Աշխատանքից ազատվեց Միջազգային իրավական հարցերով գրասենյակի ղեկավար Դրմեյանը
Վարչապետ Նիկոլ Փաշինյանը երեկ հայտարարեց՝ «կառավարությունը ես եմ»:
«Չի կարող որևէ մեկը իմ դիրքորոշմանը հակասող դիրքորոշում ունենալ», - ասաց նա ու 24 ժամ էլ չանցած աշխատանքից ազատեց Միջազգային իրավական հարցերով գրասենյակի ղեկավար Լիպարիտ Դրմեյանին՝ իրեն հակադրվելու համար:
Դրմեյանը պնդել էր՝ Հայաստանը պետք է կատարի «Հայաստանի էլեկտրական ցանցերի» հարցով արբիտրաժային դատարանի հրատապ որոշումը: Նրա հետ կապ հաստատել «Ազատությանը» չհաջողվեց, իսկ գրասենյակի խոսնակը Ֆեյսբուքում գրեց՝ ի տարբերություն Դրմեյանի, որին ազատել են պաշտոնից ոչ սեփական դիմումի համաձայն, ինքը դադարեցնում է աշխատանքը՝ սեփական դիմումի համաձայն:
Հուլիսի վերջին միջազգային արբիտրաժը ՀԷՑ-ի պետականացման համար ուղի հարթող իշխանության ընդունած նախագծերը «բռնագրավման օրենքներ» էր որակել և Հայաստանին պարտավորեցրել ձեռնպահ մնալ «ընկերության բռնագրավման» հետագա քայլերից: Երեկ, սակայն, վարչապետ Փաշինյանը պնդում էր՝ կառավարությունն է հաղթել:
«Արբիտրաժային դատարանում մենք հաղթել ենք և մեր դիրքորոշումները պնդել ենք: Ընդհանրապես կառավարությունում եթե մարդիկ կան, որ իմ դիրքորոշմանը հակասող դիրքորոշում ունեն, հենց հիմա թող դիմում գրեն, շենքերից դուրս գան, եթե՝ ոչ, ես ինքս նրանց կհանեմ», - ասել էր նա:
2018-ին՝ 3 միլիոն վարչապետ
2018-ին հեղափոխությամբ իշխանության եկած Փաշինյանը 7 տարի առաջ բոլորովին այլ հռետորաբանություն ուներ:
«Ամենաառանցքային փոփոխությունն այն է, որ դուք՝ ձեզնից յուրաքանչյուրը, իշխանություն է Հայաստանի Հանրապետությունում», - 2018-ի նոյեմբերին Մարտունիում նախընտրական հանրահավաքի ժամանակ իր ելույթում ասել էր նա:
Վարչապետի աթոռին հավակնող Փաշինյանը համոզում էր, որ Հայաստանի յուրաքանչյուր քաղաքացի վարչապետ է. «Եվ ես համարում եմ, որ այն, որ մեր երկրում 3 միլիոն վարչապետ կա, դա ոչ թե թերություն է, այլ՝ առավելություն, դրա մեջ է ամբողջ իմաստը: Երբ մենք ասում ենք, որ դուք այլևս Հայաստանի Հանրապետությունում իշխանություն եք, հենց դա նկատի ունենք: Դուք պետք է դիրքորոշում արտահայտեք, դուք պետք է որոշում կայացնեք, և հեղափոխությունը տեղի է ունեցել այն ժամանակ, երբ դուք որոշումը կայացրել եք»:
7 տարի անց, սակայն, Փաշինյանը փոխեց բառապաշարը, ավելին՝ աշխատանքից հեռացրեց իր տեսակետը չկիսող մասնագետին:
Զուրաբյանը այս հայտարարության առթիվ հաղորդում է ներկայացրել դատախազին
«Մենք հիմա ունենք դիկտատորի ձևավորման գործընթաց: Փաշինյանը... եթե առաջ իսկապես իր իշխանությունը հենվում էր ժողովրդի աջակցության վրա, հիմա արդեն հենվում է Իլհամ Ալիևի բարյացակամության վրա, լրիվ տվել է ինչ-որ արտաքին ուժերի սպասարկմանը՝ կլինի Իլհամ Ալիևը, կլինի Էդրողանը, Թրմափը, թե ասենք՝ Իսրայելը», - «Ազատության» հետ զրույցում ասաց ընդդիմադիր Հայ ազգային կոնգրեսի (ՀԱԿ) փոխնախագահ Լևոն Զուրաբյանը:
