Ռուսաստանի իշխանությունների կողմից նշանակված Դոնեցկի ղեկավար Դենիս Պուշիլինը հայտարարել է Դոնեցկի վրա հրթիռային հարվածի մասին:
Նրա խոսքով՝ քաղաքը հարձակման է ենթարկվել հունիսի 30-ին մոտավորապես ժամը 22:00-ին՝ «հեռահար օդային արձակվող հրթիռներով»։ Հարվածի հետևանքով զոհվել է մեկ կին, կա երկու վիրավոր։ Վնասվել են «Սոկոլ» շուկայի մանրածախ տաղավարները։ Հարվածի վայրում հրդեհ է բռնկվել։
Ռազմական վերլուծաբան Յան Մատվեևը գրում է, որ հավանաբար հարձակման է ենթարկվել Դոնեցկի գունավոր մետաղների պետական հետազոտական և նախագծային ինստիտուտը (DonNIPICM): «Սա բնակելի շենք չէ, ասում են, որ այնտեղ կարող էր լինել ռազմական շտաբը», - ասել է նա։
Ուկրաինայի Ազգային անվտանգության և պաշտպանության խորհրդին կից դեզինֆորմացիայի դեմ պայքարի կենտրոնի ղեկավար Անդրեյ Կովալենկոն խոսել է օկուպացված Դոնեցկում «հիանալի աշխատանքի» մասին։ Նա չի ներկայացրել հարձակման մանրամասները։
Լուգանսկում նույնպես պայթյուններ են լսվել։ Ռուսաստանի պետական մարմինները հայտնել են ուկրաինական ԱԹՍ հարձակումներից հետո հրդեհների բռկման մասին։ Telegram-ի որոշ ալիքների համաձայն, ենթադրաբար, այրվում է նավթի պահեստ։
Սարատովի և Էնգելսի բնակիչները նույնպես հայտնել են պայթյունների մասին: Ռոստովի մարզի ղեկավար Յուրի Սլյուսարը հայտարարել է անօդաչու թռչող սարքերի հարձակման մասին:
Ռուսաստանի պաշտպանության նախարարությունը հայտարարել է, որ անցյալ գիշեր ՀՕՊ ուժերը խոցել են 60 անօդաչու թռչող սարք։
