդունել Ուկրաինայի, իսկ հիմա արդեն Ռուսաստանի նախագահին։

BBC-ն նշում է, որ Պուտինը բոլորովին այլ ընդունելության է արժանացել, քան Զելենսկին, որի հանդիպումը Սպիտակ տանն այս այս տարվա սկզբին սկանդալով ավարտվեց․ ԱՄՆ նախագահն ու փոխնախագահը բառացիորեն բղավում էին նրա վրա։

«Դա անսովոր տեսարան էր, որին ականատես եղանք փետրվարին, երբ Զելենսկին Սպիտակ տանը Թրամփի կողմից լիակատար հարձակմանը ենթարկվեց։ Պուտինին կարելի էր տեսնել ժպտալիս, երբ նա նստած էր Թրամփի հետ նախագահական մեքենայում՝ The Beast-ում («Գազան»)։ Նախքան նա որևէ բառ կարտասաներ, սա նրա համար արդեն հաղթանակն է»,- գրում է գործակալությունը։

Ըստ BBC-ի՝ Թրամփը ոչնչի չի հասել միայն Պուտինին այստեղ բերելով։ Մինչդեռ Պուտինն արդեն բավականին մեծ բանի է հասել՝ պարզապես ինքնաթիռից իջնելով, կարմիր գորգով անցնելով և Թրամփի մեքենան նստելով։

«Սա մարդ է, որը միջազգային մակարդակով մերժված է եղել»,- գրում է գործակալությունը։

Արդեն մոտ մեկ ժամ է, ինչ Ալյասկայի Անքորիջ քաղաքի Էլմենդորֆ-Ռիչարդսոն ավիաբազայում ընթանում են Թրամփ-Պուտին բանակցությունները, որոնց մասնակցում են նաև նրանց օգնականներնն ու արտգործնախարարները։

Ուկրաինայի նախագահ Վլադիմիր Զելենսկին վերջին օրերին հայտարարել է, որ Ալյասկայի գագաթնաժողովում Ուկրաինայի «թիվ մեկ» պահանջն այն է, որ Ռուսաստանը համաձայնի հրադադարին։

Միայն հրադադարը կարող է հիմք դառնալ խաղաղության շուրջ իմաստալից բանակցությունների համար, նշում են Ուկրաինան և նրա եվրոպացի դաշնակիցները:

Վլադիմիր Զելենսկու մասնակցությամբ ԱՄՆ նախագահի և եվրոպացի առաջնորդների միջև չորեքշաբթի տեղի ունեցած հեռախոսազրույցից հետո թեմային ծանոթ երկու եվրոպացի դիվանագետներ CNN-ին ասել են, որ Թրամփն առաջարկել է այսօրվա բանակցություններում պնդել, որ հրադադար հաստատվի։

Եթե Ռուսաստանը համաձայնի հրադադարին, Ուկրաինայի ուշադրությունը կարող է կենտրոնանալ իր հաջորդ առաջնահերթության՝ հաջորդ հանդիպմանը մասնակցելու վրա։

Կիևը հույս ունի, որ այսօրվա բանակցությունները նախաբան կլինեն Ուկրաինայի, Ռուսաստանի և ԱՄՆ առաջնորդների միջև եռակողմ գագաթնաժողովի։

«Ուկրաինային վերաբերող ամեն ինչ պետք է քննարկվի բացառապես Ուկրաինայի հետ,- չորեքշաբթի Թրամփի հետ հեռախոսազրույցից հետո հայտարարել էր Զելենսկին,- Մենք պետք է պատրաստենք եռակողմ ձևաչափ բանակցությունների համար»։

Թրամփն իր հերթին վստահեցրել է, որ Ուկրաինային վերաբերող բոլոր հարցերը կքննարկվեն Կիևի մասնակցությամբ։

Պուտինի Aurus-ն ընդդեմ Թրամփի The Beast-ի

BBC-ն գրում է, որ Պուտինի այցը Ալյասկա լի է խորհրդանիշներով։ Նրա լիմուզինը՝ ռուսական արտադրության Aurus-ը, գտնվում էր Էլմենդորֆ-Ռիչարդսոն բազայի թռիչքուղու վրա, բայց նա գերադասեց բանակցությունների վայր մեկնել Դոնալդ Թրամփի նախագահական մեքենայով՝ The Beast-ով («Գազան»)։

Ռուսաստանի նախագահը դրանով ազդակ էր հղում իր ամերիկացի գործընկերոջը, որ վստահում է նրան, որ իրեն դուր են գալիս թե՛ Թրամփը, թե՛ նրա ավտոմեքենան։ Պուտինը նաև ժպտում էր, ինչը մեծապես հակասում է երկու երկրների միջև երկարամյա թշնամանքին։

«Սկզբի համար դա շատ լավ քայլ է, եթե ուզում եք, որ բանակցողը վստահի ձեզ և հավատա ձեզ», - նշում է բրիտանական գործակալությունը։

CNN-ը գրում է, որ Ռուսաստանի նախագահը հայտնի է իր մտքերը, տրամադրվածություն իր կեցվածքի միջոցով փոխանցելու կարողությամբ։

ԱՄՆ նախկին նախագահները քանիցս պատմել են, որ նա սովորություն ունի խոսելու ընթացքում ուսերն առաջ, վար գցած նստել, երբ հետաքրքրված չէ թեմայով։

Սակայն Ալյասկայում այդպես չէր, երբ հանդիպումն սկսվեց, նա նստել էր ուղիղ կեցվածքով՝ ձեռքերն իրար կպած։ Ե՛վ Թրամփը, և՛ Պուտինը մի քանի անգամ ժպտացին, չնայած Թրամփը հիմնականում սառը հայացք ուներ։