Ադրբեջանը պաշտպանության նախարարությունն այսօր դարձյալ մեղադրել է Հայաստանին՝ այս անգամ Գեղարքունիք մարզի Ճամբարակից հրաձգային զենքով «հրադադարը խախտելու մեջ»: Ընդ որում՝ Բաքուն հայտնել է, որ ադրբեջանական ստորաբաժանումները պատասխան միջոցներ են ձեռնարկել այս ուղղությամբ:
Հայաստանի պաշտպանության նախարարությունը հերքում է հրադադարը խախտելու Բաքվի մեղադրանքը՝ չանդրադառնալով պատասխան կրակ բացելու ու հայկական դիրքերը թիրախավորելու մասին Ադրբեջանի ռազմական գերատեսչության պնդմանը:
Ադրբեջանական դիրքերից մոտ մեկ կմ հեռավարության վրա գտնվող Ճամբարակի բնակիչներից մեկն անանուն մնալու պայմանով «Ազատությանը» փոխանցեց, որ այս գիշեր ինքը կրակոց չի լսել:
Փոխարենը կրակոցները նույն տեմպով շարունակում են ադրբեջանական դիրքերով շրջապատված Սյունիքի մարզի Խնածախ ու Խոզնավար գյուղերում: Խոզնավարում անցած օրերին էլ պատկերը գրեթե չի փոխվել, փոխանցեց վարչական ղեկավար Վահան Զաքյանը:
Օրերս Խոզնավարում Ադրբեջանի զինուժի կրակոցի հետևանքով 73- ամյա Ռուբեն Խաչատրյանի տան պատուհանն էր վնասվել: Պատկան մարմիններից եկել են, փոխհատուցում տրամադրել, ով է եղել՝ Ռուբեն Խաչատրյանը չգիտի, ասում է՝ Գորիսից էին:
Ադրբեջանը հանգիստ չի տալիս նաև Խնածախի բնակիչներին՝ գիշերն էլ կրակել են, ասում են տեղացիները՝ հավելելով, որ օր կա շատ են կրակում, օր կա՝ քիչ: Դիրքային է, թե գյուղի վրա, նրանք հաճախ չեն կողմնորոշվում: Պաշտպանական գերատեսչությունն այս ընթացքում 4 դեպքի մասին է հաղորդել՝ բնութագրելով դրանք որպես թիրախային կրակ, երբ քաղաքացիական ենթակառուցվածք է վնասվել:
«Կրակում են, տանիքներին կպնում է, մեկ ամիս շարունակում էս վիճակում, մարդիկ այգիներն էլ վախենում մշակել, անասնապահության հարցում էլ վախենում են», - ասաց տեղացիներից մեկը:
Անասնապահության հետ կապված էլ նույն խնդիրն է՝ խնածախցի հովիներին ադրբեջանցիները վիրավորում են, սպառնում, պատմեցին «Ազատության» զրուցակիցները:
Գյուղերի ուղղությամբ ադրբեջանական կրակոցներն արդեն մեկ ամսից ավելի է՝ շարունակվում են, դրանք սկսվեցին հայ - ադրբեջանական խաղաղության պայմանագրի տեքստի համաձայնեցումից մի քանի օր հետո:
Ինչպես նախորդ դեպքերում, պաշտոնական Երևանն այսօր ևս առաջարկել է հրադադարի ռեժիմի խախտման հետաքննության Հայաստան-Ադրբեջան համատեղ մեխանիզմ ստեղծել, ինչին մինչև օրս հենց Ադրբեջանը չի արձագանքել։ Հայկական կողմը դարձյալ պատրաստակամություն է հայտնել նաև հրադադարի խախտումների մասին Ադրբեջանի ռազմական գերատեսչության հաղորդագրությունը հիմնավորող փաստերը հետաքննել, եթե դրանք Հայաստանին փոխանցվեն:
Չդադարող կրակոցների ֆոնին Ադրբեջանի ռազմաօդային ուժերը զորավարժություններ են անցկացնում, օրեր առաջ էլ ադրբեջանական բանակի ստորաբաժանումները վարժանքների համար մեկնել էին Թուրքիա։ Զորավարժություններ հարևան երկրում անցկացվել էին նաև մարտին ու փետրվարին։