Նա Փաշինյանի երեկվա աղմկահարույց հայտարարություններից հետո գրառմամբ հանցագործության մասին հաղորդում է ներկայացրել գլխավոր դատախազին: Զուրաբյանը գրել է՝ վարչապետը խախտել է Սահմանադրության՝ կարծիք արտահայտելու ազատության դրույթը:
«Ասում է՝ «ով առանձին կամ տարբերվող դիրքորոշում ունի՝ ես իրեն կառավարությունից կհանեմ, թող հիմա դուրս գա» և այլն: Սա քրեական արարքի հանցանշան է պարունակում», - ասաց ՀԱԿ փոխնախագահը:
Զուրաբյանի խոսքով՝ Փաշինյանը չարաշահել է նաև պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը. «Այլևս հարկ չի զգում, ինչ-որ իրեն դեմոկրատ պահելու նպատակահարմարությունն այլևս իր համար գոյություն չունի: Արհամարհանքը դեմոկրատական նորմերի նկատմամբ առաջացել է հենց այս պրոցեսներից, որ ինքը մտել է իբր խաղաղության ստորագրման մի գործընթացի մեջ, որտեղ ինքը ենթարկում է արտաքին քաղաքականությունը, իսկ հիմա պարզվում է նաև ներքին քաղաքականությունը Իլհամ Ալիևի պահանջներին»:
Ընդդիմադիր գործիչը վկայակոչում է նաև մեկ այլ՝ կառավարության գործունեությունը կարգավորող օրենքը: Ըստ դրա, կառավարության անդամները կարող են դեմ կամ կողմ քվեարկել որևէ նախաձեռնության, այսինքն՝ առհասարակ կառավարության ցանկացած աշխատակից կարող է ունենալ վարչապետի դիրքորոշումից տարբերվող տեսակետ:
«Սահմանադրական լիազորություն է, որ ինքը իր բնագավառի կառավարման մեջ ինքնուրույն է, անգամ ենթաօրենսդրական ակտեր կարող է ընդունել», - ասաց Զուրաբյանը:
Նա, սակայն, ակնկալիք չունի, որ գլխավոր դատախազը իրավական ընթացք կտա իր հաղորդմանը. - «Շատ լավ իմանալով, որ նա գրպանի դատախազ է Փաշինյանի, այնուամենայնիվ, ես դիմել եմ ոչ թե կոնկրետ անձին, ես դիմել են ինստիտուտին, էսօր չլինի՝ վաղը կլինի հարցի քննարկումը»:
Գլխավոր դատախազությունից «Ազատությանը» փոխանցեցին՝ այս պահին նախաձեռնված վարույթ չկա: Իրավապահները դեռևս չեն մեկնաբանում, թե ինչ ընթացք են պատրաստվում տալ Զուրաբյանի հաղորդմանը՝ վարույթ կհարուցեն, թե կմերժեն՝ եզրահանգելով, որ իրեն ողջ կառավարության հետ նույնացնող վարչապետը ճիշտ ուղու վրա է: Ինչպե՞ս է վարչապետն ինքը արձագանքում ընդդիմադիրներին. Փաշինյանի խոսնակը հորդորեց գրավոր դիմել:
Իսկ միջազգային իրավական հարցերով գրասենյակում սա այս տարվա առաջին պաշտոնանկությունը չէ: Գարնանը, երբ արդեն նշմարվում էր, որ Հայաստանն ու Ադրբեջանը քննարկում են խաղաղության պայմանագրի ստորագրումից հետո հետ կանչել միմյանց դեմ միջազգային հայցերը, աշխատանքից ազատվեց նաև միջազգային իրավական հարցերով Հայաստանի ներկայացուցիչ Եղիշե Կիրակոսյանը: Նախքան հրաժարականն այդ հայցերը միջազգային դատարաններում ներկայացնող Կիրակոսյանն, ըստ էության, դեմ էր արտահայտվել հայցերի հետկանչին, կարծիք հայտնել, թե իրավական վեճերը ոչ թե խանգարում են խաղաղության գործընթացին, այլ հակառակը՝ տարաձայնությունների լուծման քաղաքակիրթ եղանակ են:
